ភ្នំពេញៈ ក្រសួងព័ត៌មានកំពុងរៀបចំបោះពុម្ពសៀវភៅ «កម្ពុជា ឆ្នាំ ២០២១» ចំនួន ៥ ពាន់ក្បាល នៅមុនកិច្ចប្រជុំកំពូល អាស៊ី-អឺរ៉ុប (ASEM) ដែលកម្ពុជាធ្វើជាម្ចាស់ផ្ទះនាពាក់កណ្ដាលឆ្នាំនេះ ដើម្បីចែកជូនដល់គណៈប្រតិភូ និងអ្នកចូលរួមកិច្ចប្រជុំកំពូលនេះ។
លោក ខៀវ កាញារីទ្ធ រដ្ឋមន្ដ្រីក្រសួងព័ត៌មានថ្លែងក្នុងពេលដឹកនាំកិច្ចប្រជុំជាមួយគណៈកម្មការបោះពុម្ពសៀវភៅ «កម្ពុជា ឆ្នាំ ២០២១» នៅទីស្តីការក្រសួងព័ត៌មានកាលពីថ្ងៃទី ២៦ ខែកុម្ភៈថា សៀវភៅនេះមានកម្រាស់ប្រមាណ ១១០ ទំព័រ រៀបចំឡើងដោយបានផ្តោតសំខាន់លើរូបភាព និងអត្ថបទខ្លីៗផ្តោតលើទិដ្ឋភាពសំខាន់ៗនៃប្រទេសកម្ពុជា និងបង្ហាញពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការប្រយុទ្ធប្រឆាំងជំងឺកូវីដ ១៩។
លោកថ្លែងថា៖ «សៀវភៅនេះក៏បានបង្ហាញពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការអនុវត្ដការងារតាមច្រកព្រំដែន ការចាក់វ៉ាក់សាំង ការពារកូវីដ ១៩ ការពិនិត្យជនបរទេសរកមេរោគកូវីដ ១៩ ការអនុញ្ញាតឱ្យនាវាទេសចរណ៍ខ្នាតអន្តរជាតិ Westerdam ដែលមានផ្ទុកអ្នកដំណើរប្រមាណជាង ១ ៤០០ នាក់ ចូលចតនៅកំពង់ផែខេត្ដព្រះសីហនុកាលពីខែកុម្ភៈ ឆ្នាំ ២០២០ ជាដើម»។
លោក ផុស សុវណ្ណ អ្នកនាំពាក្យក្រសួងព័ត៌មានថ្លែងពីម្សិលមិញថា សៀវភៅនេះក្រុមការងារនឹងខិតខំប្រឹងប្រែងធ្វើយ៉ាងណា បោះពុម្ពសៀវភៅនេះ ឱ្យបានមុនកិច្ចប្រជុំកំពូលអាស៊ី-អឺរ៉ុប ដើម្បីចែកជូនដល់គណៈប្រតិភូ និងអ្នកចូលរួមក្នុងការស្វែងយល់ពីកម្ពុជា។
លោកបញ្ជាក់ថា៖ «យើងគ្រោងបោះពុម្ពសៀវភៅនេះ នៅក្នុងខែឧសភា ឬមិថុនាខាងមុខឱ្យបានទាន់ព្រឹត្ដិការណ៍កិច្ចប្រជុំកំពូលអាស៊ី-អឺរ៉ុប។ ការបោះពុម្ពដំណាក់កាលដំបូងជាភាសាខ្មែរ ក្នុងរង្វង់ ៥ ពាន់ក្បាល ក្រៅពីបោះពុម្ពជាភាសាខ្មែរ យើងក៏គ្រោងបោះជាភាសាបរទេស ដូចជា ភាសាអង់គ្លេស បារាំង និងភាសាចិនដែរ»។
លោក សុវណ្ណ បានបញ្ជាក់ថា សៀវភៅនេះគឺក្រុមការងារក្រសួងព័ត៌មានជាអ្នករៀបចំខ្លឹមសារ និងមានការចូលរួមពីក្រុមអ្នកថតរូបអន្តរជាតិផងដែរ។
