The Phnom Penh Post Search

Search form




Logo of Phnom Penh Post newspaper Phnom Penh Post - សាលា​ឧទ្ធរណ៍​សម្រេច​មិន​ធ្វើ​បត្យាប័ន​សេដ្ឋី​រុស្ស៊ី Polonsky

សាលា​ឧទ្ធរណ៍​សម្រេច​មិន​ធ្វើ​បត្យាប័ន​សេដ្ឋី​រុស្ស៊ី Polonsky

សាលា​ឧទ្ធរណ៍​សម្រេច​មិន​ធ្វើ​បត្យាប័ន​សេដ្ឋី​រុស្ស៊ី Polonsky

140114_09b
សេដ្ឋីរុស្ស៊ី Polonsky នៅក្នុងបន្ទប់សវនាការ សាលាឧទ្ធរណ៍ ហេង ជីវ័ន

ភ្នំពេញៈ សាលា​ឧទ្ធរណ៍​កម្ពុជា កាល​ពី​ម្សិលមិញ បាន​សម្រេច​ព្យួរ​ការ​ធ្វើ​បត្យាប័ន​មហា​សេដ្ឋី​រុស្ស៊ី​ឈ្មោះ Sergei Polonsky និង​បង្គាប់​ឲ្យ​ដោះលែង​ពី​ពន្ធនាគារ​ជា​បន្ទាន់។

លោក បែន សុនសម័យ ជា​មេធាវី​ការពារ​ក្ដី​សេដ្ឋី​រុស្ស៊ី​រូប​នេះ ប្រាប់​ឲ្យ​ដឹង​ថា ចៅក្រម​បាន​សម្រេច​មិន​ធ្វើ​បត្យាប័ន​លោកPolonsky បញ្ជូន​ទៅ​ទីក្រុង ម៉ូស្គូ វិញ​ទេ ហើយ​បាន​បង្គាប់​ឲ្យ​ដោះលែង​គាត់​ពី​ពន្ធនាគារ ប៉េហ្ស៊ី ប៉ុន្តែ គាត់​នៅ​តែ​ប្រឈម​នឹង​ការ​ចោទ​ប្រកាន់​នៅ​តុលាការ​ខេត្ត ព្រះ​សីហនុ នៅ​ឡើយ។

លោក​មេធាវី បែន សុនសម័យ បាន​ប្រាប់​ក្រុម​អ្នក​កាសែត​ថា៖ «គាត់​មិន​ត្រូវ​បាន​ធ្វើ​បត្យាប័ន​ទៅ រុស្ស៊ី នៅ​ពេល​នេះ​ទេ​ដូច្នេះ គាត់​នឹង​ស្ថិត​នៅ​ប្រទេស កម្ពុជា។ គាត់​នាំ​យក​ប្រាក់​រាប់​លាន​ដុល្លារ​មក​វិនិយោគ​នៅ​កម្ពុជា។ គាត់​មិន​បាន​ប្រព្រឹត្ត​បទ​ឧក្រិដ្ឋ​នៅ​កន្លែង​ណា​មួយ​ឡើយ​នៅ​ក្នុង​ពិភពលោក​នោះ​ទេ»។

លោក​មេធាវី​បាន​បញ្ជាក់​ថា៖ «គាត់​គឺជា​មនុស្ស​មាន​ចិត្ត​សប្បុរសធម៌​ខ្លាំង​ណាស់​គាត់​មិន​មែន​ជា​ឧក្រិដ្ឋជន​ទេ ហើយ​ខ្ញុំ​នឹង​រក​ភរិយា​កម្ពុជា​មួយ​រូប​សម្រាប់​រូប​គាត់»។

លោក Polonsky អាយុ ៤១ឆ្នាំ និង​មិត្តភក្តិ​គាត់​ពីរ​នាក់​ត្រូវ​សមត្ថកិច្ច​ឃាត់​ខ្លួន​កាល​ពី​ដើម​ឆ្នាំ​មុន​ហើយ​ត្រូវ​បាន​ដោះលែង​ឲ្យ​នៅ​ក្រៅ​ឃុំ​បន្ទាប់​ពី​បាន​ជាប់​ពន្ធនាគារ​រយៈ​ពេល​ពីរ​ខែ ពី​បទ​យក​កាំបិត​គំរាម អ្នក​ដើរ​កាណូត ៦នាក់ ឲ្យ​លោត​ចូល​ក្នុង​ទឹក​សមុទ្រ។

លោក Polonsky ជា​ម្ចាស់​កោះ ដែក​គោល ត្រូវ​បាន​ចាប់​ខ្លួន​បន្ទាប់​ពី​មាន​ដីកា​ពី​អាជ្ញាធរ ប្រទេស រុស្ស៊ី ឲ្យ​ធ្វើ​បត្យាប័ន​ដែល​ពេល​នោះ​ក្រុម​មេធាវី​ការពារ​ក្ដី​បាន​ចាត់​ទុក​ថា ជា​ការ​កាច់​កុង​គ្នា​ដោយ​សារ​តែ​ផល​ប្រយោជន៍​ពាណិជ្ជកម្ម​នៅ​ក្នុង​ទីក្រុង ម៉ូស្គូ។

