ភ្នំពេញៈ ប្រធានគណបក្សសំបុកឃ្មុំ សង្គមប្រជាធិបតេយ្យលោក ម៉ម សូណង់ដូ បានប្រកាសធ្វើបាតុកម្មនៅទីលានប្រជាធិបតេយ្យដើម្បីទាមទារឱ្យដោះលែងមន្ត្រីសង្គមស៊ីវិល ៤ រូប និងមន្ត្រី គជប ១ រូបចំពោះអ្វីដែលមេបក្សរូបនេះបានហៅថាជាការចាប់ឃុំខ្លួនដែលធ្វើឱ្យខ្មែរគ្នាឯងកាន់តែមានកំហឹង។
ក្នុងលិខិតដែលចុះហត្ថលេខាដោយលោក ម៉ម សូណង់ដូ ចុះថ្ងៃទី ១៨ ខែ ឧសភា បានផ្ញើជូនអភិបាលរាជធានីភ្នំពេញលោក ប៉ា សុជាតិវង្ស បានលើកឡើងថាក្នុងនាមប្រជាពលរដ្ឋខ្មែរមួយរូបដែលធ្លាប់រងគ្រោះដោយភាពអយុត្តិធម៌ «ខ្ញុំនឹងដឹកនាំបាតុករមានអ្នកចូលរួមតិចជាង ២០០ នាក់ដោយជួបជុំគ្នានៅទីលានប្រជាធិបតេយ្យនៅថ្ងៃទី ៩ ខែ កក្កដា ចាប់ពីម៉ោង ៧ ព្រឹកដល់ម៉ោង ១២ ថ្ងៃត្រង់ដើម្បីស្វែងរកយុត្តិធម៌ជូនមន្ត្រីសង្គមស៊ីវិល»។
ក្នុងលិខិតបន្តថាបាតុកម្មនេះធ្វើឡើង «ដើម្បីសំណូមពរដល់អង្គភាពប្រឆាំងអំពើពុករលួយដកពាក្យបណ្តឹង និងការចោទប្រកាន់ទៅលើមន្ត្រីអាដុក ៤ រូប និងមន្ត្រីគ.ជ.ប ១រូបដែលសព្វថ្ងៃកំពុងស្ថិតនៅក្នុងការឃុំឃាំងបណ្តោះអាសន្នក្នុងពន្ធនាគារ»។ លោក សូណង់ដូ ក៏ស្នើឱ្យអង្គភាពប្រឆាំងអំពើពុករលួយយកច្បាប់ទៅអនុវត្តដោយស្មើភាពគ្នាទូទាំងប្រទេសប្រកបដោយភាពយុត្តិធម៌ និងមិនលម្អៀង។
លោកថា៖ «ខ្ញុំ និងប្រជាពលរដ្ឋខ្មែរទាំងអស់មិនចង់បានអ្វីក្រៅពីភាពយុត្តិធម៌ទេសូមអង្គភាពប្រឆាំងអំពើពុករលួយមេត្តាយកច្បាប់ទៅអនុវត្តគ្រប់ស្ថាប័ន និងប្រជាពលរដ្ឋទាំងអស់ដោយគ្មានភាពលម្អៀង»។
លោក សូណង់ដូ ដែលធ្លាប់ជាប់ពន្ធនាគារ ៣ ដងមកហើយនោះបានប្រាប់ភ្នំពេញប៉ុស្តិ៍ថារដ្ឋាភិបាលគួររកដំណោះស្រាយសមរម្យណាមួយជាជាងចាប់មន្ត្រីសិទ្ធិមនុស្សដែលខិតខំបំពេញការងារបម្រើប្រជាពលរដ្ឋយកទៅដាក់គុក។
លោកថា៖ «សង្គមស៊ីវិលអត់មានអ្វីធ្វើឱ្យរដ្ឋាភិបាលភ័យខ្លាចទេព្រោះគាត់ដោះស្រាយតែរឿងសិទ្ធិប្រជាពលរដ្ឋ»។
លោកសង្កត់ធ្ងន់ថាការដាក់គុកមន្ត្រីសង្គមស៊ីវិលគឺបិទទ្វាមិនឱ្យខ្មែររួបរួមគ្នាផ្ទុយទៅវិញធ្វើឱ្យខ្មែរកាន់តែមានកំហឹងជាមួយគ្នាទៅទៀត។
