.jpg)
ផ្ទាំងរូបភាពបង្ហាញពីការប្រែប្រួលធាតុអាកាសសម្រាប់អប់រំតាមសាលារៀន។ រូបថត ក្រសួងបរិស្ថាន
ភ្នំពេញៈ មន្ត្រីក្រសួងបរិស្ថានបានឲ្យដឹងថា សៀវភៅ និងផ្ទាំងរូបភាពអប់រំស្ដីពីការប្រែប្រួលអាកាសធាតុសម្រាប់មធ្យមសិក្សាបឋមភូមិនឹងត្រូវចែកចាយទៅគ្រប់សាលាអនុវិទ្យាល័យទាំងអស់នៅទូទាំងប្រទេស បន្ទាប់ពីសៀវភៅ និងផ្ទាំងរូបនេះត្រូវបានក្រសួងបរិស្ថាន និងក្រសួងអប់រំប្រកាសដាក់ឱ្យប្រើកាលពីថ្ងៃទី ២៦ ខែសីហានេះ។
លោក នេត្រ ភក្ត្រា រដ្ឋលេខាធិការ និងអ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្ដិ៍ម្សិលមិញថា ការចែកចាយសៀវភៅ និងផ្ទាំងរូបភាពទាំងនោះគឺចាប់ផ្ដើមពីសប្ដាហ៍នេះទៅ ប៉ុន្តែលោកមិនបានបញ្ជាក់ថា កិច្ចចែកចាយនោះនឹងបញ្ចប់នៅពេលណាឡើយ។
លោក ភក្ត្រា បានថ្លែងថា៖ «គម្រោងដំបូង (ក្រសួង) បោះពុម្ពផ្ទាំងរូបភាពចំនួន ៥០០ ផ្ទាំង និងសៀវភៅចំនួន ៥ ពាន់ក្បាលដើម្បីចែកចាយតាមសាលារៀននានា (សម្រាប់សាលាមធ្យមសិក្សាបឋមភូមិ) នៅក្នុងប្រទេសកម្ពុជា។ ការចែកចាយនឹងចាប់ផ្តើមធ្វើចាប់ពីសបា្តហ៍នេះ។ យើងនឹងកៀរគរថវិកាដើម្បីបោះពុម្ពសៀវភៅ និងផ្ទាំងរូបភាពអប់រំពីការប្រែប្រួលអាកាសធាតុនេះបន្ថែមទៀត ដើម្បីចែកចាយដល់គ្រប់សាលារៀនទាំងអស់»។
កាលពីថ្ងៃទី ២៦ ខែសីហានេះក្រសួងបរិស្ថាន និងក្រសួងអប់រំ យុវជន និងកីឡាបានសម្ពោធដាក់ឱ្យប្រើប្រាស់ជាផ្លូវការ «មេរៀន និងផ្ទាំងរូបភាពអប់រំស្ដីពីការប្រែប្រួលអាកាសធាតុ»។
បើតាមទំព័រហ្វេសប៊ុកក្រសួងបរិស្ថានបានចុះផ្សាយដោយស្រង់សម្ដីលោក នេត្រ ភក្ត្រា បានឲ្យដឹងថា មេរៀន និងផ្ទាំងរូបភាពស្ដីពីការប្រែប្រួលអាកាសធាតុនេះគឺរៀបចំ និងចងក្រងដោយការសហការគ្នារវាងអគ្គនាយកដ្ឋានចំណេះដឹង និងព័ត៌មានបរិស្ថាននៃក្រសួងបរិស្ថានជាមួយនាយកដ្ឋានអភិវឌ្ឍន៍កម្មវិធីសិក្សានៃក្រសួងអប់រំដែលគាំទ្រដោយគម្រោងរបស់អគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព។ ការរៀបចំ និងចងក្រងនេះមានបំណងចែករំលែកចំណេះដឹងអំពីការប្រែប្រួលអាកាសធាតុ និងការរួមចំណែកធ្វើឱ្យជីវភាពរស់នៅរបស់សហគមន៍ និងសង្គមកម្ពុជាមានភាពធន់នឹងអាកាសធាតុ។
