.jpg)
កម្មកររោងចក្រ ១ នៅចាក់អង្រែលើ ខណ្ឌមានជ័យពេលចេញសម្រាកពីការងារពីថ្ងៃទី ៩ ធ្នូ។ ហេង ជីវ័ន
ភ្នំពេញៈ គណៈកម្មាធិការគោលនយោបាយ សេដ្ឋកិច្ច និងហិរញ្ញវត្ថុបានពិនិត្យ និងសម្រេចបញ្ជូនសេចក្ដីព្រាងច្បាប់ស្ដីពីវិសោធនកម្មច្បាប់ស្ដីពីការងារទៅទីស្ដីការគណៈរដ្ឋមន្ត្រីដើម្បីអនុម័តកាលពីសប្តាហ៍មុន ប៉ុន្តែមន្ត្រីសហជីពសម្ដែងការមិនពេញចិត្តដោយអះអាងថា ច្បាប់នេះធ្វើខាតផលប្រយោជន៍កម្មករ។
គណៈកម្មាធិការគោលនយោបាយ សេដ្ឋកិច្ច និងហិរញ្ញវត្ថុដឹកនាំដោយឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីពីថ្ងៃទី ២៤ ធ្នូ បានបើកកិច្ចប្រជុំគណៈកម្មាធិការ ដើម្បីពិនិត្យ និងពិភាក្សាលើ «សេចក្ដីព្រាងច្បាប់ស្ដីពីវិសោធនកម្មច្បាប់ស្ដីពីការងារ និងច្បាប់ស្ដីពីវិសោធនកម្មច្បាប់ស្ដីពីការងារ» នៅក្រសួងសេដ្ឋកិច្ច និងហិរញវត្ថុ។
បើតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ សេចក្ដីព្រាងច្បាប់ស្ដីពីវិសោធនកម្មច្បាប់ស្ដីពីការងារ ផ្ដោតលើចំណុចសំខាន់ចំនួន ៣ រួមមានការកែសម្រួលបទប្បញ្ញតិពាក់ព័ន្ធនឹងវេនការងារ ការពង្រឹងវិសាលភាពរបស់ក្រុមប្រឹក្សាអាជ្ញាកណ្ដាល និងទិដ្ឋភាពទាក់ទាញ និងប្រកួតប្រជែង។ ការកែប្រែទាំងនេះគឺដើម្បីឱ្យច្បាប់កម្ពុជាមានលក្ខណៈប្រដំប្រសងជាមួយប្រទេសក្នុងតំបន់ក្នុងការកែលម្អបរិយាកាសការងារ។
សេចក្ដីប្រកាសព័ត៌មានសរសេរថា៖ «កែសម្រួលបទប្បញ្ញត្តិពាក់ព័ន្ធនឹងវេនការងារ ដើម្បីបង្កើនភាពទាក់ទាញឧស្សាហកម្មទំនើបដូចជារោងចក្រផលិតបរិក្ខារអគ្គិសនី គ្រឿងអេឡិចត្រូនិក និងការកែច្នៃម្ហូបអាហារជាដើម និងបង្កើនការងារជូនប្រជាពលរដ្ឋ។ ពង្រីកវិសាលភាពសេវាកម្មរបស់ក្រុមប្រឹក្សាអាជ្ញាកណ្ដាលក្នុងការដោះស្រាយវិវាទការងារបុគ្គលសំដៅពង្រឹងប្រសិទ្ធភាពនៃយន្តការដោះស្រាយវិវាទការងារ ឱ្យកាន់តែធានាបាននូវសុខុដុមរមនាក្នុងទំនាក់ទំនងវិជ្ជាជីវៈ»។
សេចក្ដីប្រកាសព័ត៌មានបន្តថា សេចក្ដីព្រាងច្បាប់នេះក៏ធ្វើឡើងដើម្បីគិតគូរទិដ្ឋភាពផ្សេងៗដើម្បីឆ្លើយតបទៅនឹងការវិវឌ្ឍផ្នែកសង្គមសេដ្ឋកិច្ចកម្ពុជា ដើម្បីលើកកម្ពស់ផលិតភាពការងារ និង ពង្រឹងភាពប្រកួតប្រជែងសេដ្ឋកិច្ចកម្ពុជាទាំងក្នុងតំបន់ និងសកលលោក។
នេះជាលើកទី ៣ ហើយដែលប្រទេសកម្ពុជា ធ្វើវិសោធនកម្មច្បាប់ស្ដីពីការងារ បន្ទាប់ពីច្បាប់នេះត្រូវបានប្រកាសឱ្យប្រើកាលពីឆ្នាំ ១៩៩៧។ ការធ្វើវិសោធនកម្មច្បាប់នេះត្រូវបានធ្វើនៅឆ្នាំ ២០០៧ និងលើកទី ២ នៅឆ្នាំ ២០១៨។
