សៀមរាបៈ អាជ្ញាធរជាតិអប្សរា សហការជាមួយរដ្ឋបាលក្រុងសៀមរាបបានចុះរុះរើសំណង់របស់ពលរដ្ឋឈ្មោះ ឃន់ សុខន ដោយនិយាយថា សំណង់នេះបានសង់ខុសច្បាប់ ដែលប៉ុនប៉ងយកទីបុរាណដ្ឋានត្រពាំងហែផ្កាធ្វើជាកម្មសិទ្ធិឯកជននៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប។ ប៉ុន្ដែម្ចាស់សំណង់អះអាងថា ជាដីកេរដំណែលដូនតាខ្លួនបន្សល់ទុកចែកកូនចៅ។
លោក ឡុង កុសល ប្រធាននាយកដ្ឋានផ្សព្វផ្សាយ និងជាមន្ត្រីនាំពាក្យនៃអាជ្ញាធរជាតិអប្សរាថ្លែងពីម្សិលមិញថា អាជ្ញាធរជាតិអប្សរាសហការជាមួយរដ្ឋបាលក្រុងសៀមរាប និងសាលាដំបូងខេត្តសៀមរាបនៅថ្ងៃទី ១ កញ្ញា បានចុះអនុវត្តការរុះរើ សំណង់របស់លោក ឃន់ សុខន មានដូចជា របងថ្ម បន្ទប់ទឹក រោងក្យូស និងបំផ្លាញដំណាំមួយចំនួន ព្រោះបុគ្គលរូបនេះបានធ្វើឡើងខុសច្បាប់ហាក់ដូចជាប៉ុនប៉ងយកដីទីបុរាណដ្ឋានត្រពាំងហែផ្កាធ្វើជាកម្មសិទ្ធិឯកជន។
លោកថាការចុះរុះរើសំណង់ខុសច្បាប់នេះជាលើកទី ២ ដើម្បីការពារការប៉ុនប៉ងយកដីបុរាណដ្ឋានត្រពាំងហែផ្កាដោយខុសច្បាប់មកធ្វើជាកម្មសិទ្ធិឯកជនរបស់ខ្លួន។ ក្រុមការងារចម្រុះបានរុះរើរាបដល់ដី និងការយល់ព្រមបញ្ឈប់ការសាងសង់ទាំងអស់ពីម្ចាស់សំណង់ម្ដងរួចមកហើយកាលពីខែវិច្ឆិកា ឆ្នាំ ២០១៩ ប៉ុន្ដែពលរដ្ឋរូបនេះនៅតែបន្តសាងសង់ម្ដងទៀត។
មន្ត្រីរូបនេះបញ្ជាក់ថា៖ «យើងនៅតែបង្ហាញជំហរថា បើទោះបីជាយ៉ាងណាអាជ្ញាធរត្រូវតែប្រឆាំង ចំពោះអំពើរំលោភបំពានប៉ុនប៉ងយកទីបុរាណដ្ឋានដែលជាទ្រព្យសម្បតិ្តសាធារណៈរបស់រដ្ឋដែលត្រូវការពារជាដាច់ខាត ហើយអ្វីដែលឈ្មោះ ឃន់ សុខន បានធ្វើម្តងជា ២ ដងនេះគឺបានប៉ះពាល់យ៉ាងធ្ងន់ធ្ងរទៅដល់មរតកនៃបេតិកភណ្ឌជាតិរបស់យើង»។
តំណាងរដ្ឋបាលក្រុងសៀមរាបដែលចូលរួមក្នុងប្រតិបត្តិការរុះរើសំណង់នោះ លោក ហៃ យ៉ុង បានថ្លែងពីថ្ងៃទី ១ ខែកញ្ញា ថា អាជ្ញាធរក្រុងសៀមរាបគ្រោងអភិវឌ្ឍទីតាំងដីត្រពាំងហែផ្កា និងលើកតម្លៃទីបុរាណដ្ឋាននេះឡើងវិញនាពេលឆាប់ៗ។ គម្រោងនេះធ្វើតាមរយៈការស្តារត្រពាំងហែផ្កាឲ្យស្អាត ដើម្បីធ្វើជាប្រភពទឹកសម្រាប់អ្នកភូមិបានប្រើប្រាស់ ដោយអាជ្ញាធរក្រុងបានទទួលច្បាប់អនុញ្ញាតជាគោលការណ៍ពីអាជ្ញាធរជាតិអប្សរារួចរាល់ហើយ។
