.jpg)
សិលាចារឹកមួយផ្ទាំង ដែលត្រូវបានកសាងឡើងនៅក្នុងរាជ្ជកាលរបស់ ព្រះបាទជ័យវរ្ម័នទី ៤ នាអំឡុងគ្រិស្តសករាជឆ្នាំ ៩២៤-៩៤១។ សហការី
ស្វាយរៀងៈ សិលាចារឹកមួយផ្ទាំង ដែលត្រូវបានកសាងឡើងនៅក្នុងរាជ្ជកាលរបស់ ព្រះបាទជ័យវរ្ម័នទី ៤ នាអំឡុងគ្រិស្តសករាជឆ្នាំ ៩២៤-៩៤១ ដែលមានអាយុកាលជាង ១ ០០០ ឆ្នាំ មកហើយនោះ ត្រូវបានមន្ទីរវប្បធម៌ និងវិចិត្រសិល្បៈខេត្តស្វាយរៀងនាំយកពីវត្តអារាមក្នុងតំបន់ដាច់ស្រយាលមួយ មករក្សាទុកក្នុងសារមន្ទីរវប្បធម៌ខេត្ត ដើម្បីសុវត្ថិភាព។
លោក ពុត សុផានី អនុប្រធានមន្ទីរវប្បធម៌ និងវិចិត្រសិល្បៈខេត្តស្វាយរៀង បានប្រាប់ភ្នំពេញប៉ុស្តិ៍កាលពីថ្ងៃអង្គារថា ផ្ទាំងសិលាចារឹកនោះ ត្រូវបានស្ត្រីម្នាក់ ដែលមានស្រុកកំណើតនៅឃុំប្រសូត្រ ស្រុកស្វាយទាប ប្រគល់ជូនអតីតព្រះចៅអធិការវត្តពោធិមុនី ដែលមានទីតាំងស្ថិតនៅក្នុងភូមិ-ឃុំ ស្វាយចេក ខេត្តស្វាយរៀង កាលពីអំឡុងឆ្នាំ ២០១១ ដើម្បីរក្សាទុក ដោយគិតថា ផ្ទាំងសិលាចារឹកនោះ ជា «វត្ថុស័ក្តិសិទ្ធិ និងមានបារមីកាន់»។
លោកបញ្ជាក់ថា៖ «កន្លងមកគ្មាននរណាម្នាក់ដឹងថា ផ្ទាំងសិលាចារឹកនោះ មានអាយុកាលពាន់ឆ្នាំបែបនេះទេ ដោយគ្មាននរណាម្នាក់អាចអាន និង ប្រែសម្រួលភាសា ដែលត្រូវបានគេសរសេរលើផ្ទាំងសិលានោះឡើយ ហើយវាត្រូវបានអតីតព្រះចៅអធិការវត្តព្រះនាម កើត សុភី ទុកវាចោលនៅហាលភ្លៀង ហាលខ្យល់ ក្បែរខ្ទមអ្នកតាមួយនៅក្នុងវត្ត»។
លោក សុផានី បន្តថា កាលពីពេលថ្មីៗនេះ ក្រុមអ្នកស្រាវជ្រាវពីសិលាចារឹក នៃរាជបណ្ឌិត្យសភាកម្ពុជា បានចុះទៅពិនិត្យ និងសិក្សាស្រាវជ្រាវដោយផ្ទាល់ពីផ្ទាំងសិលាចារឹកនេះ ហើយបានប្រកាសលទ្ធផលនៃការស្រាវជ្រាវរបស់ខ្លួន កាលពីថ្ងៃចន្ទថា វាមានអាយុកាលជាង ១ ០០០ ឆ្នាំ និងជំរុញឲ្យខាងក្រសួងវប្បធម៌ និងវិចិត្រសិល្បៈ រៀបចំចងក្រងឯកសារនិងស្នើសុំយកសិលាចារឹកនោះ មករក្សាទុកក្នុងសារមន្ទីរជាតិ សម្រាប់ជាការសិក្សាស្រាវជ្រាវបន្តទៀតនោះ ទើបខាងមន្ទីររបស់លោក នាំយកផ្ទាំងសិលាចារឹកនោះទៅរក្សាទុកជាបណ្ដោះអាសន្ននៅសារមន្ទីរវប្បម៌ខេត្តស្វាយរៀង។
លោក មាឃ បូរ៉ា ប្រធានផ្នែកសិលាចារឹកវិទ្យានៃវិទ្យាស្ថានភាសាជាតិ នៃរាជបណ្ឌិត្យសភាកម្ពុជា កាលពីម្សិលមិញបានអំពាវនាវផងដែរថា ក្នុងករណីប្រទះឃើញផ្ទាំងសិលា ដែលមានសរសេរជាអក្សរបុរាណ សូមជួយរក្សាទុកឲ្យបានត្រឹមត្រូវ ឬផ្ដល់ជូនទៅខាងមន្ត្រីជំនាញ ដើម្បីធ្វើការសិក្សាស្រាវជ្រាវ៕
