The Phnom Penh Post Search

Search form

Logo of Phnom Penh Post newspaper Phnom Penh Post - សុនឆ័យ ​ស្នើ​ឲ្យ​បង្ហាញ​កិច្ចព្រមព្រៀង​សម្បទាន​អាកាសយានដ្ឋាន




សុនឆ័យ ​ស្នើ​ឲ្យ​បង្ហាញ​កិច្ចព្រមព្រៀង​សម្បទាន​អាកាសយានដ្ឋាន

Content image - Phnom Penh Post
ឡាន​កំពុង​បើកចូលព្រលាន​យន្តហោះ​អន្តរជាតិ​ភ្នំពេញ កាល​ពី​ល្ងាច​ម្សិលមិញ នៅ​ចំ​ពី​មុខ​ការ​ដ្ឋាន​សំណង់​នៃ​ការ​ពង្រីក​ព្រលាន​មួយ​នេះ។ ម៉ៃ វីរៈ

សុនឆ័យ ​ស្នើ​ឲ្យ​បង្ហាញ​កិច្ចព្រមព្រៀង​សម្បទាន​អាកាសយានដ្ឋាន

ភ្នំពេញៈ លោក សុន ឆ័យ តំណាងរាស្រ្ត​គណបក្ស​ប្រឆាំង​បាន​ស្នើ​ឲ្យ​រដ្ឋាភិបាល​ចេញ​ផ្សាយ​នូវ​កិច្ចព្រមព្រៀង​សម្បទាន​របស់​ខ្លួន​ជាមួយ​នឹង​ក្រុមហ៊ុន​ដែល​​គ្រប់គ្រង​អាកាសយានដ្ឋាន​អន្តរជាតិ​ចំនួន​បី​របស់​កម្ពុជា​ដោយ​លើក​ឡើង​ថា​កម្ពុជា​​អាច​​​បាត់បង់​ប្រយោជន៍​ក្រោម​កិច្ចព្រមព្រៀង​នេះ​។

បន្ទាប់ពី​បាន​ចុះ​ទៅ​​អាកាសយានដ្ឋាន​អន្តរជាតិ​ភ្នំពេញ​កាល​ពី​ពីរ​សប្តាហ៍​មុន​ លោក សុន ឆ័យ នា​សប្តាហ៍​នេះ​បាន​សរសេរ​លិខិត​​មួយ​ច្បាប់​ជូន​លោក​ឧបនាយក​រដ្ឋមន្រ្តី សុខអាន ដោយ​បាន​ស្នើ​​ឲ្យ​ទីស្តីការ​គណៈរដ្ឋមន្ត្រី​បង្ហាញ​ពី​ព័ត៌មាន​លម្អិត​នៃ​កិច្ចព្រមព្រៀង​របស់​ខ្លួន​ជាមួយ​ក្រុមហ៊ុន​បារាំង Vinci-Airport ​ជា​ម្ចាស់​ភាគហ៊ុន​ចម្បង​ក្នុង​​ក្រុមហ៊ុន So cie'te' Concessionaire Des Ae'roports (SCA) ដែល​ធ្វើ​ប្រតិបត្តិ​អាកាសយានដ្ឋាន​នៅ​រាជធានី​ភ្នំពេញ ខេត្ត​សៀមរាប និង​ខេត្ត​ព្រះសីហនុ។

លិខិត​ដែល​បាន​ចុះ​ហត្ថលេខា​ដោយ​លោក ហេង សំរិន ប្រធាន​រដ្ឋសភា​កាលពី​ថ្ងៃ​អង្គារ​បាន​លើក​ឡើង​ពី​ «​ភាព​មិន​ប្រក្រតី» ដែល​អាច​មាន​ក្នុង​កិច្ចសន្យា​នេះ​លើក​ឡើង​ពី​ពាក្យបណ្តឹង​អំពី​ការ​គ្រប់គ្រង​តឹងរ៉ឹង ​និង​ការ​​កេងប្រវ័ញ្ច។

លោក​ ឆ័យ ​បាន​ឲ្យ​ដឹង​​កាលពី​ម្សិលមិញ​ថា លោក​ព្រួយ​បារម្ភ​ថា​ក្រុមហ៊ុន​ដែល​បច្ចុប្បន្ន​កំពុង​​បង្កើន​សមត្ថភាព​នៅ​​​អាកាសយានដ្ឋាន​អន្តរជាតិ​ភ្នំពេញ និង​សៀមរាប​ដោយ​ចំណាយ​ ១០០ លាន​ដុល្លារ កំពុង​ទទួល​បាន​ប្រាក់​ចំណេញ​ពី​​សម្បទាន​ច្រើន​ជាង​ប្រាក់​ដែល​ខ្លួន​បង់​តាមរយៈ​ការ​វិនិយោគ និង​ពន្ធ។

