ភ្នំពេញៈ សំណុំរឿងគ្រឿងញៀនជិត ១០០ គីឡូក្រាម និងជនជាប់ចោទ ៤ នាក់ ដែលកម្លាំងសមត្ថកិច្ចបង្ក្រាបចាប់ និងរឹបអូសបានកាលពីថ្ងៃទី ២១-២៤ ខែ តុលា ឆ្នាំ ២០១៩ ត្រូវបានផ្ទេរមកកាន់សាលាដំបូងរាជធានីភ្នំពេញ ដើម្បីចាត់ការបន្ដតាមនីតិវិធីច្បាប់។
យោងសេចក្ដីថ្លែងការណ៍របស់អ្នកនាំពាក្យនៃអយ្យការអមសាលាដំបូងខេត្តកំពង់ធំកាលពីថ្ងៃទី ២២ ខែ វិច្ឆិកា ឆ្នាំ ២០១៩ ដែលភ្នំពេញប៉ុស្តិ៍ទើបទទួលបាន បញ្ជាក់ថាជនសង្ស័យក្នុងសំណុំរឿងគ្រឿងញៀនជិត ១០០ គីឡូក្រាម ខាងលើនេះរួមមានឈ្មោះ SAk SAESONG អាយុ ៣២ ឆ្នាំ ជាជនជាតិថៃ, គង់ វណ្ណៈ អាយុ ៤០ ឆ្នាំ, សុខ ប៊ុនសិរិឆ័យ អាយុ ៤២ ឆ្នាំ និងឈ្មោះ លី តឹក អាយុ ៥៣ ឆ្នាំ ទាំង ៣ នាក់ ជាជនជាតិខ្មែរ ដែលតុលាការខេត្តកំពង់ធំបានចោទប្រកាន់ពីបទជួញដូរគ្រឿងញៀន ហើយបានសម្រេចឃុំខ្លួនជាបណ្ដោះអាសន្ននៅពន្ធនាគារខេត្តកំពង់ធំនោះក៏ត្រូវបានផ្ទេរមកកាន់ពន្ធនាគារព្រៃស (ម ១) ក្នុងរាជធានីភ្នំពេញផងដែរ។
លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំបានប្រាប់ភ្នំពេញប៉ុស្តិ៍នៅថ្ងៃអាទិត្យថា ការផ្ទេរសំណុំរឿងគ្រឿងញៀនដ៏ធំមួយនេះ រួមទាំងជនត្រូវចោទមកកាន់រាជធានីភ្នំពេញ គឺដើម្បីសម្រួលដល់ការងារស៊ើបអង្កេតរបស់មន្ត្រីជំនាញ។ ម្យ៉ាងទៀតជនត្រូវចោទទាំង ៤ នាក់ត្រូវបានគេសង្ស័យថា មានជាប់ពាក់ព័ន្ធទៅនឹងបណ្ដាញក្រុមឧក្រិដ្ឋជនគ្រឿងញៀនឆ្លងដែនថ្មីមួយផ្សេងទៀតដែលមានមូលដ្ឋាននៅក្នុងប្រទេសថៃ ព្រោះតាមចម្លើយសារភាពរបស់ពួកគេគ្រឿងញៀនទាំងនោះបាននាំចូលមកកម្ពុជាតាមច្រកព្រំដែនប្រទេសថៃ។
លោកបញ្ជាក់ថា៖ «សំណុំរឿងនេះកំពុងស្ថិតក្រោមយុត្តាធិការនៃការស៊ើបអង្កេតរបស់តុលាការ និងសមត្ថកិច្ចជំនាញនៃមន្ទីរប្រឆាំងគ្រឿងញៀននៃអគ្គស្នងការនគរបាលជាតិ ដូច្នេះការផ្ទេរសំណុំរឿង និងជនត្រូវចោទទៅកាន់រាជធានីភ្នំពេញគឺដើម្បីសម្រួលដល់ការងារស៊ើបអង្កេតរបស់សមត្ថកិច្ចជំនាញ»។
ដោយឡែកកម្លាំងកងរាជអាវុធហត្ថខេត្តតាកែវកាលពីរសៀលថ្ងៃសៅរ៍បានបង្ក្រាបចាប់បុរសម្នាក់ដោយរឹបអូសនូវវត្ថុតាងកញ្ឆាក្រៀមទម្ងន់ ៩៨ គីឡូក្រាម និងបានចុះបង្ក្រាបទីតាំងដាំដំណាំកញ្ឆាខុសច្បាប់មួយកន្លែងទៀតនៅតាមជ្រលងភ្នំបាយ៉ង់កោ ស្ថិតក្នុងភូមិឈើទាលភ្លោះ ឃុំស្រែអំពក ស្រុកគិរីវង់ដោយបានកាប់ និងដុតបំផ្លាញដំណាំកញ្ឆាជាង ៣០០០ ដើម។
លោក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវបានប្រាប់ភ្នំពេញប៉ុស្តិ៍នៅថ្ងៃអាទិត្យថា ជនសង្ស័យឈ្មោះ ធឹម ណា អាយុ ២៨ ឆ្នាំ ជាអ្នករស់នៅភូមិ-ឃុំកើតហេតុខាងលើត្រូវបានកម្លាំងសមត្ថកិច្ចកងរាជអាវុធហត្ថខេត្តតាកែវសហការជាមួយកម្លាំងកងរាជអាវុធហត្ថមូលដ្ឋានស្រុកគិរីវង់ចាប់ឃាត់ខ្លួន ខណៈកំពុងរៀបចំដឹកជញ្ជូនកញ្ឆាក្រៀមចំនួន ១៥ ការុង ដែលមានទម្ងន់ ៩៨ គីឡូក្រាម ដើម្បីនាំចេញទៅលក់បន្តនៅឯព្រំដែនប្រទេស វៀតណាម។
លោកបន្តថា ជាមួយគ្នានេះកម្លាំងកងរាជអាវុធហត្ថខេត្តតាកែវក៏បានចុះបង្ក្រាបនៅទីតាំងដាំកញ្ឆាខុសច្បាប់មួយកន្លែងនៅតំបន់ខាងលើផងដែរ ដោយបានកាប់ និងដុតបំផ្លាញដើមកញ្ឆាចំនួន ៣ ៣៥០ ដើម។ លោកថ្លែងថា៖ «នៅពេលនេះជនសង្ស័យត្រូវបានតុលាការខេត្តតាកែវបង្គាប់ឲ្យនាំយកទៅឃុំខ្លួនជាបណ្ដោះអាសន្នដោយចោទប្រកាន់ពីបទជួញដូរ [កញ្ឆា] រុក្ខជាតិមានសារធាតុញៀន»៕