The Phnom Penh Post Search

Search form

Logo of Phnom Penh Post newspaper Phnom Penh Post - សំណង់​បុរាណ​ខ្មែរ​ ២ ​នៅ​វត្ត​លង្កា​កំពុង​ជួសជុល​ដោយ​ត្រូវ​រក្សា​លំនាំ​ដើម

សំណង់​បុរាណ​ខ្មែរ​ ២ ​នៅ​វត្ត​លង្កា​កំពុង​ជួសជុល​ដោយ​ត្រូវ​រក្សា​លំនាំ​ដើម

Content image - Phnom Penh Post
សំណង់​បុរាណ​ក្នុង​វត្តលង្កា​ដែល​កំពុង​ត្រូវបាន​ជួសជុល​ពីថ្ងៃ​ ១០ ​មីនា​ ២០២១ ​។ ហ៊ាន រង្សី

សំណង់​បុរាណ​ខ្មែរ​ ២ ​នៅ​វត្ត​លង្កា​កំពុង​ជួសជុល​ដោយ​ត្រូវ​រក្សា​លំនាំ​ដើម

ភ្នំពេញៈ សំណង់​ស្ថាបត្យកម្ម​បុរាណ​ខ្មែរ​បែប​ព្រះពុទ្ធសាសនា​ចំនួន​ ២ ​នៅ​វត្ត​លង្កា​ក្នុង​ខណ្ឌដូនពេញ​ត្រូវបាន​ជួសជុល​ឡើងវិញ​ដោយ​ត្រូវ​រក្សា​តាម​លំនាំ​ដើម ខណៈ​គិត​ចាប់តាំងពី​ឆ្នាំ​ ២០១៩ ​មក ក្រុម​អ្នកជំនាញ​បាន​ស្រង់​ចំនួន​សំណង់​បុរាណ​ដើម្បី​ធ្វើការ​ជួសជុល និង​អភិរក្ស​បាន​ចំនួន​ ៩១ ​វត្ត​ហើយ​។

ព្រះតេជគុណ ហួរ សារិទ្ធ មេកុដិ​វត្តលង្កា​មាន​ថេរដីកា​ថា កុដិ​ដែល​កំពុងធ្វើការ​ជួសជុល​នៅ​វត្ត​លង្កា​មាន​ចំនួន​ ២ ដែល​កុដិ​នោះ​មាន​ចំនួន​ទទឹង ៦ ​ម៉ែត្រ បណ្តោយ​ ១២ ​ម៉ែត្រ និង​កម្ពស់ ៧ ​ម៉ែត្រ​នេះ គឺមាន​ ២ ​ជាន់​។ ជាន់ក្រោម​ធ្វើ​ពី​ថ្ម ផ្នែក​ខាង​លើ​ធ្វើ​ពី​ឈើ​។ កុដិ​នេះ​ចាប់ផ្តើម​កសាង​ដោយ​ព្រះមហា​បណ្ឌិត ឈឹម ទូច ដែល​លោក​ជា​ធម្មកធិក​ និង​ជា​បញ្ញវន្ត​ខ្មែរ ១ ​អង្គ​ក្នុង​ព្រះពុទ្ធសាសនា​។

ព្រះអង្គ​បញ្ជាក់ថា កុដិ​ទាំង​ ២ ​នេះ​ត្រូវបាន​កសាង​ឡើង​នៅក្នុង​ឆ្នាំ​ ១៩៣១ ​ដែល​គិត​រហូត​មក​ដល់​បច្ចុប្បន្ននេះ​មាន​អាយុកាល​ ៩០ ​ឆ្នាំ​ហើយ​។ សម្រាប់​ការជួសជុល​ឡើងវិញ​នេះ គឺ​នៅតែ​រក្សាបាន​នូវ​ទម្រង់​ក្បាច់រចនា​ដើម ដែល​បង្ហាញ​ពី​វប្បធម៌ និង​អារ្យធម៌​ខ្មែរ​មិនឱ្យ​បាត់បង់​នោះទេ​។

ព្រះតេជគុណ​បន្តថា​៖ «​លក្ខណ​ពិសេស​របស់​កុដិ​នេះ​គឺ ១ បាំង​ខាងមុខ​ធ្វើ​ពី​បេតុង ខាងក្រោយ​ធ្វើ​ពី​ឈើ​ ១ ​កំណាត់​ខាងក្រោម បាយអ​នៅ​ពី​ខាង លើ​គឺ​ផ្ទះ​ឈើ​។ ឯ​លក្ខណ​ពិសេស​គឺ​ក្បាច់​ដែល​នៅខាងមុខ ហ្នឹងឯង​គឺមាន​និមិត្តសញ្ញា​មួយ​ដែល​ប្រតិស្ឋាន​នៅ​នឹង​កុដិ​ហ្នឹង​គេ​ហៅថា ព្រះកាល​។ អ៊ីចឹង វា​មាន​រចនាប័ទ្ម​មួយ​ប្លែក​ជាង​រចនាប័ទ្ម​នៃ​សំណង់​បុរាណ​ផ្សេងៗ​ទៀត​»​។

