បាត់ដំបង/បន្ទាយមានជ័យៈ សិស្សរាប់ម៉ឺននាក់នៅក្នុងខេត្តបាត់ដំបងខកខានមិនបានសិក្សា និងអ្នកជាប់ពន្ធនាគារជាង ១ ពាន់នាក់នៅក្នុងខេត្តបន្ទាយមានជ័យត្រូវបានជម្លៀសចេញ និងកំពុងរកទីតាំងជម្លៀសចេញ ព្រោះតែរងគ្រោះដោយសារជំនន់ទឹកភ្លៀងដែលចាប់ផ្ដើមតាំងពីដើមខែតុលា ប៉ះពាល់ទាំងអស់ចំនួន ១៥ ខេត្តនៅទូទាំងប្រទេស។
លោក យី សុងគី ប្រធានមន្ទីរអប់រំយុវជន និងកីឡាខេត្តបាត់ដំបង បានឱ្យដឹងថា គិតត្រឹមរសៀលថ្ងៃអង្គារ ម្សិលមិញនេះជំនន់ទឹកភ្លៀងបានបង្កផលប៉ះពាល់សាលារៀនចំនួន ៣១៦ សាលាទូទាំងខេត្តដោយក្នុងនោះមានសាលារៀនជាង ២០០ បានផ្អាកការសិក្សាបណ្តោះអាសន្ន ព្រោះតែទឹកលិចសាលារៀនក្នុងជម្រៅជ្រៅ ដែលមិនអាចឱ្យសិស្សានុសិស្សបន្តការសិក្សាបាន។
លោក សុងគី ថ្លែងថា៖ «តាមការប្រមាណរបស់ខ្ញុំ សិស្សមិនអាចសិក្សាបានចូលខ្ទង់ម៉ឺននាក់ហើយ ហើយភាគច្រើនប៉ះពាល់សាលាបឋមសិក្សាទេ ព្រោះសាលាបឋមសិក្សានៅតាមភូមិ កន្លែងឆ្ងាយៗ។ ចំណែកវិទ្យាល័យមានប៉ះពាល់ដែរ តែមិនច្រើនទេ ព្រោះវាភាគច្រើននៅទីប្រជុំជននៅកន្លែងខ្ពស់ៗ»។
លោក យី សុងគី បានអះអាងថា ជំនន់ទឹកភ្លៀងនឹងមិនធ្វើឱ្យប៉ះពាល់ដល់ការសិក្សារបស់សិស្សថ្នាក់ទី ៩ និងទី ១២ ដែលគ្រោងនឹងប្រឡងបញ្ចប់ឆ្នាំនៅខែធ្នូខាងមុខនេះនោះទេ។ យ៉ាងណាក៏ដោយស្ថានភាពទឹកនៅនឹងកាលពីថ្ងៃទី ១៣ តុលា ហើយក៏មិនទាន់ប៉ះពាល់ដល់សាលារៀនថែមទៀតដែរ។
លោកបញ្ជាក់ថា៖ «កន្លែងខ្លះក៏មានការគោកទឹកវិញប្រហែលជា ៤ ទៅ ៥ សាលា (ដែរ)។ ប្រសិនជាភ្លៀងមិនមានការបន្តធ្លាក់ទៀតទេ គឺសាលាយើងអាចគោកលឿន ហើយសិស្សានុសិស្សយើងនឹងបានត្រឡប់ចូលសាលាវិញលឿន»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានប្រាប់ភ្នំពេញប៉ុស្តិ៍កាលពីថ្ងៃអង្គារថា សាលារៀនមួយចំនួនតូចនៅតាមបណ្ដាខេត្តដែលបានលិចដោយសារទឹកភ្លៀងនោះត្រូវបានបិទទ្វារ និងផ្អាកការសិក្សាជាបណ្តោះអាសន្ន។ ខណៈមន្ត្រីនៃក្រសួងអប់រំ កំពុងបន្តកិច្ចសហប្រតិបត្តិការជាមួយភាគីពាក់ព័ន្ធទាំងអស់ដើម្បីរក្សាសុវត្ថិភាព។
