ភ្នំពេញៈ លោក សុខ ឥសាន អ្នកនាំពាក្យគណបក្សប្រជាជនបានអះអាងថា លោក សម រង្ស៊ី បានលួចទាក់ទងសុំចរចាជាសម្ងាត់ជាមួយលោកនាយករដ្ឋមន្ត្រី ហ៊ុន សែន ដោយចង់ឲ្យមានការលើកលែងបម្រាមនយោបាយជាកញ្ចប់ចំពោះមន្ត្រីអតីតគណបក្សសង្គ្រោះជាតិចំនួន ១១៨ នាក់ជាអ្វីដែលលោកនាយករដ្ឋមន្ត្រីបដិសេធ។
ការលើកឡើងរបស់លោក សុខ ឥសាន ជាមួយនឹងការអំពាវនាវឲ្យសមត្ថកិច្ចចាត់វិធានការទប់ស្កាត់ និងបង្ក្រាបចំពោះអ្នកដែលបង្ហោះវីដេអូឃ្លីបគាំទ្រលោក សម រង្ស៊ី ជាប្រធានស្តីទីអតីតគណបក្សសង្គ្រោះជាតិនេះធ្វើឡើង ១ ថ្ងៃ បន្ទាប់ពីលោកនាយករដ្ឋមន្ត្រីបានប្រកាសថាច្បាប់ស្តីពីការផ្តល់សិទ្ធិឲ្យនាយករដ្ឋមន្ត្រីតាមសំណើរបស់រដ្ឋមន្ត្រីមហាផ្ទៃស្នើទៅព្រះមហាក្សត្រដើម្បីបើកផ្លូវដល់អ្នកនយោបាយដែលត្រូវបានតុលាការកំពូលហាមឃាត់សិទ្ធិធ្វើសកម្មភាពនយោបាយមានឱកាសធ្វើនយោបាយឡើងវិញធ្វើឡើងមិនសម្រាប់គណបក្សណាមួយនោះទេ ហើយថាអ្នកជាប់បម្រាមទាំងនោះមិនអាចធ្វើការស្នើសុំជាកញ្ចប់បានឡើយ ដោយពួកគេត្រូវស្នើសុំជាលក្ខណៈបុគ្គល។
លោក ហ៊ុន សែន ថ្លែងនៅក្នុងពេលជួបសំណេះសំណាលជាមួយកម្មករ-កម្មការិនី ក្នុងខេត្តកណ្តាលកាលពីថ្ងៃទី ២៦ ខែធ្នូថា៖ «ខ្ញុំសូមបញ្ជាក់សាជាថ្មី ចំពោះមនុស្សល្ងង់មួយចំនួនដែលមិនយល់ (ព្រោះ) ច្បាប់នេះគឺធ្វើតម្រូវសម្រាប់បណ្តាបក្សនយោបាយទាំងអស់ នៅពេលខាងមុខមិនមែនតម្រូវមនុស្ស ១ ក្រុមណានោះជាក់លាក់ទេ។ ពិតហើយមនុស្សមួយចំនួនដែលកំពុងជាប់បម្រាមនេះមិនមែនច្បាប់នេះចេញទៅ [ហើយពួកគេ] រួចខ្លួនជាស្វ័យប្រវត្តិទេ។ អ្នកឯងត្រូវធ្វើការសុំម្តងម្នាក់ មិនមែនសុំ ១ កញ្ចប់ទេ...សូមកុំភាន់ច្រឡំថា លើក ១ កញ្ចប់តែម្តងគឺអត់មានទេ គឺម្នាក់ម្តង តាមលក្ខណសម្បត្តិ។ ឥឡូវនេះយើងបើកច្រកហើយ អ្នកចង់ចេញក៏ចេញ ហើយអ្នកចង់ចូលក៏ចូលខ្ញុំអត់បង្ខំទេ»។
