ភ្នំពេញៈ ទីស្តីការគណៈរដ្ឋមន្រ្តី កាលពីថ្ងៃសុក្រសប្តាហ៍មុន បានអនុម័តសេចក្តីព្រាងវិសោធនកម្មមាត្រាមួយចំនួននៃច្បាប់ស្តីពីការគ្រប់គ្រងនិងការធ្វើអាជីវកម្មធនធានរ៉ែ ដែលមានចន្លោះប្រហោងក្នុងការដាក់ទោសទណ្ឌអស់រយៈពេលប្រមាណ ១៧ ឆ្នាំមកហើយ។
ច្បាប់ស្តីពីការគ្រប់គ្រងនិងការធ្វើអាជីវកម្មធនធានរ៉ែ ត្រូវបានប្រកាសឲ្យប្រើដោយព្រះរាជក្រមលេខ នស/រកម/០៧០១/០៩ ចុះថ្ងៃទី ១៣ ខែកក្កដា ឆ្នាំ ២០០១។
តាមសេចក្តីប្រកាសព័ត៌មានរបស់ទីស្តីការគណៈរដ្ឋមន្រ្តីឲ្យដឹងថា បទពិសោធបានបង្ហាញថា ច្បាប់នេះនៅមានចំណុចខ្វះខាតដែលមិនទាន់ឆ្លើយតប នឹងការវិវត្តនៃវិស័យរ៉ែក្នុងបរិបទនៃការអភិវឌ្ឍសេដ្ឋកិច្ចសង្គម និងបរិស្ថានរបស់កម្ពុជានាពេលបច្ចុប្បន្ន។
សេចក្តីប្រកាសព័ត៌មាននេះបន្តថា៖ «សេចក្តីព្រាងច្បាប់ស្តីពីវិសោធនកម្មនេះធ្វើឡើងក្នុងគោលបំណងបំពេញចន្លោះខ្វះខាតដូចជា៖ ការនាំផលិតផលរ៉ែ ចេញក្រៅប្រទេស ដោយគ្មានការអនុញ្ញាតពីក្រសួងទទួលបន្ទុករ៉ែ បែរជាពុំមានទោសទណ្ឌអ្វីទាំងអស់, គ្រប់បទល្មើសធនធាន រ៉ែ តម្រូវឲ្យប្រើប្រាស់នីតិវិធីតុលាការ ទោះបីបទល្មើសនោះតូចតាចក៏ដោយ ដូចជា ការធ្វើអាជីវកម្មជីករណ្តៅដីជាដើម ដោយមិនមានការបើកផ្លូវឲ្យមានការពិន័យរដ្ឋបាលឡើយ, ច្បាប់បច្ចុប្បន្នពុំមានមាត្រាណាមួយអនុញ្ញាតឲ្យមន្រ្តីជំនាញវិស័យរ៉ែ នៃក្រសួង រ៉ែ និង ថាមពល មាននីតិសម្បទា ជាមន្រ្តីនគរបាលយុត្តិធម៌ឡើយ ដែលជាហេតុធ្វើឲ្យមានការលំបាកក្នុងការបង្ក្រាបបទល្មើសធនធានរ៉ែ ឲ្យមានប្រសិទ្ធភាព»។
អ្នកនាំពាក្យក្រសួង រ៉ែ និង ថាមពល លោក ឌិត ទីណា នៅពេលទាក់ទងតាមទូរស័ព្ទកាលពីថ្ងៃអាទិត្យ ខណៈនៅក្នុងបញ្ជីក្រសួង រ៉ែ និងថាមពល ថា ជាអ្នកនាំពាក្យ ប៉ុន្តែលោកបានបដិសេធថាមិនមែនជាទូរស័ព្ទលោកទេ។
លោក ផៃ ស៊ីផាន អ្នកនាំពាក្យនៅទីស្តីការគណៈរដ្ឋមន្រ្តី បានសរសេរលើហ្វេសប៊ុករបស់លោកថា បទល្មើសធនធានរ៉ែ មានច្រើនប្រភេទ និង ច្រើនស្ថានទម្ងន់ទោស ដែលតម្រូវឲ្យចាត់វិធានការឆ្លើយតបឲ្យទាន់ពេលវេលាដូចជា ការផាកពិន័យ ឬ កសាងសំណុំរឿងបញ្ជូនទៅតុលាការនៅកន្លែងប្រព្រឹត្តបទល្មើស ទើបការទប់ស្កាត់បទល្មើសធនធានរ៉ែ មានប្រសិទ្ធភាពនិងទទួលបាននូវទំនុកចិត្តពីសាធារណជន។
លោកបន្តថា៖ «មាត្រា ៣០ ហាមឃាត់ការដឹកនាំចេញធនធានរ៉ែផលិតផលរ៉ែ ចេញពីការដ្ឋាន និង ការនាំចេញធនធាន រ៉ែ និងផលិតផល រ៉ែ ទៅក្រៅប្រទេសដោយគ្មានការអនុញ្ញាត»។
បើតាមការចុះផ្សាយរបស់កាសែត ភ្នំពេញ ប៉ុស្តិ៍ កាលពីខែ កញ្ញា ឆ្នាំ ២០១៦ ក្រុមអង្គការតម្លាភាព និងបរិស្ថានបានអំពាវនាវឲ្យអង្គភាពប្រឆាំងអំពើពុករលួយស៊ើបករណីរត់ពន្ធខ្សាច់ បន្ទាប់ពីមានគម្លាតទឹកប្រាក់ ៧៥០ លានដុល្លារដែលត្រូវបានរកឃើញរវាងការនាំចេញខ្សាច់ពី កម្ពុជា និងការនាំចូលខ្សាច់របស់ប្រទេស សិង្ហបុរី។
ក្នុងទិន្នន័យស្ថិតិរបស់ UN Comtrade បានបង្ហាញថា កម្ពុជា ត្រូវបានរាយការណ៍ថា នាំចេញខ្សាច់តម្លៃ ៥,៥ លានដុល្លារប្រហែល ២,៨ លានតោន ទៅសិង្ហបុរី ពីឆ្នាំ ២០០៧ និង ២០១៧។ ប៉ុន្តែ ទិន្នន័យនេះបង្ហាញថា ក្នុងរយៈពេលដដែលនេះ សិង្ហបុរី បាននាំចូលខ្សាច់តម្លៃ ៧៥២ លានដុល្លារពី កម្ពុជា ស្មើនឹង ៧២,៧ លានតោន៕PS