.jpg)
ភ្នំពេញៈ សាលាដំបូងរាជធានីភ្នំពេញកាលពីថ្ងៃទី ២៣ កញ្ញា បានប្រកាសសាលក្រមផ្តន្ទាទោសលើទណ្ឌិតឈ្មោះ សោម ឯក ដាក់ពន្ធនាគារកំណត់រយៈពេល ១១ ឆ្នាំ និងឈ្មោះ ហូរ សម្បត្តិ ដាក់ពន្ធនាគារកំណត់ ១៣ ឆ្នាំក្រោមការចោទប្រកាន់ក្នុងសំណុំរឿងពាក់ព័ន្ធនឹង «មនុស្សឃាត» ទាក់ទងមរណភាពជនរងគ្រោះ។
កាលពីថ្ងៃទី ១៨ ខែសីហា ឆ្នាំ ២០០០ ទណ្ឌិតឈ្មោះ សោម ឯក និងបក្ខពួកឈ្មោះ ហូរ សម្បត្តិ បានរួមគំនិតគ្នាប្រព្រឹត្តបទល្មើសធ្វើមនុស្សឃាតលើជនរងគ្រោះម្នាក់ដោយប្រើដាវចាក់ពីក្រោយបណ្តាលឲ្យស្លាប់ជនរងគ្រោះដែលហេតុការណ៍នេះកើតឡើងនៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
នៅពេលទាក់ទងសួរអំពីការអូសបន្លាយច្រើនឆ្នាំរួចមកហើយទើបតែតុលាការសម្រេចប្រកាសសាលក្រមផ្តន្ទាទោសលើបុគ្គលទាំង ២ នេះកាលពីថ្ងៃទី ២៣ កញ្ញានោះ។
លោក ជិន ម៉ាលីន អ្នកនាំពាក្យក្រសួងយុត្តិធម៌ និង លោក អ៊ី រិន្ទ អ្នកនាំពាក្យសាលាដំបូង រាជធានីភ្នំពេញកាលពីថ្ងៃអង្គារម្សិលមិញបានបដិសេធធ្វើអត្ថាធិប្បាយជុំវិញករណីការប្រកាសសាលក្រមខាងលើនេះ។
លោក សួស វិទ្យារ៉ាន់ឌី អ្នកនាំពាក្យសាលាដំបូងរាជធានីភ្នំពេញបានថ្លែងថា លោក យិន សារឿន ចៅក្រមជំនុំជម្រះសាលាដំបូងរាជធានីភ្នំពេញកាលពីព្រឹកថ្ងៃទី ២៣ ខែកញ្ញា ឆ្នាំ ២០១៩ បានប្រកាសសាលក្រមផ្តន្ទាទោសលើទណ្ឌិតឈ្មោះ សោម ឯក ដាក់ពន្ធនាគារកំណត់ ១១ ឆ្នាំក្រោមការចោទប្រកាន់ពីបទ «សមគំនិតក្នុងអំពើឃាតកម្ម»។ ជាមួយគ្នានោះទណ្ឌិតឈ្មោះ ហូរ សម្បត្តិ ត្រូវបានផ្តន្ទាទោស ១៣ ឆ្នាំក្នុងបទល្មើសពាក់ព័ន្ធនឹង «មនុស្សឃាត»។
ប៉ុន្តែលោកមិនបានបញ្ជាក់ពីមូលហេតុដែលតុលាការទើបសម្រេចប្រកាសសាលក្រមផ្តន្ទាទោសជនទាំង ២ នៅថ្ងៃខាងលើនោះទេ។
លោក សោម ឯក ត្រូវបានផ្តន្ទាទោសដាក់ពន្ធនាគារចំនួន ២៨ ឆ្នាំទាក់ទងទៅនឹងការបណ្តុះបណ្តាលភេរវករ និងបានបង្កៃគ្រាប់បែក ១ គ្រាប់នៅមុខក្រសួងការពារជាតិ និងបង្កៃគ្រាប់បែក ២ គ្រាប់ទៀតនៅជិតស្ថានីយទូរទស្សន៍ប៉ុស្តិ៍លេខ ៣ ក្នុងឆ្នាំ ២០០៩។ ជាងនេះទៀតលោកត្រូវបានផ្តន្ទាទោសដាក់ពន្ធនាគារចំនួន ១៨ ឆ្នាំបន្ថែមទៀតទាក់ទងទៅនឹងការបង្កៃគ្រាប់បែកប៉ុនប៉ងបំផ្លាញស្តូបមិត្តភាពកម្ពុជា-វៀតណាមក្នុងឆ្នាំ ២០០០។
គួរបញ្ជាក់ទៀតថាកាលពីយប់ថ្ងៃទី ៨ ខែតុលា ឆ្នាំ ២០១៦ ខណៈពេលទណ្ឌិតឈ្មោះ សោម ឯក ទៅសម្រាកព្យាបាលជំងឺនៅមន្ទីរពេទ្យមិត្តភាពកម្ពុជា-សូវៀត ពេលនោះទណ្ឌិតឈ្មោះ សោម ឯក បានប្រព្រឹត្តបទល្មើសមួយទៀត គឺបុរសរូបនេះលួចរត់គេចខ្លួនតែត្រូវបានសមត្ថកិច្ចចាប់ខ្លួនមកវិញនៅថ្ងៃទី ២៦ ខែតុលា ឆ្នាំ ២០១៦ នៅខេត្តសៀមរាប៕