លោកបន្តថា ដីត្រពាំងហែផ្កាមានបណ្តោយ ៣៥០ ម៉ែត្រ ទទឹង ១៧០ ម៉ែត្រ មានខ្នងទំនប់ពី ៤០ ទៅ ៦០ ម៉ែត្រ។ ត្រពាំងនេះមានតាំងពីសម័យអង្គរជាសហគមន៍មនុស្សរស់នៅ ព្រោះមានបំណែកកុលាភាជន៍បុរាណនៅរាយប៉ាយពេញបុរាណដ្ឋាននេះ។ នៅខាងត្បូងត្រពាំងក៏មានប្រាសាទហែផ្កា ១ ដែរដែលធ្វើពីឥដ្ឋ និងជាទីគោរពបូជានៃមនុស្សសម័យនោះ។
លោកថា៖ «អំពើរំលោភបំពានបុរាណដ្ឋានធ្វើជាកម្មសិទ្ធិរបស់ខ្លួន គឺបុគ្គលនោះត្រូវទទួលខុសត្រូវ ចំពោះមុខច្បាប់ទៅតាមស្ថានភាពនៃការបំផ្លាញដែលប៉ះពាល់ដល់សម្បត្តិវប្បធម៌ទាំងនោះ»។
លោក ឃន់ សុខន ជាម្ចាស់សំណង់ដែលសាងសង់នៅលើដីត្រពាំងហែផ្កានេះថ្លែងពីម្សិលមិញ ថាដីទួលត្រពាំងហែផ្កានេះជាដីរបស់ដូនតាលោកបន្សល់ទុកឲ្យតាំងពីដើមរហូតមក។ ប៉ុន្ដែនៅឆ្នាំ ២០១៦ អាជ្ញាធរជាតិអប្សរាអះអាងថា ជាដីស្ថិតក្នុងតំបន់អង្គរវត្ត និងជាកន្លែងអភិរក្សបេតិកភណ្ឌ ហើយតម្រូវឲ្យលោកប្រគល់ដីជូនទៅអាជ្ញាធរជាតិអប្សរាអភិរក្សវិញ។
លោកថាកាលពីឆ្នាំ ២០១៩ លោកបានយល់ព្រមប្រគល់ដីនេះជូនអាជ្ញាធរជាតិអប្សរាហើយ។ កាលនោះលោកក៏យល់ព្រមរុះរើសំណង់របស់លោកទាំងអស់ដោយខ្លួនឯងឲ្យរួចរាល់ត្រឹមថ្ងៃទី ៩ ខែកញ្ញា ខាងមុខនេះ។ ប៉ុន្ដែមិនទាន់ដល់ថ្ងៃកំណត់ផងស្រាប់តែ អាជ្ញាធរជាតិអប្សរាដាក់កម្លាំងសមត្ថកិច្ច និងយកត្រាក់ទ័រមកកាយរុះរើបំផ្លាញរោងក្យូស និងបន្ទប់ទឹករបស់លោក។ លើសពីនេះ អាជ្ញាធរបានបំផ្លាញផលដំណាំ និងដើមឈើហូបផ្លែរបស់លោកជាច្រើនថែមទៀត។
លោក សុខន ប្រាប់ថា៖ «ហើយ ខ្ញុំថាខ្ញុំនឹងដកដំណាំ ដើមឈើហូបផ្លែរបស់ខ្ញុំដោយខ្លួនឯងដែលកំណត់ថ្ងៃត្រឹមត្រូវ តែអាជ្ញាធរបែរជាមកកម្ទេចផលដំណាំខ្ញុំចោលទាំងអស់បែបនេះ ពិតជាអយុត្តិធម៌ខ្លាំងណាស់។ ខ្ញុំសូមសំណូមពរឲ្យអាជ្ញាធរជាតិអប្សរា ចុះអនុវត្តច្បាប់ឲ្យស្មើភាព ព្រោះតំបន់នោះក៏មានពលរដ្ឋរាប់រយគ្រួសារទៀតដែរ។ អ៊ីចឹងត្រូវអនុវត្តច្បាប់ឲ្យដូចខ្ញុំដែរ ហេតុអ្វីអនុវត្តច្បាប់តែមកលើខ្ញុំ»៕