លោក​បាន​ប៉ាន់​ប្រមាណ​ផ្អែកលើ​តួលេខ​អ្នក​ធ្វើ​ដំណើរ​ដែល​កំពុង​កើនឡើង​ដែល​យោង​តាម​ក្រុមហ៊ុន Vinci គឺ​បាន​កើនឡើង ១២,៧ ភាគរយ​កាលពី​ឆ្នាំ​មុន​ដល់​ ៥,៧ លាន​នាក់ ក្រុមហ៊ុន​ SCA នឹង​រក​បាន​ប្រាក់​ច្រើន​ជាង ៤ ពាន់​លាន​ដុល្លារ​មុន​ពេល​កិច្ចព្រមព្រៀង​សម្បទាន​បាន​បញ្ចប់​នៅ​ឆ្នាំ​ ២០៤០ ​។

លោក ឆ័យ បាន​លើក​ឡើង​ថា៖ «ចំនួន​នេះ​គឺជា​ចំនួន​ភ្ញាក់ផ្អើល...អ្នក​ចំណាយ​ប្រាក់ ១០០ ​លាន​ដុល្លារ ហើយ​អ្នក​រក​បាន​ជាង​ ៤ ពាន់​លាន​ដុល្លារ​ក្នុង​រយៈពេល ២៥ ឆ្នាំ។ វា​ជា​រឿង​អស់​សំណើច... ​វា​មើល​ទៅ​ហាក់បី​ដូចជា​វា​កំពុង​ប្លន់​ប្រទេស​ជាតិ​។​

លោក​បន្ត​ថា​ ព័ត៌មាន​បន្ថែម​ត្រូវការ​ឲ្យ​មាន​ស្តីពី​ការ​ជួសជុល​បច្ចុប្បន្ន​​ និង​របៀប​ដែល​វា​ប៉ះពាល់​ដល់​​កិច្ចព្រមព្រៀង​សម្បទាន​។ «​កិច្ចព្រមព្រៀង​ត្រូវ​បាន​ធ្វើ​ឡើង​ដោយ​សម្ងាត់​​ដោយ​មិន​មាន​ការ​ដេញ​ថ្លៃ​។ នេះ​មិន​សមស្រប​ទេ​សម្រាប់​កិច្ចព្រមព្រៀង​ដ៏​ធំ​មួយ​របស់​រដ្ឋាភិបាល​​»។

ដោយ​ត្រូវ​បាន​ផ្តល់​ឲ្យ​នូវ​សម្បទាន​​ដើម្បី​អភិវឌ្ឍ​ និង​គ្រប់គ្រង​​អាកាសយានដ្ឋាន​អន្តរជាតិ​ភ្នំពេញ​ក្នុង​ឆ្នាំ​ ១៩៩៥ រដ្ឋលេខាធិការដ្ឋាន​អាកាសចរ​ស៊ីវិល​គឺ​ ៧០ ​ភាគរយ​ជា​កម្មសិទ្ធិ​របស់ Vinci និង​ ៣០ ​ភាគរយ​ទៀត​គ្រប់គ្រង​ដោយ​ MuhibbahMasteron Cambodia ​ដែល​ជា​ការ​រកស៊ី​រួម​គ្នា​រវាង​ម៉ាឡេស៊ី​ និង​កម្ពុជា ហើយ​ក្រោយមក​បាន​​ទទួល​​​សម្បទាន​​សម្រាប់​ខេត្ត​​សៀមរាប​ និង​ព្រះសីហនុ​។

ឆ្លើយតប​តាម​អ៊ីមែល​កាល​ម្សិលមិញ លោក ខែក នរិន្ឌដា នាយក​ផ្នែក​ទំនាក់ទំនង និង ទីផ្សារ​របស់​ក្រុមហ៊ុន​ព្រលាន​យន្តហោះ​កម្ពុជា (SCA) បាន​ថ្លែង​ថា សម្បទាន​ដំបូង​របស់​ក្រុមហ៊ុន​ត្រូវ​បាន​សម្រេច​​ដោយ​រដ្ឋាភិបាល​​​​ដែល​បង្កើត​ឡើង​ដោយ​គណបក្ស​ច្រើន​បន្ទាប់ពី​មាន​ការ​ដេញ​ថ្លៃ​ជា​អន្តរជាតិ​។

លោក​ថា​​ ព្រលាន​សៀមរាប​ត្រូវ​បាន​ធ្វើ​សមាហរណកម្ម​​ដើម្បី​រក្សា​ «​តុល្យភាព​​នៃ​សម្បទាន​» ​បន្ទាប់ពី​វិបត្តិ​សេដ្ឋកិច្ច​​អាស៊ី​​ក្នុង​ឆ្នាំ​ ១៩៩៧ ខណៈ​សម្បទាន​ព្រលាន​យន្តហោះ​ខេត្ត​ព្រះសីហនុ​ត្រូវ​បាន​បន្ថែម​ដើម្បី​ឲ្យ​រដ្ឋាភិបាល​មាន «​ប្រតិបត្តិករ​​ដែល​អាច​ទុក​ចិត្ត​បាន​ដើម្បី​ជួយ​អភិវឌ្ឍ​​​វិស័យ​ទេសចរណ៍​របស់​កម្ពុជា​»៕ TK/PS

អត្ថបទគួរចាប់អារម្មណ៍