.jpg)
សត្វមាន់ជាង ២ ០០០ ក្បាល នាំចូលមកកម្ពុជាដោយខុសច្បាប់តាមច្រករបៀងតំបន់ ៥ នៅភូមិព្រៃច័ន ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ។ រូបថត សហការី
ភ្នំពេញៈ មន្ត្រីជំនាញនៃអគ្គនាយកដ្ឋានសុខភាពសត្វ និងផលិតកម្មសត្វកាលពីម្សិលមិញបានបូមយកសំណាកឈាមពីសត្វមាន់ជាង ២ ០០០ ក្បាល ដើម្បីពិសោធរកមេរោគផ្សេងៗ បន្ទាប់ពីត្រូវបានគេលួចនាំចូលខុសច្បាប់ពីថៃមកកម្ពុជាកាលពីថ្ងៃសៅរ៍សប្ដាហ៍មុន។
លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍ពីម្សិលថា សត្វមាន់ទាំងនោះត្រូវបានគេដឹកតាមរថយន្ត ១ គ្រឿងចេញពីប្រទេស ថៃចូលមកកម្ពុជាដោយខុសច្បាប់តាមច្រករបៀងតំបន់ ៥ នៅភូមិព្រៃច័ន ឃុំអូរ៣ជាន់ ស្រុកអូរជ្រៅ ខេត្តបន្ទាយមានជ័យ ហើយត្រូវបានមន្ត្រីនាយកដ្ឋានសុខភាពសត្វ និងផលិតកម្មសត្វសហការជាមួយមន្ត្រីនៃមន្ទីរកសិកម្មខេត្តបន្ទាយមានជ័យ និង កងរាជអាវុធហត្ថលើផ្ទៃប្រទេសបង្ក្រាបចាប់បាននៅតាមផ្លូវលេខ ៥៦ ជាប់ព្រំប្រទល់ខេត្តឧត្តរមានជ័យ។
លោក សារ៉ាត់ បានបន្តថាវត្ថុតាងទាំងនោះរួមមាន សត្វមាន់រស់ ២ ១០០ ក្បាល និងរថយន្តដឹកទំនិញ ១ គ្រឿង ត្រូវបានរឹបអូសយកទៅរក្សាទុកនៅអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទដើម្បីចាត់ការតាមនីតិវិធីច្បាប់។ រីឯអ្នកបើកបរ និងអ្នករួមដំណើរម្នាក់ទៀតនៅលើរថយន្តដឹកសត្វមាន់នោះមិនត្រូវបានឃាត់ខ្លួនទេ បើទោះជាពួកគេគ្មានឯកសារផ្លូវច្បាប់ក្ដី។
លោកថា៖ «ពេលនេះមន្ត្រីជំនាញបានបូមឈាមពីសត្វមាន់ទាំងនោះយកទៅពិសោធនៅឡាបូនៃអគ្គនាយកដ្ឋានសុខភាពសត្វ និងផលិតកម្មសត្វរបស់យើងដើម្បីពិនិត្យរករោគសញ្ញាជំងឺឆ្លង។
ក្នុងករណីរកមិនឃើញមានជំងឺឆ្លងនោះ ម្ចាស់ទំនិញ [សត្វមាន់] អាចរួចខ្លួនពីការចោទប្រកាន់តាមផ្លូវច្បាប់ ប៉ុន្តែរងការផាកពិន័យពី ១០-១៥ លានរៀល»។
លោកបានបន្ថែមថា៖ «ក្នុងករណីរកឃើញថា មាន់ទាំងនោះមានផ្ទុកជំងឺឆ្លងត្រូវដុតកម្ទេចចោលហើយក្នុងករណីរកឃើញថា ម្ចាស់ទំនិញដឹងច្បាស់ថា ក្នុងចំណោមសត្វមាន់ទាំងនោះមានជំងឺឆ្លង ហើយនៅតែនាំចូលមកទៀតនោះនឹងត្រូវរងការចោទប្រកាន់តាមមាត្រា ១១៥ នៃច្បាប់ស្ដីពីសុខភាពសត្វ និងផលិតកម្មសត្វដែលប្រឈមនឹងត្រូវផ្ដន្ទាទោសពី ២-៥ ឆ្នាំ និងពិន័យជាប្រាក់ពី ១០-៥០ លានរៀល»។
ជុំវិញករណីនេះផងដែរលោក ហ៊ុយ ទូច ប្រធានការិយាល័យបសុសត្វខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា បទលើ្មសនាំសត្វឆ្លងដែនខុសច្បាប់បានកើតឡើងតាមច្រករបៀងជាញឹកញាប់ បើទោះជាមន្ត្រីជំនាញបង្ក្រាបបានជាបន្តបន្ទាប់ក៏ដោយ។
លោកថា៖ «ជាក់ស្ដែងក្នុងរយៈពេល ១០ ខែក្នុងឆ្នាំនេះ សមត្ថកិច្ចជំនាញក៏បានចាប់ និងដុតបំផ្លាញចោលនូវសាច់សត្វគ្រប់ប្រភេទសរុប ៨ ០៣១ គីឡូក្រាម និងផាកពិន័យបាន ៦៥ លានរៀល»។
បើតាមលោក ទូច ច្រករបៀងកម្ពុជា-ថៃ ក្នុងខេត្តបន្ទាយមានជ័យមានរហូតដល់ ៥៦ និងមានលក្ខណៈស្មុគស្មាញដោយតំបន់ខ្លះមានព្រៃក្រាស់ និងដាច់ឆ្ងាយពីប៉ុស្តិ៍រដ្ឋបាលមូលដ្ឋាន។ ក្រុមជនប្រព្រឹត្តបទល្មើស តែងលួចធ្វើសកម្មភាពនាំចូលនូវសាច់សត្វ និងសត្វរស់ចូលមកក្នុងប្រទេសកម្ពុជាដោយខុសច្បាប់តាមច្រករបៀងទាំងនោះ៕