ប្រធានវិទ្យាស្ថានប្រជាធិបតេយ្យកម្ពុជាលោក ប៉ា ចន្ទរឿន គាំទ្រការរៀបចំចងក្រងសៀវភៅនេះដោយថ្លែងថា គឺជាការល្អក្នុងការនាំសារពីកម្ពុជាទៅកាន់អន្តរជាតិ។ ប៉ុន្ដែក្រៅពីការផ្ដល់ជូនសៀវភៅនេះទៅគណៈប្រតិភូ និងអ្នកចូលរួម កម្ពុជាគួរតែបង្ហាញអំពីគោលជំហររបស់ខ្លួននៅក្នុងការលើកកម្ពស់ការគោរពសិទ្ធិមនុស្ស និងដំណើរការប្រជាធិបតេយ្យដែលជាស្នូលសំខាន់ក្នុងកិច្ចសហប្រតិបត្ដិការរវាងអាស៊ី និងអឺរ៉ុប។
លោកថ្លែងថា៖ «កន្លងមកនេះសហភាពអឺរ៉ុបបានចាត់វិធានការមកលើកម្ពុជាយើងតាមរយៈការដក EBA ២០% កាលពីខែសីហាឆ្នាំមុន។
ខ្ញុំគិតថា នៅក្នុងវេទិកាសន្ទនាបែបនយោបាយ ដូចនៅក្នុងកិច្ចអាស៊ី-អឺរ៉ុបនេះ កម្ពុជាគួរតែឆ្លៀតឱកាសបង្ហាញពីជំហរ និងការខិតខំប្រឹងប្រែងរបស់ខ្លួនក្នុងការគោរពសិទ្ធិមនុស្ស និងការលើកកម្ពស់ដំណើរការប្រជាធិបតេយ្យ»។
លោក ច័ន្ទរឿន លើកឡើងថា ការបង្ហាញអំពីការប្ដេជ្ញាចិត្ដអំពីការលើកកម្ពស់ ការគោរពសិទ្ធិមនុស្ស និងដំណើរការប្រជាធិបតេយ្យនៅកម្ពុជា គឺជាកិច្ចការងារសំខាន់ដែលអាចលើកកម្ពស់ទំនាក់ទំនង កិច្ចសហប្រតិបត្ដិការ និងកសាងជំនឿចិត្ដ ទាំងក្នុងនយោបាយ និងសេដ្ឋកិច្ចរវាងប្រទេសកម្ពុជា និងប្រទេសក្នុងតំបន់ ពិសេសប្រទេសដែលប្រកាន់ជំហរគោរពសិទ្ធិមនុស្ស និងប្រជាធិបតេយ្យជាគោល។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា ការផ្ដល់ព័ត៌មានពិតពីកម្ពុជាតាមរយៈសៀវភៅនេះ ទៅកាន់មជ្ឈដ្ឋានអន្តរជាតិនឹងធ្វើឱ្យអន្តរជាតិ យល់ដឹងកាន់តែច្បាស់ពីប្រទេសកម្ពុជាប្រជាជនកម្ពុជានយោបាយ និងការអភិវឌ្ឍនានារបស់កម្ពុជា។ «កិច្ចប្រជុំអាស៊ី-អឺរ៉ុប មានសារៈសំខាន់ និងសារប្រយោជន៍សម្រាប់កម្ពុជាក្នុងនោះនឹងបង្ហាញពីតួនាទីកាន់តែមានសារៈសំខាន់របស់កម្ពុជា នៅក្នុងកិច្ចការតំបន់ និងអន្តរជាតិ។ កិច្ចប្រជុំនេះក៏ជាឱកាសសម្រាប់កម្ពុជាអាចចេញនូវគំនិតផ្គួចផ្ដើមចក្ខុវិស័យតំបន់របស់ខ្លួនក្នុងឋានៈ ជាប្រធានអង្គប្រជុំ»។
កម្ពុជាគ្រោងធ្វើជាម្ចាស់ផ្ទះ រៀបចំកិច្ចប្រជុំកំពូលអាស៊ី-អឺរ៉ុបលើកទី ១៣ នៅខែឧសភា ឬខែមិថុនា នាពាក់កណ្ដាលឆ្នាំនេះបន្ទាប់ពីលើកពេលកិច្ចប្រជុំ ដែលគ្រោងធ្វើនៅពាក់កណ្តាល ខែវិច្ឆិកា ឆ្នាំ ២០២០ កន្លងទៅ ដោយសារតែវិបត្តិនៃជំងឺកូវីដ ១៩។ នេះបើតាមលោក កុយ គួង អ្នកនាំពាក្យក្រសួងការបរទេស ប្រាប់ ភ្នំពេញ ប៉ុស្ដិ៍ នាពេលកន្លងមក៕