The Phnom Penh Post Search

Search form

Logo of Phnom Penh Post newspaper Phnom Penh Post - សៀវ​ភៅ​ស្តី​ពី​របៀប​ការពារ​រន្ទះ​បោះ​ពុម្ព​១ពាន់​ច្បាប់​ដំបូង




សៀវ​ភៅ​ស្តី​ពី​របៀប​ការពារ​រន្ទះ​បោះ​ពុម្ព​១ពាន់​ច្បាប់​ដំបូង

សៀវ​ភៅ​ស្តី​ពី​របៀប​ការពារ​រន្ទះ​បោះ​ពុម្ព​១ពាន់​ច្បាប់​ដំបូង

ភ្នំពេញៈ សៀវភៅ​ណែនាំ​ពី​វិធី​ការពារ​រន្ទះ​បាន​បោះពុម្ព​ផ្សាយ​ជា​លើក​ដំបូង​ក្នុង​សប្តាហ៍​មុន បន្ទាប់​ពី​អ្នក​និពន្ធ​ចំណាយ​ពេល​យ៉ាង​យូរ​រៀបរៀង​ឡើង​និង​ស្វែង​រក​ជំនួយ។ សៀវភៅ​នេះ​បាន​ចែក​ចាយ​ទៅ​ខេត្ត​មួយ​ចំនួន​ដែល​មាន​ករណី​រន្ទះ​បាញ់​កើត​មាន​ច្រើន។

លោក យិន គិត​ស៊ីវ​អនុប្រធាន​ផ្នែក​រូប​វិទ្យា​និង​ថាមពល នៃ​វិទ្យាស្ថាន​វិទ្យាសាស្រ្ត​និង​បច្ចេក​វិទ្យា​រាជ​បណ្ឌិត​សភា​កម្ពុជា និង​ជា​អ្នក​និពន្ធ​សៀវភៅ​មាន​ចំណង​ជើង​ថា «ការ​ណែនាំ​វិធី​ការពារ​រន្ទះ​នៅ​កម្ពុជា»​ឲ្យ​ដឹង​ថា រដ្ឋ​មន្រ្តី​ក្រសួង​ព័ត៌មាន​លោក ខៀវ កាញារីទ្ធ​បាន​ជួយ​ឲ្យ​សៀវភៅ​នេះ​ចេញ​ជា​រូបរាង​ឡើង​ចំនួន​១ពាន់​ច្បាប់។ លោក​បាន​ចែក​ទៅ​ខេត្ត​ដែល​មាន​ករណី​រន្ទះ​ច្រើន​ជាងគេ។

លោកបន្តថា ៖ «ខ្ញុំបាន​ចែក​សៀវភៅ​នេះ​ដោយ​ឥត​គិត​ថ្លៃ​ទៅ​ឲ្យ​គ្រូ​វិទ្យាល័យ ខេត្ត​ពោធិ៍សាត់ បាត់ដំបង ព្រៃវែង តាកែវ និង​រាជធានី​ភ្នំពេញ ដែល​ជា​ខេត្ត​មាន​ករណី​រន្ទះ​បាញ់​ច្រើន ហើយ​ខ្ញុំក៏​បាន​រក្សា​ទុក​ក្នុង​បណ្ណាល័យ និង​ក្រសួង​ពាក់​ព័ន្ធ​មួយ​ចំនួន​ដែរ»។

លោក យិន គិតស៊ីវ បាន​បន្ត​ថា៖​«យើង ពុំ​មាន​សៀវភៅ​គ្រប់​គ្រាន់​ចែក​ទៅ​ឲ្យ​មនុស្ស​គ្រប់ៗ​គ្នា​បាន​ទេ ប៉ុន្តែ​ខ្ញុំ នឹង​ស្វែង​រក​អ្នក​ឧបត្ថម្ភ​ដើម្បី​ជួយ​បោះពុម្ព​បន្ថែម​សម្រាប់​ចែក​ចាយ ទូទាំង​ប្រទេស»។