លោកបន្តថាមូលហេតុដែលលោកគ្រោងធ្វើបាតុកម្មនៅខែកក្កដាខាងមុខនេះគឺដើម្បីទុកពេលវេលាឱ្យរដ្ឋាភិបាលធ្វើការពិចារណាឡើងវិញដោយលោកលើកឡើងថាការប្រកាសពីគម្រោងធ្វើបាតុកម្មនេះមិនមានបំណងចង់ចាញ់ចង់ឈ្នះនោះទេប៉ុន្តែចង់ទាមទារយុត្តិធម៌ជូនមន្ត្រីអង្គការសង្គមស៊ីវិល។
អភិបាលរងរាជធានីលោក ឃួង ស្រេង បានថ្លែងថាលោកបានទទួលលិខិតនោះហើយតែកំពុងពិនិត្យទិដ្ឋភាពផ្លូវច្បាប់ថាតើអនុញ្ញាត ឬមិនអនុញ្ញាត។
លោកថា៖ «យើងកំពុងពិចារណាថាតើលិខិតហ្នឹងមានស្អីខ្លះបង្កប់ក្នុងនោះព្រោះគាត់លើកឡើងថាជាអ្នកសង្គមប្រជាធិតេយ្យហើយស្រាប់តែធ្វើបាតុកម្មដើម្បីឲ្យរដ្ឋាភិបាលដោះលែងជនជាប់ចោទដែលស្ថិតនៅក្នុងដៃតុលាការ»។
លោកថ្លែងថា៖ «ប្រជាធិបតេយ្យគេតែងតែចែកអំណាចបីដាច់ពីគ្នាហើយបើគាត់ឱ្យគេដោះលែងអ្នកទោសដែលតុលាការកំពុងធ្វើការបានន័យថាមាននិទ្ទណ្ឌភាពអ៊ីចឹងសាលារាជធានីភ្នំពេញពិនិត្យមើលបញ្ហានេះមួយចំណុចសិនថាតើគួរឱ្យធ្វើបាតុកម្មទេហើយតើចរិតការសម្តែងមតិរបស់គាត់ហ្នឹងយ៉ាងម៉េចគេនឹងអញ្ជើញគាត់មកប្រជុំពីបញ្ហានេះ»។
ភ្នំពេញប៉ុស្តិ៍មិនអាចសុំការអត្ថាធិប្បាយពីប្រធានអង្គភាពប្រឆាំងអំពើពុករលួយលោក ឱម យ៉ិនទៀង បានទេកាលពីម្សិលមិញ។
កាលពីថ្ងៃទី ២ ខែ ឧសភា សាលាដំបូងរាជធានីភ្នំពេញបានសម្រេចឃុំខ្លួនមន្ត្រីសិទ្ធិមនុស្សអាដហុកចំនួន ៤ រូបរួមមានលោក នី សុខា លោក ណៃ វ៉ង់ដា លោក យី សុខសាន្ត និងលោកស្រី លឹម មុនី ដោយរងការចោទពីបទសូកប៉ាន់សាក្សីតាមមាត្រា ៥៤៨ នៃក្រមព្រហ្មទណ្ឌខណៈដែលលោក នី ចរិយា អគ្គលេខាធិការរង គ.ជ.ប រងការចោទពីបទសមគំនិតសូកប៉ាន់សាក្សីតាមមាត្រា ២៩ និងមាត្រា ៥៤៨ នៃក្រមព្រហ្មទណ្ឌពាក់ព័ន្ធនឹងរឿងរ៉ាវដ៏ចម្រូងចម្រាសរបស់កញ្ញា ខុម ចាន់តារាទី ដែលត្រូវបានគេអះអាងថាជាស្រីកំណាន់របស់លោក កឹម សុខា ប្រធានស្តីទីគណបក្សសង្គ្រោះជាតិ។
ការចាប់ឃុំខ្លួននេះបានធ្វើឲ្យមានការខឹងសម្បា និងមានការថ្កោលទោសយ៉ាងខ្លាំងតាំងពីមជ្ឈដ្ឋានជាតិ និងអន្តរជាតិហើយអង្គការសង្គមស៊ីវិល និងសកម្មជនដីធ្លីជាច្រើនបានប្រកាសធ្វើយុទ្ធនាការស្លៀកពាក់ខ្មៅនៅរៀងរាល់ថ្ងៃចន្ទដើម្បីសម្តែងពីការខកចិត្តចំពោះការចាប់ឃុំខ្លួនមន្ត្រីសិទ្ធិមនុស្សនេះ៕
