ភ្នំពេញៈ ក្រសួងទេសចរណ៍ និងក្រសួងបរិស្ថានសង្ឃឹមថាសេចក្តីព្រាងគោលនយោបាយជាតិចុងក្រោយស្តីពីអេកូទេសចរណ៍នឹងត្រូវបញ្ចប់នៅត្រឹមខែសីហានៅពេលវេទិកាជាតិលើកទីពីរស្តីពីការការពារ និងអភិរក្សធនធានធម្មជាតិប្រារព្ធធ្វើឡើង។ នេះបើយោងទៅតាមមន្ត្រីបរិស្ថានម្នាក់ដែលបានថ្លែងកាលពីម្សិលមិញ។
វេទិកាស្តីពីបញ្ហាបរិស្ថានត្រូវបានប្រារព្ធធ្វើឡើងជាលើកទីមួយកាលពីឆ្នាំមុនជាមួយលោកនាយករដ្ឋមន្ត្រី ហ៊ុន សែន និងតំណាងសង្គមស៊ីវិលប្រមាណ ៥០០ នាក់ដែលទទួលបានឱកាសជម្រាបដោយផ្ទាល់ទៅលោកនាយករដ្ឋមន្ត្រីអំពីបញ្ហាបរិស្ថានជាច្រើន។
អ្នកនាំពាក្យក្រសួងបរិស្ថានលោក សៅ សុភាព បានថ្លែងថារដ្ឋមន្ត្រីទាំងពីរបានជួបប្រជុំគ្នាជាលើកទីមួយកាលពីម្សិលមិញដើម្បីពិភាក្សាគោលនយោបាយនេះដែលត្រូវបានផ្តួចផ្តើមដោយក្រសួងទេសចរណ៍ហើយត្រូវបានរៀបចំដើម្បីជំរុញទេសចរណ៍អេកូក្នុងប្រទេសកម្ពុជាដោយសារ «វាមានសក្តានុពលដ៏ធំមួយ»។
លោក សុភាព បានថ្លែងថា៖ «យើងមានគោលបំណង [បញ្ចប់សេចក្តីព្រាង] ក្របខ័ណ្ឌនេះពេលវេលាពីឥឡូវរហូតដល់ខែសីហាគឺជិតដល់ហើយ»។
លោកបានថ្លែងថាតំបន់ការពារធម្មជាតិចំនួន ៧,៥ លានហិកតារបស់កម្ពុជា តំណាងឲ្យ «សក្តានុពលដ៏ធំមួយសម្រាប់អេកូទេសចរណ៍» នោះនឹងជួយកម្ពុជា ធ្វើពិពិធកម្មតំបន់ទេសចរណ៍របស់ខ្លួនសម្រាប់ទាំងភ្ញៀវជាតិ និងអន្តរជាតិ ខណៈសកម្មភាពនេះជាការរួមចំណែកដល់ការអភិរក្ស និងការការពារធនធានធម្មជាតិព្រមទាំងលើកកម្ពស់សេដ្ឋកិច្ចប្រជាជនមូលដ្ឋាន និងសេដ្ឋកិច្ចជាតិ។
លោក សុភាព បានថ្លែងបន្តថាក្នុងអំឡុងកិច្ចប្រជុំកាលពីម្សិលមិញមេដឹកនាំពីក្រសួងទាំងពីរស្នើឲ្យមានការបង្កើតក្រុមការងាររួមគ្នាមួយដើម្បីពិនិត្យមើលការអភិវឌ្ឍទេសចរណ៍អេកូទាំងមូលក្នុងប្រទេសកម្ពុជា។ ពីមុនពេលកិច្ចប្រជុំកាលពីម្សិលមិញក្រសួងទាំងពីរគ្រាន់តែបានប្រឹក្សាយោបល់គ្នាស្តីពីគោលនយោបាយនេះ។
លោក ទិត ចាន់ថា រដ្ឋលេខាធិការក្រសួងទេសចរណ៍មិនបានឆ្លើយតបនឹងសំណើសុំអត្ថាធិប្បាយទេ។ មន្ត្រីដទៃៗទៀតបានបង្វែរសំណួរទៅលោក ចាន់ថា។
សេចក្តីព្រាងច្បាប់នេះមិនទាន់បង្ហាញជាសាធារណៈនៅឡើយទេរហូតទាល់តែសេចក្តីព្រាងចុងក្រោយត្រូវបានធ្វើចប់សព្វគ្រប់៕ PS