ទាំង​ចៅក្រម លោក សេង ស៊ីវុត្ថា និង​ព្រះ​រាជអាជ្ញា​លោក ហ៊ាន រិទ្ធ បាន​បដិសេធ​មិន​ធ្វើ​អធិប្បាយ​ជុំវិញ​ការ​សម្រេច​របស់​ខ្លួន​ដោយ​សំអាង​ថា វា​ជា​សវនា​ការ​សម្ងាត់។

លោក Polonsky បាន​រង​ការ​ចោទ​ប្រកាន់​នៅ​ទីក្រុង ម៉ូស្គូ ថា បាន​កិប​កេង​ប្រាក់​ចំនួន ១៧៦ លាន​ដុល្លារ​ពី​ដៃគូ​ពាណិជ្ជកម្ម​របស់​លោក​ហើយ​ឈ្មោះ​លោក​ត្រូវ​បាន​ដាក់​ទៅ​ក្នុង​បញ្ជី​ក្រហម​របស់​ប៉ូលិស​អន្តរជាតិ។

ក្នុង​សម្លៀក​បំពាក់​អាវ​ធំ​និង​ជិះ​រថយន្ត​ម៉ាក Escalade លោក Polonsky ដើរ​ក្នុង​ទឹក​មុខ​ញញឹម​ចូល​ទៅ​ក្នុង​បន្ទប់​តុលាការ​ដើម្បី​ស្ដាប់​ការ​ប្រកាស​សេចក្តី​សម្រេច​របស់​តុលាការ​ហើយ​បាន​ដើរ​ចេញ​មក​វិញ​បន្ទាប់​ពី​ការ​ប្រកាស​សាលដីកា​បញ្ចប់​ដែល​មាន​រយៈ​ពេល ១០ នាទី។

នៅ​ខាង​ក្រៅ​បន្ទប់​សវនាការ​លោក Polonsky បាន​និយាយ​ថា៖ «ខ្ញុំ​ចង់​ចាប់​ផ្ដើម​គម្រោង​នៅ​កម្ពុជា ដោយ​មាន​គម្រោង​អភិវឌ្ឍ​ធំៗ នៅ​លើ​កោះ​មួយ​ចំនួន​ដែល​មាន​ទឹក​ប្រាក់​រាប់​លាន​ដុល្លារ ហើយ​ខ្ញុំ​ចង់​ស្នាក់នៅ​ប្រទេស​កម្ពុជា»។

លោក Polonsky ត្រូវ​បាន​គេ​ស្គាល់​ថា បាន​វិនិយោគិន​បរទេស​ដែល​បណ្ដាក់​ទុន​មាន​ទឹក​ប្រាក់​មួយ​ពាន់​លាន​ដុល្លារ​ដើម្បី​អភិវឌ្ឍ​ដែន​កោះ​ចំនួន ៨ នៅ​ក្នុង​ខេត្ត ព្រះ​សីហនុ។

លោក បែន សុនសម័យ បាន​ថ្លែង​ថា ទោះ​ជា​កូន​ក្ដី​លោក​ជា​អតីត​ពាណិជ្ជករ​អចលន​ទ្រព្យ នៅ​ប្រឈម​នឹង​ករណី​នៅ​ឯ​តុលាការ​ខេត្ត ព្រះ​សីហនុ ក៏​ដោយ ប៉ុន្តែ តាម​ផ្លូវ​ច្បាប់​ការ​ផ្តន្ទាទោស​នឹង​មិន​ធ្ងន់​ធ្ងរ​នោះ​ទេ​ដោយ​សារ​ថា វា​ត្រឹម​ជា​បទ​ល្មើស​ថ្នាក់​មជ្ឈិម។

លោក​បន្ថែម​ថា៖ «គាត់​នៅ​រង់​ចាំ​សវនាការ​នៅ​តុលាការ​ខេត្ត ព្រះ​សីហនុ ប៉ុន្តែ ជា​បទ​ឧក្រិដ្ឋ​កម្រិត​ស្រាល​មិន​មែន​បទ​ឧក្រិដ្ឋ​កម្រិត​ធ្ងន់​ធ្ងរ​ទេ»។

ចៅក្រម​សាលា​ដំបូង​ខេត្ត ព្រះ​សីហនុ លោក ស្វាយ តុញ ដែល​កាន់​សំណុំ​រឿង​នេះ​ថ្លែង​ថា លោក​មិន​ទាន់​បាន​កំណត់​ថ្ងៃ​បើក​សវនាការ​ករណី​លោក Polonsky នៅ​ឡើយ​ទេ ព្រោះ​លោក​ទើប​តែ​បាន​ទទួល​សំណុំ​រឿង​នេះ៕ PN

អត្ថបទគួរចាប់អារម្មណ៍