The Phnom Penh Post Search

Search form




Logo of Phnom Penh Post newspaper Phnom Penh Post - សុខហួរ ​ត្រៀម​តម្កល់​ ១០ ​លាន​រៀល​សុំ​ធានា​នៅ​ក្រៅ​ឃុំ

សុខហួរ ​ត្រៀម​តម្កល់​ ១០ ​លាន​រៀល​សុំ​ធានា​នៅ​ក្រៅ​ឃុំ

លោក ហុង សុខហួរ ត្រូវ​បាន​ឆ្មាំ​ពន្ធនាគារ​ព្រៃស​នាំ​ចូល​សាលា​ដំបូង​រាជធានី​កាលពី​ដើម​ខែ​មុន​។
លោក ហុង សុខហួរ ត្រូវ​បាន​ឆ្មាំ​ពន្ធនាគារ​ព្រៃស​នាំ​ចូល​សាលា​ដំបូង​រាជធានី​កាលពី​ដើម​ខែ​មុន​។ ហេង ជីវ័ន

សុខហួរ ​ត្រៀម​តម្កល់​ ១០ ​លាន​រៀល​សុំ​ធានា​នៅ​ក្រៅ​ឃុំ

ភ្នំពេញៈ មេធាវី​ការពារ​សិទ្ធិ​លោក ហុង សុខហួរ ដែល​ជា​សមាជិក​ព្រឹទ្ធសភា​គណបក្ស​ប្រឆាំង​បាន​បម្រុង​ប្រាក់​ ១០ លាន​រៀល​ដើម្បី​ដាក់​តម្កល់​ធានា​​ឲ្យ​កូនក្តី​របស់​ខ្លួន​​បាន​នៅ​ក្រៅ​ឃុំ​ស្រប​ពេល​ដែល​សាលា​ឧទ្ធរណ៍​គ្រោង​បើក​សវនាការ​លើ​ការ​ស្នើ​សុំ​នៅ​ក្រៅ​ឃុំ​នៅ​ព្រឹក​ថ្ងៃ​ពុធ​ស្អែក​។

ក្រោយពី​ទទួល​បាន​លិខិត​កោះ​អញ្ជើញ​ចូលរួម​សវនាការ​នៃ​ពាក្យ​ប្តឹង​សុំ​នៅ​ក្រៅ​ឃុំ​របស់​កូនក្តី​ខ្លួន​ដែល​គ្រោង​ធ្វើ​នៅ​វេលា​ម៉ោង ៨ ព្រឹក​ថ្ងៃ​ពុធ​​ស្អែក​នេះ​លោក​មេធាវី ជូង ជូងី បាន​ឲ្យ​ដឹង​ថា​ក្រុម​មេធាវី​បាន​សម្រេច​តាម​នីតិវិធី​តម្កល់​ប្រាក់​ចំនួន ១០ លាន​រៀល​ដែល​ប្រហែល​​នឹង ២៥០០ ដុល្លារ​ដើម្បី​ធានា​ដល់​កូនក្តី​ឲ្យ​បាន​នៅ​ក្រៅ​ឃុំ។

លោក​ថា៖ «រឿង​ថា​អាច​​ត្រូវ​ដោះលែង​ក្រៅ​ឃុំ​ឬ​អត់​នោះ​ខ្ញុំ​មិន​និយាយ​រឿង​សង្ឃឹម​ឬ​មិន​​សង្ឃឹម​ទេ​ក្នុង​នាម​​ជា​មេធាវី​គឺ​​យើង​ធ្វើ​ (ការងារ) តាម​បច្ចេកទេស និង​នីតិវិធី​តែ​ប៉ុណ្ណោះ​»។

ភ្នំពេញ​ប៉ុស្តិ៍​មិន​អាច​ទាក់ទង​ចៅក្រម​សាលាឧទ្ធរណ៍​លោកស្រី យ៉ិន សុគន្ធារី ដែល​បាន​ចេញ​លិខិត​កោះ​អញ្ជើញ​នេះ​បាន​ទេ​កាលពី​ម្សិលមិញ។