លោក សុវាចា បានថ្លែងថា៖ «ក្រសួងបានធ្វើកិច្ចសហការជាមួយអាជ្ញាធរមូលដ្ឋានផ្ទាល់ ដើម្បីត្រៀមលក្ខណៈក្នុងកត្តាចាំបាច់ ដើម្បីជួយដល់ពួកគាត់ តាមទិដ្ឋភាពជាក់ស្តែង។ ក្រសួងបន្តស្វាគមន៍កិច្ចសហការពីគ្រប់ភាគីពាក់ព័ន្ធ។ យើងសូមអំពាវនាវដល់សិស្សានុសិស្ស និងលោកគ្រូ អ្នកគ្រូ បុគ្គលិកអប់រំ មេត្តាបង្កើនការប្រុងប្រយ័ត្ននាពេលរដូវភ្លៀងនេះ ដើម្បីបន្តថែទាំសុខភាព និងបន្តអនុវត្តវិធានការសុវត្ថិភាពសុខភាពទាំងអស់គ្នា»។
លោកក៏បានអះអាងផងដែរថា បញ្ហាគ្រោះទឹកជំនន់នេះគឺមិនបណ្តាលឱ្យមានការប៉ះពាល់ដល់ការសិក្សារបស់សិស្សថ្នាក់ទី ៩ និងថ្នាក់ទី ១២ ដែលនឹងត្រូវត្រៀមប្រឡងនាពេលខាងមុខនេះទេ ខណៈផលប៉ះពាល់នេះ គឺប៉ះពាល់សាលារៀននៅកម្រិតបឋមសិក្សាប៉ុណ្ណោះ។
គណៈកម្មាធិការគ្រប់គ្រងគ្រោះមហន្តរាយបានឱ្យដឹងនៅក្នុងរបាយការណ៍សរុបនៃផលប៉ះពាល់ដោយសារជំនន់ទឹកភ្លៀងនេះបានឱ្យដឹងថា សាលារៀននៅខេត្តបាត់ដំបងរងផលប៉ះពាល់ធ្ងន់ធ្ងរជាងគេ ចំណែកខេត្តដទៃទៀតប៉ះពាល់បន្តិចបន្តួចដូចជាខេត្តបន្ទាយមានជ័យ ខេត្តតាកែវ ខេត្តស្ទឹងត្រែង ខេត្តប៉ៃលិន និងខេត្តសៀមរាប។
លោក អ៊ុង ស៊ីផាន ប្រធានពន្ធនាគារខេត្តបន្ទាយមានជ័យបានប្រាប់ភ្នំពេញប៉ុស្តិ៍នៅថ្ងៃអង្គារថា ស្ថានភាពទឹកជំនន់ក៏បានប៉ះពាល់ពន្ធនាគារនៅក្នុងខេត្តនេះដែរក្នុងជម្រៅ ១៥ សង់ទីម៉ែត្រដែលមិនអាចស្នាក់នៅបាន និងតម្រូវចាំបាច់ត្រូវជម្លៀសពួកគេចេញទៅកាន់ពន្ធនាគារខេត្តផ្សេងទៀតដែលនៅជាប់ព្រំប្រទល់ខេត្តបន្ទាយមានជ័យ និងដែលមិនរងការវាយប្រហារដោយទឹកជំនន់។
លោក ស៊ីផាន បានបញ្ជាក់ថា៖ «គិតត្រឹមម៉ោង ២:៣០ នាទីរសៀលថ្ងៃអង្គារ [ម្សិលមិញ] នេះអ្នកទោស ៨១១ នាក់ ក្នុងចំណោមអ្នកទោសសរុប ១ ៦១២ នាក់ ត្រូវបានសមត្ថកិច្ចយើង ជម្លៀសចេញទៅកាន់ពន្ធនាគារខេត្តសៀមរាប។ ចំណែកអ្នកទោសនៅសល់ សមត្ថកិច្ចយើងកំពុងទាក់ទងពន្ធនាគារខេត្តមួយចំនួនទៀត ដើម្បីនាំពួកគេទៅដាក់ផ្ញើជាបណ្ដោះអាសន្ន ដើម្បីការពារសុវត្ថិភាព»។
