The Phnom Penh Post Search

Search form

Logo of Phnom Penh Post newspaper Phnom Penh Post - សេចក្តី​ព្រាងច្បាប់​ការ​ត្រួតពិនិត្យ​ផលិតផល​គ្រឿង​ស្រវឹង​នឹង​អនុម័ត​ឆាប់ៗ




សេចក្តី​ព្រាងច្បាប់​ការ​ត្រួតពិនិត្យ​ផលិតផល​គ្រឿង​ស្រវឹង​នឹង​អនុម័ត​ឆាប់ៗ

ក្រុម​សិស្ស​នាំ​គ្នា​ផឹក​ក្រោយ​ពី​បញ្ចប់​ការ​សិក្សា។
ក្រុម​សិស្ស​នាំ​គ្នា​ផឹក​ក្រោយ​ពី​បញ្ចប់​ការ​សិក្សា។ ម៉ៃ វីរៈ

សេចក្តី​ព្រាងច្បាប់​ការ​ត្រួតពិនិត្យ​ផលិតផល​គ្រឿង​ស្រវឹង​នឹង​អនុម័ត​ឆាប់ៗ

ភ្នំពេញៈ ក្រសួង​សុខាភិបាល​​ និង​អន្តរក្រសួង​បាន​បញ្ចប់​នូវ​សេចក្តី​ព្រាង​ច្បាប់​ «ការ​ត្រួតពិនិត្យ​ផលិតផល​គ្រឿង​ស្រវឹង» និង​ត្រៀម​បញ្ជូន​ទៅ​កាន់​គណៈរដ្ឋមន្ត្រី​អនុម័ត​នា​ពេល​ឆាប់ៗ​នេះ​ក្នុង​គោលបំណង​បង្កើន​ពន្ធ​ក៏ដូចជា​គ្រប់គ្រង​ការ​ផ្សាយ​ពាណិជ្ជកម្ម។

លោកស្រី រ៉ាយ រ៉ានី ប្រធាន​ផ្នែក​ថ្នាំជក់​ និង​គ្រឿង​ស្រវឹង​នៃ​មជ្ឈមណ្ឌល​ជាតិ​លើក​កម្ពស់​សុខភាព​នៃ​ក្រសួង​សុខាភិបាល​ថ្លែង​ថា​រដ្ឋមន្ត្រី​លោក ម៉ម ប៊ុនហេង បាន​ប្រជុំ​បញ្ចប់​សេចក្តី​ព្រាង​ច្បាប់​ផលិតផល​គ្រឿង​ស្រវឹង​នេះ​កាលពី​ថ្ងៃ​ទី​ ៨ កក្កដា ជាមួយ​មន្ត្រី​មកពី​អន្តរក្រសួង​នៃ​រដ្ឋាភិបាល​។

អ្នកស្រី​ថ្លែង​ថា ៖ «គណៈកម្មាធិការ​អន្តរក្រសួង​បាន​ប្រជុំ​បញ្ចប់​សេចក្តី​ព្រាង​ច្បាប់​នេះ​ហើយ​ ហើយ​ត្រៀម​បញ្ជូន​ទៅកាន់​គណៈរដ្ឋមន្ត្រី​ដើម្បី​ធ្វើការ​អនុម័ត​នា​ពេល​ឆាប់ៗ​នេះ។ ច្បាប់​នេះ​ចែង​ពី​ការ​ហាម​លក់​ដល់​ជន​អាយុ​ក្រោម​ ២១ ​ឆ្នាំ និង​ស្ត្រី​មាន​ផ្ទៃពោះ​ជាដើម​»​។

ទោះ​យ៉ាងណា​សេចក្តី​ព្រាង​ច្បាប់​មិន​ត្រូវ​បាន​បញ្ចេញ​ជា​សាធារណៈ​ឡើយ។

បើ​តាម​លោក មុំ គង់ ប្រធាន​អង្គការ​ចលនា​ដើម្បី​សុខភាព​កម្ពុជា (CMH) ថ្លែង​ថា​ច្បាប់​នេះ​មាន​ចំណុច​ផ្តោត​សំខាន់​ចំនួន​ ៤ គឺ ​«១.ដំឡើង​ពន្ធ ២.ពាណិជ្ជកម្ម ៣.កំហិត​នៃ​ការ​លក់ និង​៤. អាយុ​អប្បបរមា​នៃ​អ្នក​ប្រើប្រាស់»។

