The Phnom Penh Post Search

Search form




Logo of Phnom Penh Post newspaper Phnom Penh Post - សិស្ស​ធ្លាក់​ការ​ប្រឡង​មាន​ជម្រើស​តែ​មួយ​គឺ​ត្រូវ​រៀន​ថ្នាក់ ទី១២ ឡើង​វិញ

សិស្ស​ធ្លាក់​ការ​ប្រឡង​មាន​ជម្រើស​តែ​មួយ​គឺ​ត្រូវ​រៀន​ថ្នាក់ ទី១២ ឡើង​វិញ

សិស្ស​មើល​ឈ្មោះ​ប្រឡង​បាក់ឌុប​លើក​ទី​ពីរ​នៅ​វិទ្យាល័យ​ស៊ីសុវត្ថិ។
សិស្ស​មើល​ឈ្មោះ​ប្រឡង​បាក់ឌុប​លើក​ទី​ពីរ​នៅ​វិទ្យាល័យ​ស៊ីសុវត្ថិ។ ហេង ជីវ័ន

សិស្ស​ធ្លាក់​ការ​ប្រឡង​មាន​ជម្រើស​តែ​មួយ​គឺ​ត្រូវ​រៀន​ថ្នាក់ ទី១២ ឡើង​វិញ

ភ្នំពេញៈ ខណៈ​សាលា​រដ្ឋ​នានា​បាន​ចាប់​ផ្តើម​ចូល​រៀន​ឆ្នាំ​សិក្សា​ថ្មី ២០១៤-២០១៥ ក្នុង​សប្តាហ៍​នេះ សិស្ស​ថ្នាក់ ទី១២ ដែល​ធ្លាក់​ការ​ប្រឡង​មាន​ជម្រើស​តែ​មួយ​គត់​គឺ​ត្រូវ​រៀន​ថ្នាក់ ១២ ឡើង​វិញ ប្រសិន​បើ​ពួកគេ​ចង់​បាន​សញ្ញាបត្រ​បាក់ឌុប។

អត្រា​ប្រឡង​ធ្លាក់​ខ្ពស់​សម្រាប់​សិស្ស​ថ្នាក់ ទី១២ ឆ្នាំ​នេះ​គឺជា​ករណី​ពិសេស។

រដ្ឋ​មន្រ្តី​ក្រសួង​អប់រំ លោក ហង់ ជួនណារ៉ុន រំពឹង​ថា សិស្ស​ធ្លាក់​ការ​ប្រឡង​ថ្នាក់ ទី១២ ឆ្នាំ​នេះ​មាន​តែ ១០ ភាគរយ​ប៉ុណ្ណោះ​នឹង​ត្រឡប់​ទៅ​រៀន​ថ្នាក់ ទី១២ វិញ។ លោក​បាន​ថ្លែង​ថា៖ «ផ្អែក​តាម​បទ​ពិសោធ​ឆ្នាំ​មុន សិស្ស​តិច​ណាស់​ដែល​មក​រៀន​ត្រួត​ថ្នាក់»។

កាល​ឆ្នាំ​មុន សិស្ស ៨៧ ភាគរយ​បាន​ប្រឡង​ជាប់ ប៉ុន្តែ​តិច​ជាង ៤ ភាគរយ​ប៉ុណ្ណោះ​ដែល​មក​រៀន​ថ្នាក់ ទី១២ វិញ។ ឆ្នាំ​នេះ បើ​សូម្បី​តែ​អនុញ្ញាត​ឲ្យ​មាន​ការ​ប្រឡង​លើក​ទី​ពីរ ក៏​ចំនួន​ជាប់​នៅ​តែ​មាន​កម្រិត​ទាប។ ជា​សរុប សិស្ស​ប្រឡង​ជាប់​មាន​តែ ៣៣ ៩៩៧ នាក់​ប៉ុណ្ណោះ ឬ ៤០,៦ ភាគរយ​នៃ​ការ​ប្រឡង​ទាំង​ពីរ​លើក​នេះ។ បេក្ខជន​ជាង ៥៥ ០០០ នាក់​ទៀត​ឬ​ភាគ​ច្រើន​នៃ​សិស្ស​ប្រឡង​ឆ្នាំ​នេះ បាន​ធ្លាក់​ការ​ប្រឡង ហើយ​ឥឡូវ​នេះ​មិន​អាច​បន្ត​ទៅ​រៀន​ថ្នាក់​បរិញ្ញាបត្រ​នៅ​សាកល​វិទ្យាល័យ​បាន និង​ប្រឈម​មុខ​នឹង​ឱកាស​ការងារ​មាន​កម្រិត។

