.jpg)
បុរសជាតិបារាំងដែលរងគ្រោះដោយសាររថយន្តបុក។ រូបថត ហ្វេសប៊ុក
ភ្នំពេញៈ ស្នងការនគរបាលរាជធានីភ្នំពេញ លោក ស ថេត បានបញ្ជាក់ពីថ្ងៃទី ៣១ ខែធ្នូ ថា សំណុំរឿងក្នុងករណីគ្រោះថ្នាក់ចរាចរណ៍របស់បុរសជនជាតិបារាំងដែលត្រូវបានរថយន្តម៉ាក Range Rover របស់បុរសអ្នកមានម្នាក់បើកបុកគាត់បណ្តាលឲ្យរបួសបាក់ជើងម្ខាងកាលពីចុងខែវិច្ឆិកាឆ្នាំមុននោះ ត្រូវបានបញ្ជូនទៅកាន់សាលាដំបូងរាជធានីភ្នំពេញហើយ។
ការបញ្ជាក់របស់លោកស្នងការបែបនេះ បន្ទាប់ពីលោក Jean Yves Dekeister បានអំពាវនាវដល់អាជ្ញាធរមានសមត្ថកិច្ច ពាក់ព័ន្ធគ្រប់ស្ថាប័នឲ្យមេត្តាជួយរកយុត្តិធម៌ជូនរូបលោក បន្ទាប់ពីរូបលោកត្រូវបានរថយន្ត Range Rover ពណ៌សបានបើកបុកគាត់បណ្តាលឲ្យពិការជើងឆ្វេង ខណៈលោកកំពុងជិះម៉ូតូនៅក្នុងបុរីប៉េងហួត បឹងស្នោ ទៅបំពេញការងារកាលពីថ្ងៃទី ២៩ ខែ វិច្ឆិកា ឆ្នាំ ២០១៩។
លោក ស ថេត បញ្ជាក់ថា៖ «ភាគីទាំង ២ មិនត្រូវគ្នា ដោយគាត់ (Jean Yves Dekeister) ទាមទារគេរហូតដល់ទៅ ៣ ទៅ ៤ ម៉ឺនដុល្លារ ហើយករណីសំណុំរឿងហ្នឹងត្រូវបានគេបញ្ជូនទៅកាន់ សាលាដំបូងរាជធានីភ្នំពេញ ខណៈពេលដែលជនបង្កបានរត់គេចខ្លួនបាត់ហើយ។ ឡានក៏បើកលឿន ម៉ូតូក៏បើកលឿនដែរ។ យើងបញ្ជូនទៅតុលាការហើយតុលាការជាអ្នកចាត់ចែងករណីខាងលើ»។
លោក សែម គន្ធា នាយការិយាល័យចរាចរណ៍ក្រុងភ្នំពេញថ្លែងថា ការិយាល័យចរាចរណ៍ក្រុងភ្នំពេញបានជួយព្យាយាមសម្របសម្រួលចំនួន ២ លើករួចមកហើយរវាងលោក Jean Yves Dekeister និងអ្នកបើករថយន្តម៉ាក Range Rover ប៉ុន្តែភាគីទាំង ២ មិនត្រូវគ្នា។
លោកបញ្ជាក់ថា៖ «គាត់ទាមទារ ជនបង្ករហូតដល់ទៅ ៤ ម៉ឺនដុល្លារ ហើយនិងបានស្នើសុំប្រាក់ជំងឺចិត្តទៀត និងការខាតពេលវេលារបស់គាត់។ យើងបានបញ្ជូនសំណុំរឿងនេះទៅកាន់តុលាការហើយតាមការស្នើសុំរបស់លោក Jean Yves Dekeister ប្រហែល ២ អាទិត្យ»។
លោកបន្ថែមថា រថយន្តបើកបរមិនគោរពស្តាំដៃ ហើយម៉ូតូបើកលឿនលើផ្លូវខ្វែង។ ទោះយ៉ាងណាលោកបានបដិសេធបង្ហាញអត្តសញ្ញាណ អ្នកដែលបានបើករថយន្តម៉ាក Range Rover បុកទៅលើលោក Jean Yves Dekeister ដោយអះអាងថាជាការសម្ងាត់របស់សមត្ថកិច្ច។