ប្រធាន​អង្គការ​ CMH ដែល​ធ្វើការ​ជាមួយ​រដ្ឋាភិបាល​ជាច្រើន​ក្នុង​ការ​ផ្តល់​យោបល់​លើ​ច្បាប់​មួយ​នេះ​បាន​ផ្តល់​តម្លៃ​សំខាន់​ដើម្បី​ឲ្យ​មាន​សេចក្តី​ព្រាង​ច្បាប់​នៃ​ផលិតផល​គ្រឿង​ស្រវឹង​គួរតែ​អនុម័ត​បាន​ឆាប់​ដោយសារ​តាម​ការ​សិក្សា​កន្លង​មក ៩៦ ​ភាគរយ​នៃ​ប្រជាពលរដ្ឋ​ពិតជា​ចង់​បាន​ច្បាប់​នេះ​ដែល​ជា​ផ្នែក​មួយ​នៃ​ការ​គ្រប់គ្រង​គ្រឿង​ស្រវឹង និង​រួម​ចំណែក​កាត់បន្ថយ​ការ​ស្លាប់​ជា​រៀងរាល់​ឆ្នាំ​ពី​គ្រោះថ្នាក់​ចរាចរណ៍​ដោយសារ​ឥទ្ធិពល​នៃ​គ្រឿង​ស្រវឹង។

បើ​ប្រៀបធៀប​នឹង​ច្បាប់​ស្តី​សមាគម​ និង​អង្គការ​មិនមែន​រដ្ឋាភិបាល​ដែល​កំពុង​​មាន​បញ្ហា​ចម្រូងចម្រាស​រវាង​សង្គម​ស៊ីវិល និង​រដ្ឋាភិបាល​លោក មុំ គង់ ថ្លែង​ថា៖ «យើង​ពិត​ជា​មើល​ឃើញ​ថា​រដ្ឋាភិបាល​មាន​ឆន្ទៈ​ដើម្បី​ជំរុញ​ច្បាប់​នេះ​ឲ្យ​ចេញ។ ខ្ញុំ​គិត​ថា​វា​ប្រសើរ​បើ​មាន​ច្បាប់​គ្រឿង​ស្រវឹង​ជា​ជាង​មាន​ច្បាប់​ NGO »​។

តាម​ការ​សិក្សា​របស់​សាកលវិទ្យាល័យ​ភូមិន្ទ​ភ្នំពេញ​កន្លង​មក​ធ្វើ​ឡើង​នៅ​ចុង​ឆ្នាំ​ ២០១៤ និង​មាន​ការ​គាំទ្រ​ពី​អង្គការ​ CMH ​មួយ​ផង​ដែរ​ឲ្យ​ដឹង​ថា​មាន​ពលរដ្ឋ​ពេញ​វ័យ​លើស​ពី​ ៥០ ​ភាគរយ​បាន​ទទួលទាន​គ្រឿងស្រវឹង​ក្នុង​រយៈពេល ១២ ខែ​ចុងក្រោយ​ក្នុង​នោះ​មាន បុរស​ ៧៣ ភាគរយ ឯ​ស្ត្រី​មាន ២៣ ភាគរយ។

ពលរដ្ឋ​ ៧៥ ​ភាគរយ​ក៏​បាន​គាំទ្រ​ឲ្យ​រាជរដ្ឋាភិបាល​ដំឡើង​ពន្ធ​ផលិតផល​គ្រឿងស្រវឹង​ហើយ​ភាគច្រើន​លើសលប់​ចង់​ឲ្យ​រដ្ឋាភិបាល​ពន្លឿន​ច្បាប់​ស្តីពី​ការ​គ្រប់គ្រង​ផលិតផល​គ្រឿង​ស្រវឹង​៕

អត្ថបទគួរចាប់អារម្មណ៍