ភ្នំពេញៈ សាលារាជធានីភ្នំពេញ គ្រោងនឹងចាត់វិធានការបោសសម្អាតទីតាំងអាជីវកម្មមួយចំនួន នៅអមសងខាងដងមហាវិថីព្រះមុនីវង្ស ដើម្បីរៀបចំសណ្តាប់ធ្នាប់ និងបញ្ឈប់ការយកចិញ្ចើមផ្លូវនិងទ្រូងផ្លូវប្រើប្រាស់ជាទីតាំង អាជីវកម្ម និងចំណតរថយន្ដចាប់ពីពាក់កណ្តាលខែក្រោយទៅ។
យោង តាមសេចក្ដីជូនដំណឹងរបស់សាលារាជធានីភ្នំពេញ ចេញផ្សាយពីថ្ងៃចន្ទ ស្ដីពី«ការបញ្ឈប់ការយកចិញ្ចើមផ្លូវនិងទ្រូងផ្លូវប្រើប្រាស់ ជាទីតាំងអាជីវកម្ម និងចំណតរថយន្ដរបស់អាជីវកម្មដ្ឋាននានា តាមដងមហាវិថីព្រះមុនីវង្សដែលភ្នំពេញ ប៉ុស្តិ៍ ទទួលបានកាលពីម្សិលមិញបានបញ្ជាក់ថា កន្លងមកមានអ្នកប្រើប្រាស់ចិញ្ចើមផ្លូវ សម្រាប់ប្រកបអាជីវកម្ម និងទ្រូងផ្លូវសម្រាប់ចតរថយន្ត យានយន្ដដោយឥតសណ្ដាប់ធ្នាប់ បណ្ដាលឲ្យមានការកកស្ទះ ព្រមទាំងបង្កនូវគ្រោះថ្នាក់ចរាចរណ៍ជាយថាហេតុផងនោះ ដើម្បីរក្សានូវសុវត្ថិភាព សណ្ដាប់ធ្នាប់ របៀបរៀបរយ និង សម្រួលដល់ការធ្វើចរាចររបស់ប្រជាពលរដ្ឋ សាលារាជធានីភ្នំពេញបានកំណត់ឲ្យម្ចាស់អាជីវកម្មទាំងអស់ ដែលមានទីតាំងនៅសងខាងដងវិថីព្រះមុនីវង្ស ត្រូវបញ្ឈប់ការយកចិញ្ចើមផ្លូវ និងទ្រូងផ្លូវ ធ្វើជាទីតាំងអាជីវកម្ម ឬ ចំណតរថយន្ដនិងយានយន្ដគ្រប់ប្រភេទរបស់ខ្លួន ដោយគិតចាប់ពីថ្ងៃទី១៥ ខែធ្នូខាងមុខនេះទៅ។
សេចក្ដីជូនដំណឹងរបស់សាលារាជធានីដដែលនោះ ក៏បានធ្វើការព្រមានដល់ម្ចាស់អាជីវកម្មដែលរឹងទទឹងថា៖« នឹងចាត់វិធានការរដ្ឋបាលតាមច្បាប់ និងមិនទទួលខុសត្រូវចំពោះការខាតបង់ និងខូចខាតទ្រព្យសម្បត្តិទាំងឡាយ ណា ដែលកើតមានក្នុងពេលអនុវត្តវិធានការរដ្ឋបាលឡើយ ក្នុងករណីម្ចាស់អាជីវកម្មទាំងឡាយណា ដែលមិនព្រមគោរពនិងអនុវត្តតាមការណែនាំខាងលើនេះ»៕