បើតាម​ព្រះតេជគុណ​ ហួរ សារិទ្ធ វត្តលង្កា​ជា​ទិសដៅ​ទេសចរណ៍​មួយ​នៅក្នុង​ទិសដៅ​ផ្សេងៗ​ទៀត​ក្នុង​រាជធានី​ភ្នំពេញ ដែល​មាន​ការគាំទ្រ​ច្រើន​ពី​ជនបរទេស​។ ព្រះអង្គ​លើកឡើង​ថា​៖ «​បរទេស​ភាគច្រើន​ដែល​គេ​ចូលមក​វត្ត​លង្កា​ក្រៅ​អំពី​មើល​រចនាប័ទ្ម​ព្រះវិហារ ក៏​ភ្ញៀវទេសចរ​មក​ទស្សនា​កុដិ​ហ្នឹង​ហើយ​ថតរូប​ទុកជា​អនុស្សាវរីយ៍​។ ដល់​ឥឡូវ​ហ្នឹង​បាន​អ្នក​សប្បុរសជន ឧបត្ថម្ភ​ និង​ជួសជុល​កែលម្អ​ទៅ​រឹតតែ​ស្អាត​ថែមទៀត​។ អាត្មា​គិតថា ក្រោយ​ជួសជុល​ហើយ កុដិ​នេះ​អាច​តាំងនៅ​បន្តបាន​ ១០ ​ទៅ​ ២០ ​ឆ្នាំ​ទៀត​»​។

លោក អ៊ិន សុវណ្ណ អនុប្រធាន​នាយកដ្ឋាន​គាំពារ និង​អភិរក្ស​សំណង់​បុរាណ​នៃ​ក្រសួង​វប្បធម៌​បាន​សម្តែង​ការគាំទ្រ​ចំពោះ​ចៅអធិការ​វត្តលង្កា​ដែល​អនុញ្ញាត​ឱ្យមាន​ការជួសជុល​ឡើងវិញ​នូវ​សំណង់​បុរាណ​ដោយ​រក្សាបាន​នូវ​ទ្រង់ទ្រាយ​ដើម​។

លោក​ថា​៖ «​យើង​សំណូមពរ​ទៅកាន់​វត្ត​នៅ​ទូទាំង​ប្រទេស បើសិន​ជា​ត្រូវការ​ជួសជុល​ក្នុង​ទ្រង់ទ្រាយ​តូច ឬ​ធំ​ក៏ដោយ​ត្រូវ​ដាក់​ពាក្យស្នើសុំ​ទៅខាង​ក្រសួង​ជំនាញ ឬ​មន្ទីរជំនាញ​តាម​ខេត្ត ដើម្បី​មានលទ្ធភាព​ពិនិត្យ​វាយតម្លៃ​បាន​ត្រឹមត្រូវ​»​។

បើតាម​លោក​ សុវណ្ណ គិត​ចាប់ពី​ឆ្នាំ​ ២០១៧ ​មកដល់​ឆ្នាំ​ ២០២១ ​នេះ មន្ត្រី​ជំនាញ​បាន​ចុះទៅ​ធ្វើបញ្ជី​សារពើ​ភណ្ឌ​កំណត់​ទីតាំង​វត្ត​ដែល​ត្រូវធ្វើ​ការអភិរក្ស​បាន​ចំនួន​ ៩១ ​វត្ត ហើយ​នៅ​ចុងឆ្នាំ​ ២០២១ ​នេះ​គ្រោង​នឹងដាក់​បញ្ចូល​វត្ត​ចំនួន ១៥ ​ថែមទៀត​ក្នុង​បញ្ជី​អភិរក្ស និង​ជួសជុល​សំណង់​បុរាណ​។

លោក​ថ្លែងថា​៖ «​សម្រាប់​ ៩១ ​វត្ត​ដែល​បាន​បញ្ចូល​ក្នុង​បញ្ជី​សារពើ​ភណ្ឌ​អភិរក្ស​សំណង់​បុរាណ​ហ្នឹង​មាននៅ​ខេត្ត​កណ្តាល​ចំនួន​ ២៥ ខេត្តបាត់ដំបង​ ១៨ តាកែវ​ ១៤ កំពង់ចាម​ ៨ រាជធានី​ភ្នំពេញ​ ៦ កំពង់ធំ​ ៦ កំពត​ ៣ បន្ទាយ​មានជ័យ​ ២ ត្បូងឃ្មុំ​ ២ ព្រៃវែង​ ២ កំពង់ឆ្នាំង​ ២ ពោធិ៍សាត់​ ១ និង​ខេត្តក្រចេះ​ ១»​។

បើតាម​លោក សុវណ្ណ ការកំណត់​យក​សំណង់​បុរាណ ដើម្បី​រៀបចំ​ជួសជុល និង​អភិរក្ស​ត្រូវ​ពិនិត្យ​ទៅលើ​សំណង់​ដែល​សង់​តាម​ស្ថាបត្យកម្ម​នៅតាម​តំបន់ ក្នុងនោះ​ក៏​មើល​ទៅលើ​ក្បាច់ចម្លាក់​ក្បាច់លម្អ និង​ស្ថានភាព​ទូទៅ​ពី​សំណង់​អគារ​ទាំងនោះ​។ «​យើង​ពិនិត្យ​មើលថា​តើ អគារ​ហ្នឹង វា​ចាស់​ទ្រុឌទ្រោម​ពេក​មិនអាច​ជួសជុល​បាន​ឬ​យ៉ាងណា​? ប៉ុន្តែ​បើ​អគារ​ហ្នឹង​វា​មានលទ្ធភាព​ក្នុង​ការជួសជុល​បន្តទៅទៀត យើង​នឹង​រក​ថវិកា​ដើម្បី​ធ្វើការ​ជួសជុល​តែម្តង​»៕

អត្ថបទគួរចាប់អារម្មណ៍