លោក Jean Yves Dekeister ជាជនជាតិបារាំងដែលបានចូលមកកម្ពុជាតាំងពីឆ្នាំ ១៩៩១ ហើយតែងតែជួយដល់អ្នកក្រីក្រ លំបាក តាមសហគមន៍ផ្សេងៗបានថ្លែងនៅលើគណនីហ្វេសប៊ុករបស់ Marie Thourida Dekeister នៅថ្ងៃទី ២៥ ខែធ្នូ ថា នៅថ្ងៃទី ២៩ ខែ វិច្ឆិកា ឆ្នាំ ២០១៩ វេលាប្រហែលម៉ោង ៨ និង ១៥ នាទីព្រឹក រូបលោកកំពុងជិះម៉ូតូនៅក្នុងបុរីប៉េងហួត បឹងស្នោ ទៅបំពេញការងារស្រាប់តែមានរថយន្ត Range Rover ១ គ្រឿងបើកបរយ៉ាងលឿន និងបានបុកពេញទំហឹងដែលបណ្តាលឲ្យបាក់ជើងឆ្វេង។
លោកបញ្ជាក់ថា៖ «នៅសល់តែ ២០០ ទៅ ៣០០ ម៉ែត្រដល់ការិយាល័យ ខ្ញុំក៏បានឆ្លងថ្នល់ធំ ហើយខ្ញុំបានឆ្លងដល់ពាក់កណ្តាលផ្លូវហើយឃើញថា មានឡាន ១ ដែលជិះយ៉ាងលឿន ងាកមកឆ្វេងមកបុកខ្ញុំ ហើយខ្ញុំក៏បាត់ស្មារតី ហើយមួយរយៈពេលខ្លីខ្ញុំក៏បានដឹងខ្លួន ដេកនៅលើថ្នល់ខាងឆ្វេង។ សំណាងល្អមិនធ្ងន់ធ្ងរដល់ក្បាលដោយសារតែមានមួកសុវត្ថិភាព តែខ្ញុំមើលឃើញជើងខ្ញុំសុទ្ធតែឈាម»។
លោកបន្ថែមថា ក្រោយកើតហេតុអ្នករស់នៅម្តុំនោះបានបញ្ជូនលោកទៅកាន់មន្ទីរពេទ្យ ហើយបន្ទាប់ពីពិភាក្សាយោបល់ជាមួយគ្រូពេទ្យជាច្រើនរួចហើយនោះទើបគ្រូពេទ្យសម្រេចកាត់ជើងខាងឆ្វេងរបស់លោក ដោយសារតែមិនអាចទុកបាន។ លោក Dekeister ត្រូវបានក្លាយជាជនពិការជើងម្ខាងអស់ ១ ជីវិតក្នុងពេលមួយប៉ប្រិចភ្នែក ហើយលោកសង្ឃឹមថា ភាគីដែលបង្កហេតុនឹងទទួលខុសត្រូវ ក៏ដូចជាចេញថ្លៃព្យាបាលដល់រូបលោកដែលជាជនរងគ្រោះ។
លោកបញ្ជាក់ថា៖ «យើងនៅតែសង្ឃឹមថាគាត់នឹងប្រាកដទទួលខុសត្រូវក្នុងការជួយយើងក្នុងការព្យាបាល និងការចំណាយទៅលើការធ្វើជើងសិប្បនិមិត្តឲ្យបានល្អដើម្បីបន្តបម្រើការងារនៅក្នុងសង្គម។ ខ្ញុំក្លាយជាជនពិការអស់ ១ ជីវិត ហើយខ្ញុំសង្ឃឹមថាគាត់ទទួលខុសត្រូវ»។
លោកបន្តថា អ្នកបើកបរបុករូបលោកដោយបានបំពានច្បាប់ចរាចរណ៍ ដោយបានបើកយ៉ាងលឿននៅក្នុងបុរី និងមិនបានផ្តល់អាទិភាពអ្នកខាងស្តាំដៃ។ លោកនិយាយទៀតថា អ្នកបើកបរមកសួរសុខទុក្ខលោកនៅមន្ទីរពេទ្យ ២ ដង បន្ទាប់ពីគ្រោះថ្នាក់ ហើយសន្យាថានឹងជួយចំណាយទៅលើការព្យាបាល ប៉ុន្តែក្រោយមកទៀតពួកគេបានស្ងាត់ទៅវិញមិនបានមកទៀតទេ។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញមិនអាចទាក់ទងសុំការអត្ថាធិប្បាយពាក់ព័ន្ធនឹងករណីខាងលើនេះបានទេ៕