នៅ​ភ្នំពេញ ដែល​សិស្ស​មាន​លទ្ធភាព​រៀន​នៅ​សាលា​ឯកជន​ល្បីៗ​និង​សម្បូរ​កន្លែង​រៀន ហើយ​ដែល​ត្រូវ​បាន​រំពឹង​ថា ជាប់​ច្រើន គឺ​ជាប់​តែ ២៣៨៣ នាក់​ប៉ុណ្ណោះ​នៅ​ក្នុង​ការ​ប្រឡង​លើក ទី២។ នេះ​បើ​តាម​តួលេខ​របស់​រដ្ឋាភិបាល។

សិស្ស​ថ្នាក់ ទី១២ ម្នាក់​នៅ​ភ្នំពេញ​ដែល​និយាយ​ថា គាត់​មាន​ការ​អៀន​ខ្មាស​ណាស់ សុំ​មិន​ផ្តល់​ឈ្មោះ​បាន​ថ្លែង​ថា៖ «ខ្ញុំ​រន្ធត់​ណាស់​នៅ​ពេល​ខ្ញុំ​ឮ​ថា ខ្ញុំ​ធ្លាក់​ការ​ប្រឡង​លើក ទី២។ ឥឡូវ​នេះ ខ្ញុំ​បារម្ភ​អំពី​អនាគត​របស់​ខ្ញុំ»។

«វា​ពិបាក​រក​ការងារ​ណាស់​ប្រសិន​បើ​យើង​មិន​មាន​សញ្ញាបត្រ​ថ្នាក់ ទី១២»។

សិស្ស​មួយ​ចំនួន​ដែល​ធ្លាក់​បាន​និយាយ​ថា ពួក​គេ​មិន​ចង់​ប្រឡង​ទៀត​ទេ ហើយ​ចង់​ទៅ​រៀន​នៅ​សាកល​វិទ្យាល័យ​តែ​ម្តង​តាម​រយៈ​ថ្នាក់​បរិញ្ញាបត្រ​រង។ សិស្ស​ម្នាក់​នៅ​ភ្នំពេញ​ដែល​ប្រឡង​ធ្លាក់​បាន​ថ្លែង​ថា៖ «ខ្ញុំ​មិន​ចង់​ចំណាយ​ពេល​វេលា​ឥត​ប្រយោជន៍​ទេ។ ខ្ញុំ​មិន​ដឹង​ថា តើ​ខ្ញុំ​នឹង​អាច​ជាប់​ការ​ប្រឡង​ឆ្នាំ​ក្រោយ​ឬ​អត់​នោះ​ទេ?»។

ទោះ​យ៉ាង​ណា​ក្តី លោក ហង់ ជួនណារ៉ុន បាន​ថ្លែង​ថា៖ «ខ្ញុំ​មិន​លើក​ទឹក​ចិត្ត​ឲ្យ​សិស្ស​ដែល​ប្រឡង​ធ្លាក់​ទៅ​ចូល​រៀន​នៅ​សាកល​វិទ្យាល័យ​ទេ។ ពួក​គេ​គួរ​រៀន​ថ្នាក់ ទី១២ ឡើង​វិញ​ជា​ការ​ប្រសើរ ដើម្បី​ឲ្យ​ខ្លួន​អាច​មាន​សមត្ថភាព​គ្រប់​គ្រាន់»។

លោក ជិន ចាន់វាសនា នាយក​ប្រតិបត្តិ​នៃ​អង្គការ​ភាព​ជា​ដៃគូ​អប់រំ​បាន​ថ្លែង​ថា ប្រសិន​បើ​សិស្ស​ប្រឡង​ធ្លាក់ នៅ​តែ​អាច​ទៅ​រៀន​នៅ​សាកល​វិទ្យាល័យ​បាន នោះ​វា​នឹង​អាច​ប៉ះពាល់​ដល់​កិច្ច​ខិត​ខំ​ប្រឹង​ប្រែង​ក្នុង​ការ​ធ្វើ​កំណែ​ទម្រង់​របស់​ក្រសួង​អប់រំ។

លោក​ថ្លែង​បន្ត​ថា៖ «តើ​ធ្វើ​កំណែ​ទម្រង់​ការ​ប្រឡង​ធ្វើ​អ្វី ប្រសិន​បើ​សិស្ស​នៅ​តែ​អាច​ទៅ​រៀន​នៅ​សាកល​វិទ្យាល័យ​បាន? សិស្ស​ត្រូវ​តែ​រៀន​ត្រួត​ថ្នាក់​ឡើង​វិញ ឬ​មាន​ជម្រើស​ស្រដៀង​គ្នា​ប្រសិន​បើ​ចង់​ឲ្យ​គុណភាព​ប្រសើរ​ឡើង»៕

អត្ថបទគួរចាប់អារម្មណ៍