The Phnom Penh Post Search

Search form




Logo of Phnom Penh Post newspaper Phnom Penh Post - សាលា​ឧទ្ធរណ៍​បន្ត​សវនាការ​ជំនុំ​ជម្រះ​រឿង ម៉ឹក ដារ៉ា

សាលា​ឧទ្ធរណ៍​បន្ត​សវនាការ​ជំនុំ​ជម្រះ​រឿង ម៉ឹក ដារ៉ា

សាលា​ឧទ្ធរណ៍​បន្ត​សវនាការ​ជំនុំ​ជម្រះ​រឿង ម៉ឹក ដារ៉ា

ភ្នំពេញៈ សាលា​ឧទ្ធរណ៍​បាន​បន្ត​សវនាការ​ជំនុំ​ជម្រះ​និង​សន្និដ្ឋាន​ទៅ​លើ​សំណុំ​រឿង​ជនជាប់​ចោទ ម៉ឹក ដារ៉ា, ជា ឡេង និង ម៉ន ឌឿន នៃ​អង្គហេតុ​លើ​ការ​ចោទ​ប្រកាន់​ពីបទ​រក្សា​គ្រឿង​ញៀន​ទុក និង​ស៊ី​សំណូក។

លោក ង៉ែត សារ៉ាត តំណាង​អយ្យការ​បាន​ធ្វើ​ការ​សន្និដ្ឋាន​ពី​អង្គហេតុ​ទី​២១ ដល់​អង្គហេតុ​ទី២៥ ពាក់ព័ន្ធ​នឹង​ការ​រក្សា​គ្រឿង​ញៀន​ទុក​និង​ស៊ី​សំណូក​ដែល​ប្រព្រឹត្ត​ធ្វើ​ពី​ឆ្នាំ​២០០៧ ដល់​ឆ្នាំ​២០១១។

សម្រាប់​អង្គហេតុ​ទី​២១ ក្នុង​សវនាការ​ពី​ម្សិលមិញ​លោក រ៉ាយ ប៊ុនធឿន ដែល​ជា​មេធាវី​ការពារ​ក្តី​ឲ្យ​លោក ម៉ឹក ដារ៉ា ក្នុង​ចំណោម​មេធាវី​២​រូប​បាន​លើក​ឡើង​ថា បទ​ចោទ​ប្រកាន់​ទៅ​លើ​កូន​ក្តី​របស់​លោក​វា​មិន​យុត្តិធម៌​សោះ​ទេ​ដោយ​សារ គ្រាន់​តែ​បាន​យោង​ទៅ​លើ​ឯកសារ​សួរ​ចម្លើយ​តែ​មួយ​មុខ​តែ​ប៉ុណ្ណោះ។

លោក​ថ្លែង​ថា៖ «គេ​មិន​បាន​យក​ឯកសារ​សួរ​ចម្លើយ​បឋម​ឲ្យ​មើល​ទេ។ គេ​យក​តែ​សំណុំ​រឿង​សន្និដ្ឋាន​យក​មក​ឲ្យ​មើល។ អ៊ីចឹង​ក្នុង​នាម​ជា​អ្នក​គ្រប់គ្រង​ដែល​គ្រាន់​តែ​ចុះហត្ថលេខា​លើ​លិខិត​ពាក់ព័ន្ធ​នឹង​ការ​ចាប់​គ្រឿង​ញៀន​នោះ លោក​គ្មាន​គំនិត​អ្វី​ដោះលែង​ឧក្រិដ្ឋជន​ទេ ហើយ​ចៅ​ក្រម​ក៏​គ្មាន​អ្វី​ត្រូវ​ចោទ​ប្រកាន់​ដែរ»។

លោក​បន្ត​ថា ការ​បែងចែក​ពី​ថ្នាក់​លើ​មក​ថ្នាក់​ក្រោម គឺ​សុទ្ធ​តែ​មាន​អ្នក​ទទួល​ខុស​ត្រូវ។ ប្រសិន បើ​តុលាការ​ចាប់​កំហុស​ទៅ​លើ​ឯកសារ​របស់​មន្ទីរ​ប្រឆាំង​គ្រឿង​ញៀន​មួយ វា​មិន​ត្រឹម​ត្រូវ​ទេ ពោល​គឺ​កូន​ក្តី​របស់​លោក​គ្រាន់​តែ​ជា​អ្នក​ទទួល​ខុស​ត្រូវ​នៅ​ក្នុង​អង្គភាព​នៃ​មន្ទីរ​ប្រឆាំង​គ្រឿន​ញៀន​មែន ប៉ុន្តែ គាត់​បាន​បែង​ចែក​ការងារ​អស់​ហើយ ដូច្នេះ​ទង្វើ​អ្វី​ផ្សេងៗ មិន​ទាក់ទង​នឹង​គាត់​ទេ។

លោក​មេធាវី​អះអាង​ថា របាយការណ៍​របស់​លោក ម៉ឹក ដារ៉ា​បាន​ដាក់​ជូន​សាលា​ដំបូង​រួច​ហើយ ហើយ​បាន​ធ្វើ​ការ​ស៊ើប​អង្កេត​សាកសួរ​ដេញ​ដោល​ទៅ​លើ​ជន​សង្ស័យ​ប៉ុន្មាន​នាក់​រួច​មក​ហើយ ហើយ​ចៅក្រម​ស៊ើប​បាន​សួរ​បន្ថែម​ទើប​ធ្វើ​ការ​ជំនុំ​ជម្រះ ហើយ​បាន​ចៅក្រម​ជំនុំ​ជម្រះ​ចេញ​ដីកា​សម្រេច។ ដូច្នេះ​វា​បាន​ឆ្លង​ដំណាក់​កាល​ច្រើន​ណាស់ ហើយ​បើ​មាន​បាតុភាព​ដូច​ការ​ចោទ​ប្រកាន់​ក៏​ត្រូវ​តែ​ព្រះរាជអាជ្ញា​ជា​អ្នក​ដឹក​នាំ​ការងារ​នោះ ក៏​ជា​អ្នក​ទទួល​ខុស​ត្រូវ​មួយ​ដែរ ហើយ​ត្រូវ​ធ្វើ​ការ​ដាក់​ពិន័យ​ដល់​មន្ត្រី​នគរបាល​យុត្តិធម៌​ដែរ ហេតុ​ដូច្នេះ លោក​សុំ​ឲ្យ​ប្រធាន​ក្រុម​ប្រឹក្សា​ជំនុំ​ជម្រះ​លើក​លែង​ការ​ចោទ​ប្រកាន់​លើ​កូនក្តី​របស់​លោក។

