.jpg)
យុវជន សុំ រស្មី រៀននៅវិទ្យាល័យស្ទឹងសែនបាត់ឈ្មោះពីការប្រឡងបាក់ឌុបឆ្នាំនេះ។ រូបថត ហ្វេសប៊ុក
កំពង់ធំៈ ក្រសួងអប់រំបានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះដំណើរការទៅល្អប្រសើរជាងឆ្នាំមុន បើទោះបីជាមានបេក្ខជនរហូតដល់ ១៨៩៩ នាក់បានអវត្តមានពីការប្រឡង និងយុវជនម្នាក់នៅខេត្ដកំពង់ធំដែលបាត់ឈ្មោះមិនបានប្រឡងនៅមិនទាន់ទទួលបានដំណោះស្រាយក៏ដោយ។
លោក រស់ សាលីន អ្នកនាំពាក្យក្រសួងអប់រំ យុវជន និងកីឡា បានឲ្យដឹងតាមសារតេឡេក្រាមកាលពីម្សិលមិញថា៖ «ដំណើរការសំណេរទាំង ២ ថ្ងៃ មានភាពល្អប្រសើរជាងឆ្នាំកន្លងទៅ គណៈមេប្រយោគគ្រប់លំដាប់ថ្នាក់មានការទទួលខុសត្រូវខ្ពស់លើភារកិច្ច ទោះបីបណ្ដាខេត្ដមួយចំនួនធ្លាក់ភ្លៀងខ្លាំងក៏ដោយ»។
លោកបន្ថែមថាការប្រឡងរយៈពេល ២ ថ្ងៃនេះ បេក្ខជនអវត្ដមានសរុបមានចំនួន ១៨៩៩ នាក់ ស្រី ៧៤៤ នាក់នៃចំនួនបេក្ខជនចុះឈ្មោះប្រឡងសរុប។
លោកបញ្ជាក់៖ «បេក្ខជនគោរពបទប្បញ្ញត្ដិនៃការប្រឡងបានយ៉ាងល្អ ស្ទើរតែមិនមាននាំជាប់ខ្លួននូវសំណៅឯកសារ និងឧបករណ៍ហាមឃាត់ទាល់តែសោះ»។ លោកបង្ហាញថាប្រឡងឆ្នាំនេះបេក្ខជនប្រព្រឹត្ដកំហុសឆ្គងមាន ៧ ករណីក្នុងនោះដកហូតទូរស័ព្ទ ៥ ករណី និងនាំសំណៅចូល ២ ករណី។
លោក សាលីន បញ្ជាក់ថា៖ «បេក្ខជនមានបញ្ហាសុខភាពធ្ងន់ធ្ងរមានចំនួន ៦៤ ករណី តែបន្ទាប់ពីបានការសង្គ្រោះបឋមអាចបន្ដការប្រឡងទៀតបាន លើកលែងតែ ៥ ករណីត្រូវបញ្ជូនទៅព្យាបាលនៅមន្ទីរពេទ្យមិនអាចត្រឡប់មកប្រឡងវិញបាន»។
យុវជន សុំ រស្មី ជាសិស្សនៃវិទ្យាល័យស្ទឹងសែនក្នុងខេត្ដកំពង់ធំដែលត្រូវប្រឡងបានបាត់ឈ្មោះប្រឡង ដោយសារតែសាលាលុបឈ្មោះច្រឡំហើយគិតមកដល់ថ្ងៃម្សិលមិញនៅមិនទាន់មានដំណោះស្រាយ ឬវិធានការណាមួយនៅឡើយទេ។ នេះបើតាមលោក សឿង ភា ឪពុក យុវជនរូបនេះបានឲ្យដឹងពីម្សិលមិញ។
លោក សឿង ភា បច្ចុប្បន្នជានាយប៉ុស្តិ៍រដ្ឋបាល ឃុំ ប្រាសាទ ស្រុកសន្ទុកបានថ្លែងថា កូនលោកបានទៅរៀនទៀងទាត់ សូម្បីគ្រូ និងនាយកសាលាក៏ទទួលស្គាល់ដែរ ប៉ុន្ដែព្រោះតែបច្ចេកទេសរបស់សាលាដែលបានលុបឈ្មោះកូនលោកខុសធ្វើឲ្យគាត់អត់មានឈ្មោះប្រឡងនឹងគេ។
លោកបន្ដថា៖ «កាលពីថ្ងៃទី ១៩ ជាថ្ងៃមើលឈ្មោះប្រឡងពេលដឹងថាកូនខ្ញុំអត់ឈ្មោះខាងនាយកសាលា គាត់បានមកប្រាប់ខ្ញុំថា ពួកគាត់បានលុបឈ្មោះកូនខ្ញុំខុស ហើយគាត់បានសូមទោសខ្ញុំ ចំពោះរឿងនេះដែរ ប៉ុន្ដែខ្ញុំចង់ឲ្យខាងសាលា និងក្រសួងអប់រំមានវិធានការណាមួយដើម្បីជួយឲ្យកូនខ្ញុំបានប្រឡងនឹងគេ តែមកដល់ពេលនេះស្ងាត់ឈឹងមិនមានដំណោះស្រាយអ្វីទាល់តែសោះ»។
លោក សឿង ភា បានសំណូមពរស្នើសុំអន្តរាគមន៍ពីលោក ហង់ ជួនណារ៉ុន រដ្ឋមន្ត្រីក្រសួងអប់រំជួយឲ្យកូនប្រុសរបស់លោកធ្វើយ៉ាងណាឲ្យមានឈ្មោះប្រឡងនឹងគេផង ឬក៏រកវិធានការយ៉ាងណាក៏បានកុំឲ្យស្ងាត់ឈឹងបែបនេះ។
លោក យិន ប៊ុនហ៊ួត ប្រធានការិយាល័យអប់រំក្រុងស្ទឹងសែនបានឲ្យដឹងថា លោកបានទទួលព័ត៌មានចំពោះការបាត់ឈ្មោះយុវជន សុំ រស្មី នេះដែរ ប៉ុន្ដែលោកមិនដឹងត្រូវមានវិធានការបែបណាទេ ព្រោះមិនទាន់មានព័ត៌មានលម្អិត។
លោក ធន ធុង នាយករងវិទ្យាល័យស្ទឹងសែនបានឲ្យដឹងថា កំហុសបាត់ឈ្មោះនេះជាកំហុសអចេតនាដោយសារបច្ចេកទេសនៃអ្នកកាត់ឈ្មោះសិស្សមុនពេលប្រឡងបាក់ឌុប។
លោកបានបន្ដថា៖ «ការបាត់ឈ្មោះនេះកើតឡើងព្រោះបច្ចេកទេសលុបឈ្មោះច្រឡំ ដោយសារតែសិស្សនេះបានដូរថ្នាក់រៀន អ៊ីចឹងមានឈ្មោះ ២ នៅសាលាដល់ពេលកាត់ឈ្មោះលុបចេញនៅតាមថ្នាក់ ក៏មានការច្រឡំទៅ»។
លោក រស់ សាលីន មិនបានឆ្លើយតបចំពោះសំណើសុំអធិប្បាយពីបញ្ហាលុបឈ្មោះសិស្សពីការប្រឡងនេះទេកាលពីម្សិលមិញ៕