កាលពីកន្លងទៅមន្ត្រីសហជីពការងារបានបញ្ជាក់ថា ការធ្វើវិសោធនកម្មច្បាប់ការងារនេះនឹងធ្វើឱ្យកម្មករកម្មការិនីដែលធ្វើការវេនយប់ត្រូវបានបន្ថយអត្ថប្រយោជន៍ពី ១៣០ ភាគរយ មក ១០០ ភាគរយដូចវេនពេលថ្ងៃ។ ក្រៅពីនេះ ថ្ងៃឈប់សម្រាកថ្ងៃបុណ្យដែលចំថ្ងៃឈប់សម្រាកស្រាប់ នឹងមិនមានការលើកទៅថ្ងៃបន្ទាប់ទៀតទេ។
ក្រសួងសេដ្ឋកិច្ច និងហិរញ្ញវត្ថុបញ្ជាក់ថាលោក អូន ព័ន្ធមុនីរ័ត្ន បានណែនាំឱ្យក្រុមការងារធ្វើការកែសម្រួលឯកសារនេះស្របតាមស្មារតីនៃកិច្ចប្រជុំដើម្បីបន្តនីតិវិធីគោរពស្នើសុំការអនុម័តពីរាជរដ្ឋាភិបាល។ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈដែលបានចូលរួមក្នុងកិច្ចប្រជុំនោះដែរ បានបង្ហោះសារនៅលើទំព័រហ្វេសប៊ុករបស់លោកថា៖ «ជាលទ្ធផល អង្គប្រជុំបានឯកភាពលើសេចក្ដីព្រាងច្បាប់ដើម្បីដាក់ជូនកិច្ចប្រជុំពេញអង្គគណៈរដ្ឋមន្ត្រីសម្រេច»។
កាលពីខែកញ្ញា លោក អ៊ិត សំហេង បានបញ្ជាក់ថា ការកែសម្រួលអត្រាប្រាក់ឈ្នួលការងារពេលយប់ គឺដើម្បីបង្កើត និងបង្កើនឱកាសការងារកាន់តែសម្បូរបែបជូនដល់ប្រជាពលរដ្ឋខ្មែរ និងចូលរួមចំណែកអភិវឌ្ឍសេដ្ឋកិច្ចកម្ពុជា។
លោកថា ចំណុចនៃវិសោធនកម្មនេះមិនប៉ះពាល់ដល់ផលប្រយោជន៍របស់កម្មករ និយោជិត ដែលកំពុងបម្រើការងារជាការងារពេលយប់ម្តងម្កាល ឬឆ្លាស់វេនគ្នានោះទេ ដោយសារចំណុចនេះអនុវត្តចំពោះតែកម្មករនិយោជិតដែលបំពេញការងារពេលយប់ជាប្រចាំតែប៉ុណ្ណោះ។
ទោះយ៉ាងណាប្រធានសហភាពចលនាកម្មករកម្ពុជាលោក ប៉ាវ ស៊ីណា ថ្លែងថា សហជីពដែលជាតំណាងកម្មករមិនយល់ស្របគំនិតផ្ដួចផ្ដើមរបស់ក្រសួងការងារក្នុងការធ្វើវិសោធនកម្មចំណុចទាំងនេះទេ។ កន្លងមកក្រុមសហជីពបានដាក់ញត្តិទៅក្រសួងការងារដើម្បីជំទាស់នឹងសេចក្ដីព្រាងច្បាប់នេះ និងស្នើសុំឱ្យរក្សាច្បាប់ការងារដូចដើម។ ក្រសួងបានកាត់បន្ថយថ្ងៃបុណ្យ និងកាត់បន្ថយអត្ថប្រយោជន៍ជាច្រើនហើយក្នុងអំឡុងកូវីដ ១៩។
លោកថ្លែងថា៖ «ភាពទាក់ទាញសម្រាប់អ្នកវិនិយោគមិនមែនសំដៅលើតែផលប្រយោជន៍ទាប [សម្រាប់កម្មករ] ទើបធ្វើឱ្យអ្នកវិនិយោគគេចង់មករកស៊ីទេ។ ភាពទាក់ទាញអាស្រ័យលើកត្តានយោបាយ ស្ថិរភាពក្នុងប្រទេស និងកត្តាតំបន់ភូមិសាស្ត្រ រួមទាំងកម្លាំងពលកម្មនៅខ្មែរយើង និងជំនាញ។ បងប្អូនយើងដែលគាត់ធ្វើការរាប់ឆ្នាំហើយ មានសមត្ថភាពគ្រប់គ្រាន់ ហើយគាត់អាចធ្វើបានតាមតម្រូវការដែលប្រទេសជិតខាង និងអ្នកជំនួញមើលឃើញថា កម្មករ ខ្មែរយើងមានសមត្ថភាពគ្រប់គ្រាន់»។
លោកចោទជាសំណួរថា ហេតុអ្វីបានជាប្រទេសផ្សេងដែលមានប្រាក់ឈ្នួលច្រើនជាងកម្ពុជា គេនៅតែអាចទាក់ទាញអ្នកវិនិយោគបាន។ ការទាក់ទាញវិនិយោគមិនគួរធ្វើឡើងតាមរយៈការកាត់បន្ថយផលប្រយោជន៍កម្មករជាបន្តបន្ទាប់នោះទេ ហើយការកាត់បន្ថយផលប្រយោជន៍របស់កម្មករ ផ្ទុយទៅវិញអាចធ្វើឱ្យប៉ះពាល់ដល់ផលិតភាពរបស់កម្មករ-កម្មការិនី៕