ក្រៅពីប៉ះពាល់ដល់អ្នកជាប់ឃុំនៅក្នុងពន្ធនាគារនៅក្នុងខេត្តនេះក៏បានបណ្ដាលឱ្យមានមនុស្សស្លាប់ និងជម្លៀសខ្លួនទៅកាន់ទីទួលសុវត្ថិភាពរួមទាំងប៉ះពាល់ដំណាំ និងហេដ្ឋារចនាសម្ព័ន្ធផងដែរ។
លោក លី សារី អភិបាលរងខេត្ត និងអ្នកនាំពាក្យសាលាខេត្តបន្ទាយមានជ័យ បានប្រាប់ភ្នំពេញប៉ុស្តិ៍ថា ជំនន់នៅក្នុងខេត្តនេះបានបង្កឱ្យមនុស្ស ៥ នាក់ស្លាប់ និងជាង ១ ៣០០ នាក់ទៀតក្នុងចំណោមមនុស្ស ១៣ ២៧៦ នាក់ត្រូវបានជម្លៀសចេញទៅកាន់ទីទួលសុវត្ថិភាព ដោយសារតែផ្ទះរបស់ពួកគេត្រូវបានលិចទាំងស្រុង។
ប៉ះពាល់ដំណាំស្រូវ ៥ ៨៤១ ហិកតា ដំឡូងមី ១ ៨៩៣ ហិកតា និងដំណាំរួមផ្សំ ៣៦៦ ហិកតា ព្រមទាំងធ្វើឱ្យប៉ះពាល់ហេដ្ឋារចនាសម្ព័ន្ធផ្លូវ ២០១ កន្លែងមានប្រវែងសរុបជាង ៧៩ គីឡូម៉ែត្រ និងលិចវត្តអារាម ២៣ កន្លែង សាលារៀន ២៥ កន្លែង និងមណ្ឌលសុខភាពចំនួន ៣ កន្លែងផងដែរ។
លោក សារី បានថ្លែងថា៖ «នៅពេលនេះទឹកកំពុងបន្តជន់លិចនៅក្នុងតំបន់មួយចំនួនទៀតរួមទាំងពន្ធនាគារក៏ត្រូវជន់លិចផងដែរ»។
ក្រសួងធនធានទឹក និងឧតុនិយមតាមការព្យាករឱ្យដឹងថា កម្ពុជាបន្តទទួលរងប្រព័ន្ធសម្ពាធទាបដែលបណ្តាលមកពីព្យុះទី ១៦ ឈ្មោះ ណាកា នៅលើសមុទ្រចិនខាងត្បូង និងព្យុះ សូដែល ដែលមានកម្លាំងខ្លាំងចាប់ពីថ្ងៃទី ១៤ ដល់ថ្ងៃទី ២០ តុលា។ កម្ពុជាស្ថិតក្រោមឥទ្ធិពលនេះនៅចន្លោះថ្ងៃទី ១៨ និង១៩ នឹងធ្វើឱ្យបណ្តាខេត្តនៅតំបន់វាលទំនាបកណ្តាលខេត្តជាប់ជួរភ្នំដងរែក និងខ្ពង់រាបឦសាន និងតំបន់មាត់សមុទ្រមានភ្លៀងធ្លាក់ពីតិចទៅបង្គួរ។
ក្រសួងធនធានទឹក និងឧតុនិយមបានអំពាវនាវសាជាថ្មីផងដែរទៅដល់សាធារណជននៅទូទាំងប្រទេសត្រូវបន្តការប្រុងប្រយ័ត្ន ចំពោះបាតុភូតផ្គររន្ទះ ខ្យល់កន្ត្រាក់ ជាពិសេសប្រជាពលរដ្ឋដែលរស់នៅទីទំនាប ក្បែរផ្លូវទឹកជាប់តំបន់ភ្នំ និងរលកដែលអាចកើតមាននៅក្នុងសមុទ្រ៕
វីដេអូ៖