លោក ឥសាន បានសរសេរសារក្នុងបណ្តាញទំនាក់ទំនងតេឡេក្រាមកាលពីម្សិលមិញថា៖ «ឥឡូវច្បាស់លាស់ហើយ សម្តេចតេជោបានបញ្ជាក់ហើយថា អត់មានការផ្តល់នីតិសម្បទានយោបាយឲ្យមន្ត្រីជាប់បម្រាមធ្វើនយោបាយជាកញ្ចប់ជាដាច់ខាតគឺធ្វើម្នាក់ម្តងៗតាមលក្ខណសម្បត្តិរបស់ម្នាក់ៗ។ ការផ្តល់សិទ្ធិធ្វើនយោបាយឡើងវិញរបៀបនេះគឺជាការបំផ្លាញចោលឧបាយកលនៅចង់កាង និងត្រួតត្រាមន្ត្រី ១១៨ រូបតទៅទៀតរបស់ទណ្ឌិត សម រង្ស៊ី»។
ដោយលើកឡើងពីអតីតគណបក្សប្រឆាំងត្រូវបានតុលាការកំពូលរំលាយចោលតាំងពីថ្ងៃទី ១៦ ខែវិច្ឆិកាឆ្នាំ ២០១៧ លោក ឥសាន បានអំពាវនាវឲ្យសមត្ថកិច្ចគ្រប់ជាន់ថ្នាក់ធ្វើការទប់ស្កាត់ និងបង្ក្រាបចំពោះអ្នកបង្ហោះវីដេអូឃ្លីបគាំទ្រលោក សម រង្ស៊ី។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងប្រាប់ភ្នំពេញប៉ុស្តិ៍ថា អាជ្ញាធរបានចាត់វិធានការទប់ស្កាត់សកម្មភាពណាដែលបានរំលោភបំពានច្បាប់។
លោកបញ្ជាក់ថា៖ «តែថា ចាត់វិធានការកម្រិតណាពេលណា វាអាស្រ័យទៅលើសមត្ថកិច្ចធ្វើការពិចារណា និងរៀបចំការងារនេះតាមនីតិវិធីតាមផ្លូវច្បាប់។ ទង្វើរបស់គាត់ពាក់ព័ន្ធនឹងច្បាប់ យើងត្រូវហៅគាត់ទៅសាកសួរ តែយើងក៏មិនដាក់ទោសគាត់ដែរ។ យើងអប់រំគាត់ឲ្យគាត់យល់ ហើយគាត់ត្រូវធ្វើកិច្ចសន្យាមួយបញ្ជាក់ថា គាត់ឈប់ប្រព្រឹត្តអំពើដែលប៉ះពាល់នឹងច្បាប់តទៅទៀត»។
ទាំងលោក សម រង្ស៊ី និងមន្ត្រីអតីតគណបក្សសង្គ្រោះជាតិដែលកំពុងជាប់បម្រាមនយោបាយដូចជាលោក អេង ឆៃអ៊ាង លោកស្រី មូរ សុខហួរ លោក តុ វ៉ាន់ចាន់ និងលោក ម៉ៅ មុនីវណ្ណ មិនអាចទាក់ទងសុំការអធិប្បាយបានទេកាលពីម្សិលមិញ។
ប៉ុន្តែសកម្មជនមូលដ្ឋានរបស់អតីតគណបក្សសង្គ្រោះជាតិគឺកញ្ញា ស៊ិន ចាន់ពៅរ៉ូហ្សេត ដែលជាអតីតចៅសង្កាត់អូរចារក្នុងក្រុងបាត់ដំបងបានលើកឡើងថា សម្តីរបស់លោក សុខ ឥសាន មិនបានឆ្លុះបញ្ចាំងពីការពិតនោះទេ។