លោក យិន គិតស៊ីវ មាន​គំនិត និង​ចាប់​សរសេរ​សៀវភៅ​ពី​ការ​ការពារ​រន្ទះ តាំង​ពី​ឆ្នាំ​២០១០ បន្ទាប់​ពី​មាន​ព័ត៌មាន​តាម​ប្រព័ន្ធ​ផ្សព្វ​ផ្សាយ​អំពី​ការ​ស្លាប់​និង របួស​ដែល​បង្ក​ឡើង​ដោយ​រន្ទះ​បាញ់។

សៀវភៅនេះ​រៀបរាប់​ពី​ចំណុច សំខាន់ៗ៤ ដូចជា​ព័ត៌មាន​ស្តី​អំពី​ប្រភេទ​នៃ​រន្ទះ ការ​ការពារ​រន្ទះ​នៅ​ក្នុង​និង​ក្រៅ​ផ្ទះ ​របៀប​ត្រូវ​ធ្វើ​យ៉ាង​ណា​នៅ​ពេល​ដែល​មាន​ផ្គរលាន់ ​និង​របៀប​ជួយ​ជន​រងគ្រោះ។

លោកគិតស៊ីវ បញ្ជាក់​ថា៖«ខ្ញុំ​មិន​អាច​បង្រៀន​អ្នក​ភូមិ​ផ្ទាល់​ទេ ប៉ុន្តែ​ខ្ញុំ​អាច​បង្រៀន​ពួកគេ​ដោយ​ប្រយោល​តាម​សៀវភៅ​ខ្ញុំ​នេះ។ ពួកគេ អាច​ការពារ​ខ្លួន​បាន​តាម​ការ​រៀន​ពី​សៀវភៅ​ខ្ញុំ​នេះ។ ខ្ញុំ រំពឹង​ថា ការ​ស្លាប់និង​របួស​ដោយ​រន្ទះបាញ់​នឹង​ធ្លាក់​ចុះ ប្រសិន​ពួកគេ បាន​អាន​សៀវភៅ​របស់​ខ្ញុំ»។

លោក គិតស៊ីវ បន្ត​ឲ្យ​ដឹងថា ប្រជាពលរដ្ឋតិច​ជាង ១០​ភាគរយ​យល់​ពី​របៀប​ការពារ​រន្ទះ​សៀវភៅ​ជិត​១០០​ទំព័រ ជាមួយ​នឹង​ព័ត៌មាន រូបភាព ​ស្តី​ពី​ការ​ការពារ និង​ជួយ​ឲ្យ​ចៀស​ផុត​ពី​រន្ទះ។

លោកក៏ធ្លាប់​ប្រាប់​ភ្នំពេញ ប៉ុស្តិ៍​ថា អ្នក​ភូមិ​ភាគ​ច្រើន​នៅ​តំបន់​ជនបទ មិន​សូវ​ចេះ​អាន​អក្សរ​ទេ បើ​លោក​មិន​ប្រើ​ប្រាស់​រូបភាព​ឲ្យ​ច្រើន​ទេ សៀវភៅ​នេះនឹង​ពុំ​មាន​ប្រយោជន៍​សម្រាប់​ពួកគេទេ។

តាមរបាយការណ៍​របស់​គណៈ​កម្មា​ធិការ​ជាតិ គ្រប់គ្រង​គ្រោះ​មហន្តរាយ​បាន​ឲ្យ​ដឹង​ថា មាន​មនុស្ស​ចំនួន ១០៣ នាក់ ស្លាប់ និង ៧១​នាក់​ទៀត ត្រូវ​របួស​ដោយសារ​រន្ទះ​បាញ់​កាល​ពី​ឆ្នាំ​២០១២។

កាលពីខែមុន មាន​មនុស្ស​ចំនួន​៥​នាក់ ត្រូវ​រង​របួស​ដោយ​សារ​រន្ទះ​បាញ់​នៅ​ស្រុក​កំរៀង នៅក្នុង​ខេត្ត​បាត់ដំបង៕ NR

អត្ថបទគួរចាប់អារម្មណ៍