កាលពី​ថ្ងៃ​ទី​ ៧ ខែ​តុលា ឆ្នាំ​ ២០១៥ ក្រុម​ប្រឹក្សា​ជំនុំជម្រះ​សាលា​ដំបូង​រាជធានី​​បាន​សម្រេច​ពន្យារ​ពេល​សវនាការ​ជំនុំជម្រះ​រឿង​ក្តី​លោក ហុង សុខហួរ លើក​ទៅ​ពេល​ក្រោយ​ដោយ​មិន​​កំណត់​​ដែល​​ករណី​នេះ​ត្រូវ​បាន​ក្រុម​មេធាវី​ចាត់ទុក​ថា​ជា​ចេតនា​មួយ​មិន​ឲ្យ​លោក​បង្ហាញ​នូវ​នីតិវិធី​ដោះ​បន្ទុក​កូន​ក្តី។

បើ​តាម​លោក ជូង ជូងី ក្រុម​មេធាវី​មាន​​ភ័ស្តុតាង​ជាក់លាក់​ដែល​ទទួល​បាន​ពី​អ៊ីនធឺណិត​ដើម្បី​ដោះ​បន្ទុក និង​ជួយ​លោក​ ហុង សុខហួរ ឲ្យ​រួច​ផុត​ពី​ការ​ចោទប្រកាន់​ប៉ុន្តែ​លោក​បដិសេធ​បង្ហាញ​ពី​ភ័ស្តុតាង​មុន​សវនាការ​ដោយ​បារម្ភ​ថា​នឹង​មាន​ជន​ទុច្ចរិត​បំផ្លាញ​ភ័ស្តុតាង។

បច្ចុប្បន្ន​លោក ហុង សុខហួរ ត្រូវ​បាន​ឃុំ​ខ្លួន​បណ្តោះអាសន្ន​នៅ​ពន្ធនាគារ​ព្រៃស​ដោយ​រង​ការ​ចោទ​ប្រកាន់​បី​បទ​ល្មើស​រួមមាន ការ​ក្លែង​ឯកសារ​សាធារណៈ ការ​ប្រើប្រាស់​ឯកសារ​ក្លែង និង​បទ​ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​ពាក់ព័ន្ធ​នឹង​ការ​បកស្រាយ​សន្ធិសញ្ញា​ព្រំដែន​ កម្ពុជា-វៀតណាម ឆ្នាំ ១៩៧៩ ដែល​ត្រូវ​បាន​ដាក់​បង្ហោះ​នៅលើ​ទំព័រ​ហ្វេសប៊ុក​របស់​​លោក សម រង្ស៊ី ប្រធាន​គណបក្ស​សង្គ្រោះជាតិ​។

លោក ហុង សុខហួរ ត្រូវ​បាន​ចាប់​ខ្លួន​នៅ​ថ្ងៃ​ទី​ ១៥ ខែ​សីហា​ប៉ុន្មាន​ថ្ងៃ​បន្ទាប់ពី​លោក​នាយក​រដ្ឋមន្ត្រី ហ៊ុន សែន បាន​បញ្ជា​ឲ្យ​នគរបាល​តាម​ចាប់​ខ្លួន​ដោយ​ចោទ​ថា​ក្បត់​​ជាតិ​ចំពោះ​អ្វី​ដែល​លោក​ ហ៊ុន សែន ថា​បាន​ក្លែង​សន្ធិសញ្ញា​ព្រំដែន​កម្ពុជា វៀតណាម។ ប៉ុន្តែ​ករណី​នេះ​គណបក្ស​សង្គ្រោះ​ជាតិ និង​មជ្ឈដ្ឋាន​ជាច្រើន​ទៀត​បាន​ចាត់​ទុក​ថា​ជា​រឿង​នយោបាយ​ដើម្បី​ដាក់​សម្ពាធ​ទៅលើ​គណបក្ស​សង្គ្រោះជាតិ​ដែល​កំពុង​តែ​មាន​ភាព​សកម្ម​យ៉ាង​ខ្លាំង​ក្នុង​ការ​បើក​កកាយ​ពី​បញ្ហា​ការ​បោះ​បង្គោល​ព្រំដែន​កម្ពុជា​វៀតណាម​ដែល​តែងតែ​មាន​ភាព​រសើប​ខ្លាំង៕

អត្ថបទគួរចាប់អារម្មណ៍