កញ្ញាបញ្ជាក់ដូច្នេះថា៖ «នេះគ្រាន់តែជាការលើកឡើងរបស់អ្នកនាំពាក្យបក្សកាន់អំណាចតែប៉ុណ្ណោះ ក៏ប៉ុន្តែផ្ទុយទៅវិញលោកប្រធានស្តីទីគណបក្សសង្គ្រោះជាតិបានបញ្ជាក់នៅលើហ្វេសប៊ុករបស់គាត់ហើយ គាត់នឹងមិនចរចាជាមួយគណបក្សកាន់អំណាចទេ តែឲ្យគណបក្សកាន់អំណាចទៅចរចាជាមួយអន្តរជាតិទៅ»។
ពាក់ព័ន្ធនឹងសមត្ថកិច្ចធ្វើការសាកសួរ និងឲ្យសកម្មជនអតីតគណបក្សសង្គ្រោះជាតិ ធ្វើកិច្ចសន្យាបញ្ឈប់ការបង្ហោះវីដេអូឃ្លីបគាំទ្រអតីតបក្សប្រឆាំង កញ្ញា ចាន់ ពៅរ៉ូហ្សេត ថ្លែងថាគឺជាការគំរាមកំហែងដល់សិទ្ធិសេរីភាពរបស់មន្ត្រីទាំងនោះ។
លោក ឱក សេរីសោភក្ដិ៍ អ្នកវិភាគបញ្ហាសង្គមបានបដិសេធធ្វើអធិប្បាយទាក់ទងនឹងការសុំចរចារបស់លោក សម រង្ស៊ី ជាមួយលោកនាយករដ្ឋមន្ត្រី ប៉ុន្តែលោកថាសកម្មជនអតីតបក្សប្រឆាំងដែលបានបង្ហោះវីដេអូឃ្លីបគាំទ្រមេដឹកនាំរបស់ខ្លួនមិនមែនជាការប្រព្រឹត្តខុសច្បាប់នោះទេ។
លោកបញ្ជាក់ថា៖ «អ្នកដែលធ្វើហ្នឹងសុទ្ធតែជាសកម្មជនរបស់អតីតបក្សសង្គ្រោះជាតិ ហើយវាមិនមានអ្វីដែលខុសច្បាប់នោះទេ ដោយសារនេះគឺជាសិទ្ធិសេរីភាពរបស់ពួកគាត់។ គាត់គ្រាន់តែនិយាយថា គាត់គាំទ្រនេះគឺជាសិទ្ធិរបស់គាត់»។
ប៉ុន្តែទោះយ៉ាងណាលោក សោភក្តិ៍ បានគូសបញ្ជាក់ថាសកម្មជនអតីតគណបក្សសង្គ្រោះជាតិ ពួកគេអាចបង្ហោះសារគាំទ្រលោក សម រង្ស៊ី បានតែពួកគេមិនអាចបង្ហោះសារគាំទ្រអតីតគណបក្សសង្គ្រោះជាតិបានទេ ដោយសារតែគណបក្សប្រឆាំងមួយនេះត្រូវបានតុលាការកំពូលសម្រេចរំលាយចោលរួចហើយ។
ក្នុងករណីបង្ហោះសារគាំទ្រលោក សម រង្ស៊ី ជាប្រធានស្តីទីអតីតគណបក្សសង្គ្រោះជាតិនេះលោក សុខ ឥសាន បានបកស្រាយថា ជារឿងខុសច្បាប់ព្រោះគណបក្សនេះត្រូវបានរំលាយតាមច្បាប់រួចមកហើយ ការគាំទ្រដល់ប្រធានស្តីទីគណបក្សដែលត្រូវរំលាយជារឿងខុសច្បាប់ដូចគ្នា។
ទោះជាដូច្នេះក៏ដោយគេមិនទាន់ឃើញមានការចាត់វិធានការតាមផ្លូវតុលាការលើអ្នកបង្ហោះសារគាំទ្រលោក សម រង្ស៊ី ជាប្រធានស្តីទីនៅឡើយគឺមានត្រឹមតែការអប់រំណែនាំប៉ុណ្ណោះ ដែលនេះត្រូវបានសកម្មជនអតីតគណបក្សសង្គ្រោះជាតិចាត់ទុកថាជាការគំរាមកំហែង៕