លោក ង៉ែត សារ៉ាត់ តំណាង​អយ្យការ​បាន​សន្និដ្ឋាន​ថា នៅ​ក្នុង​អង្គហេតុ​នេះ​ជនសង្ស័យ​បាន ឆ្លើយ​សារភាព​អស់​ហើយ ដោយ​យោង​ទៅ​លើ​ភស្តុតាង។ លោក​បន្ត​ថា បើ​ពិនិត្យ​ទៅ​លើ​បទ​ព្រហ្មទណ្ឌ​សមត្ថកិច្ច​ឬក៏​ការិយាល័យ​ប្រឆាំង​គ្រឿង​ញៀន​មិន​មាន​សិទ្ធិ​ក្នុង​ការ​សម្រេច​ឲ្យ​ជន​សង្ស័យ​ណា​ម្នាក់​មាន​សេរីភាព​ទេ មាន​តែ​ព្រះរាជអាជ្ញា​ប៉ុណ្ណោះ​មាន​សិទ្ធិ។ អ៊ីចឹង​បើ​សិន​ការ​សួរ​ចម្លើយ​ដំបូង​ដែល​ជនសង្ស័យ​ទទួល​សារភាព​ថា​ធ្វើ​ខុស​ហើយ​នោះ​មិន​អាច​នឹង​រើក​កាយ​ឡើង​វិញ​ទេ ហេតុ​ដូច្នេះ​លោក​សុំ​ឲ្យ​អង្គ​សវនាការ​តម្កល់​រឿង​ដូច​សាលា​ដំបូង​ខេត្ត​បន្ទាយមានជ័យ ចោទ​ប្រកាន់​និង​សុំ​រក្សា​ការ​ចោទ​ក្នុង​អង្គហេតុ​ដដែល។

លោក ហេ ជីវហេង មេធាវី​ការពារ​ក្តី​ឲ្យ​លោក ជា ឡេង បាន​ថ្លែងថា រាល់​ភស្តុតាង​ដែល​តំណាង​អយ្យការ​លើក​នៅ​ក្នុង​អង្គហេតុ​ទី​២១ នោះ​គ្មាន​សាក្សី​ណា​ឆ្លើយ​បញ្ជាក់​ទេ។ លោក​បន្ត​ថា៖«រឿង​នេះ​បាន​បញ្ជូន​ទៅ​ព្រះរាជអាជ្ញា ទៅ​ចៅក្រម​ស៊ើប​អង្កេត ហើយ​បញ្ជូន​ទៅ​ចៅក្រម​ជំនុំ​ជម្រះ​ដូច្នេះ គ្មាន​ពាក់ព័ន្ធ​នឹង​លោក ជា ឡេង ថា គាត់​ដោះលែង​ដោយ​មិន​បាន​ប្រាប់​ថ្នាក់​លើ​ទេ ហើយ​តុលាការ​បាន​ចោទ​និង​បាន​ចេញ​សាលក្រម​សម្រេច​តាំង​ពី​ឆ្នាំ​២០០៧ រួច​ហើយ​ទើប​មក​ចាប់​កូន​ក្តី​លោក​នៅ​ឆ្នាំ​២០១១ ហើយ​បង្ក​សំណុំ​រឿង​ស៊ីសំណូក​កែ​បំបាត់​ភស្តុតាង ចោទ​ពីបទ​ឧក្រិដ្ឋ​យក​ទៅ​ដាក់​ពន្ធនាគារ​អស់​មួយ​ជីវិត​តើ​យុត្តិធម៌​ដែរ​ទេ សាលក្រម​សាលា​ដំបូង​នោះ? បើ​កូន​ក្តី​លោក​គ្រាន់​តែ​ទទួល​បាន​ដីកា​មួយ​សន្លឹក​នោះ។

លោក​សន្និដ្ឋាន​ថា ដូច្នេះ​លោក​ស្នើ​ឲ្យ​ប្រធាន​ក្រុម​ប្រឹក្សា​ជំនុំ​ជម្រះ​ពិនិត្យ​ឡើង​វិញ ខណៈ​ដែល​កូនក្តី​ក៏​មិន​សុខ​ចិត្ត​ដែរ​នោះ។

លោក ចាយ ចន្ទ​តារា​វណ្ណ ប្រធាន​ក្រុម​ប្រឹក្សា​ជំនុំ​ជម្រះ បាន​ប្រកាស​ថា សវនាការ​ទើប​តែ​ធ្វើ​ការ​សន្និដ្ឋាន​និង​ចោទសួរ​បកស្រាយ​បាន​៤​អង្គហេតុ​ក្នុង​អង្គហេតុ​២៥ ហើយ​សវនាការ​បញ្ចប់​នឹង​បន្ត​នៅ​ថ្ងៃ​ព្រហស្បតិ៍​នេះ៕

អត្ថបទគួរចាប់អារម្មណ៍