លោកបន្ថែមថា ការអប់រំអំពីការប្រែប្រួលអាកាសធាតុ និងបរិស្ថានត្រូវធ្វើឡើងទាំងនៅក្នុងប្រព័ន្ធអប់រំ និងក្រៅប្រព័ន្ធអប់រំ ហើយលោកក៏ចង់ឱ្យគ្រឹះស្ថានអប់រំឯកជនទាំងអស់បញ្ចូលការអប់រំថ្មីនេះដូចសាលារៀនរដ្ឋដែរ។
លោក ភក្ត្រា ថ្លែងថា៖ «ខ្ញុំជឿជាក់ថា សៀវភៅមេរៀន និងផ្ទាំងរូបភាពស្តីពីការប្រែប្រួលអាកាសធាតុសម្រាប់ថ្នាក់មធ្យមសិក្សាបឋមភូមិនឹងដើរតួនាទីសំខាន់ជាឯកសារយោងសម្រាប់ប្រើប្រាស់សិក្សាស្រាវជ្រាវអំពីការប្រែប្រួលអាកាសធាតុ វិធានការ បន្សំ និងការចូលរួមកាត់បន្ថយការប្រែប្រួលអាកាសធាតុតាមរយៈបុគ្គល និងសហគមន៍»។
កម្ពុជាមានសាលារៀនទាំងអស់ចាប់ពីថ្នាក់មត្តេយ្យសិក្សារហូតដល់មធ្យមសិក្សាទុតិយភូមិចំនួន ១៤៩០៥ សាលាក្នុងនោះសាលាបង្រៀនមធ្យមសិក្សាបឋមភូមិមានចំនួន ១៣២៤ សាលា។
លោកស្រី ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា បានលើកឡើងនៅក្នុងកម្មវិធីសម្ពោធនោះដែរថា សៀវភៅ និងផ្ទាំងរូបភាពអប់រំស្ដីពីការប្រែប្រួលអាកាសធាតុនេះនឹងចូលរួមចំណែកផ្ស៊ាំការរស់នៅប្រចាំថ្ងៃរបស់ប្រជាពលរដ្ឋទៅនឹងការប្រែប្រួលអាកាសធាតុ និងចូលរួមកាត់បន្ថយការប្រែប្រួលអាកាសធាតុ។
លោកស្រីថា៖ «ព្រមទាំងលើកកម្ពស់ការយល់ដឹងអំពីកិច្ចគាំពារបរិស្ថាន ចូលរួមថែរក្សាបរិស្ថានស្អាត គ្មានសំរាម គ្មានការបំពុល គ្មានសំណល់ប្លាស្ទិក និងបន្តពង្រឹង និងពង្រីកចំណេះដឹងដល់លោកគ្រូ អ្នកគ្រូ ពិសេសសិស្សានុសិស្សដែលនឹងក្លាយជាអ្នកដឹកនាំនាពេលអនាគតឱ្យយល់ដឹងអំពីភាពចាំបាច់ និងអត្ថប្រយោជន៍បរិស្ថាន តុល្យភាពនៃប្រព័ន្ធអេកូឡូស៊ី ការគ្រប់គ្រងធនធានធម្មជាតិ ការអភិរក្សជីវចម្រុះ និងការរស់នៅដោយចីរភាព»។
អង្គការទិន្នន័យអំពីការអភិវឌ្ឍ (ODC) ធ្លាប់បញ្ជាក់ថា កម្ពុជាគឺជាប្រទេសស្ថិតក្នុងចំណោមប្រទេសដែលងាយរងគ្រោះបំផុតពីការប្រែប្រួលអាកាសធាតុនៅតំបន់អាស៊ីអាគ្នេយ៍ ដោយសារតែមានការបាត់បង់គម្របព្រៃឈើ និងព្រៃស្រោងនៅទូទាំងប្រទេសចាប់តាំងពីឆ្នាំ ១៩៧៣ មក។ អង្គការ USAID ក៏បានព្យាករថានៅក្នុងឆ្នាំ ២០៥០ ខាងមុន ប្រជាជនកម្ពុជាប្រកបមុខរបរក្នុងវ័ស័យកសិកម្មប្រមាណ ៧ លាននាក់ និងនៅក្នុងវិស័យសំណង់ប្រមាណ ២ សែន ៤ ម៉ឺននាក់នឹងត្រូវរងផលប៉ះពាល់ពីការប្រែប្រួលអាកាសធាតុ៕
