The Phnom Penh Post Search

Search form




Logo of Phnom Penh Post newspaper Phnom Penh Post - សំណុំ​រឿង​ម្ចាស់​គ្លីនិក​គ្មាន​អាជ្ញាប័ណ្ណ​ត្រូវ​បញ្ជូន​ទៅ​តុលាការ

សំណុំ​រឿង​ម្ចាស់​គ្លីនិក​គ្មាន​អាជ្ញាប័ណ្ណ​ត្រូវ​បញ្ជូន​ទៅ​តុលាការ

មន្ត្រី​ជំនាញ​ត្រួតពិនិត្យ​ថ្នាំ​ពេទ្យ​នៅ​គ្លីនិក​គ្មាន​អាជ្ញាប័ណ្ណ។
មន្ត្រី​ជំនាញ​ត្រួតពិនិត្យ​ថ្នាំ​ពេទ្យ​នៅ​គ្លីនិក​គ្មាន​អាជ្ញាប័ណ្ណ។ រូបថត សហការី

សំណុំ​រឿង​ម្ចាស់​គ្លីនិក​គ្មាន​អាជ្ញាប័ណ្ណ​ត្រូវ​បញ្ជូន​ទៅ​តុលាការ

សៀមរាបៈ គ្លីនិក​ឯកជន​មួយ​កន្លែង​ស្ថិត​ក្នុង​ស្រុក​ក្រឡាញ់​ត្រូវ​បាន​មន្ទីរ​សុខាភិបាល​ខេត្ត និង​កម្លាំង​សមត្ថកិច្ច​សម្រេច​ផ្អាក​ដំណើរការ​ជា​បណ្តោះអាសន្ន និង​កសាង​សំណុំ​រឿង​បញ្ជូន​ទៅ​តុលាការ​បន្ទាប់ពី​រក​ឃើញ​ថា​គ្លីនិក​នេះ​មិន​មាន​អាជ្ញាប័ណ្ណ​ហើយ​ថ្នាំ​ពេទ្យ​ជាង ១០០ មុខ​មិន​បាន​ចុះ​បញ្ជិកា​ត្រឹម​ត្រូវ។

តាម​របាយការណ៍​ប៉ូលិស​គ្លីនិក​ឯកជន​នេះ​ជា​សាខា​មួយ​នៃ​សមាគម​គ្រូពេទ្យ​គុណធម៌​កម្ពុជា​ស្ថិត​នៅក្នុង​ឃុំ​កំពង់ថ្កូវ​ និង​បាន​បើក​ដំណើរការ​ជាង ៧ ​ឆ្នាំ​មក​ហើយ។ សមត្ថកិច្ច​បាន​ចុះ​ប្រតិបត្តិការ​ត្រួត​ពិនិត្យ​កាលពី​ថ្ងៃ​ទី ៨ ខែ​ធ្នូ​ហើយ​បាន​ឃាត់​ខ្លួន​សួរ​នាំ​ស្ត្រី​ជនជាតិ​ចិន​ម្នាក់ និង​ខ្មែរ​ម្នាក់​ដែល​ជា​អ្នក​គ្រប់គ្រង​គ្លីនិក​នេះ​កាលពី​ល្ងាច​ថ្ងៃ​ទី​ ៩ ធ្នូ តែ​ត្រូវ​បាន​ដោះលែង​វិញ។

ក្នុង​របាយការណ៍​ប៉ូលិស​ស្ត្រី​ទាំង​ពីរ​នាក់​នោះ​មាន​ឈ្មោះ ឡេង មុយទៀង អាយុ ២៨ ឆ្នាំ ជនជាតិ​ខ្មែរ និង​ជា​អ្នក​គ្រប់គ្រង​សាខា​សមាគម​គ្រូពេទ្យ​គុណធម៌​កម្ពុជា​ប្រចាំ​ស្រុក​ក្រឡាញ់​ចំណែក​ម្នាក់​ទៀត​ឈ្មោះ តាំង លីសៀន អាយុ ៤៦ ឆ្នាំ ជន​ជាតិ​ចិន និង​ជា​គ្រូពេទ្យ​ព្យាបាល​ជំងឺ។ វត្ថុតាង​ដែល​សមត្ថកិច្ច​រឹបអូស​បាន​ជា​ប្រភេទ​ថ្នាំ​ចិន​ដែល​មិន​បាន​ចុះ​បញ្ជី​ស្រប​ច្បាប់​ចំនួន ១០៣​ មុខ​ក្នុង​នោះ​ថ្នាំ​គ្រាប់​មាន​ ១៤១៨១៤ ​គ្រាប់​សេរ៉ូម ៣២៣ ​ដប និង​គ្រែ​សម្រាក​ព្យាបាល​ចំនួន ១២ ​។

ប្រធាន​ការិយាល័យ​នគរបាល​ប្រឆាំង​បទល្មើស​សេដ្ឋកិច្ច ខេត្ត​សៀមរាប លោក សៀន សេន បាន​ឲ្យ​ដឹង​ថា​ក្រោយ​ការ​ឃាត់​ខ្លួន​សួរ​នាំ​ស្ត្រី​ទាំង​ពីរ​នាក់​នោះ​ត្រូវ​បាន​​ដោះលែង​វិញ​បន្ទាប់ពី​ប្រធាន​សមាគម​នេះ​គឺ​លោក អ៊ូច វុទ្ធី បាន​បង់ប្រាក់​ពិន័យ​អន្តរកាល​ចំនួន ២០០០ ​ដុល្លារ និង​ដំណើរការ​ក្តី​តាម​ប្រព័ន្ធ​តុលាការ។

លោក​ថា៖ «ថ្វីបើ​មិន​មាន​ការ​ឃុំ​ខ្លួន​ស្ត្រី​ជនជាតិ​ចិន​រូប​នោះ​ត្រូវ​បាន​សមត្ថកិច្ច​ដក​ហូត​ Passport និង​កសាង​រឿង​បញ្ជូន​ទៅ​តុលាការ​ប្រឈម​មុខ​ផ្លូវ​ច្បាប់​ពាក់ព័ន្ធ​នឹង​ការ​ប្រកបរបរ​ដោយ​គ្មាន​អាជ្ញាប័ណ្ណ...ស្ត្រី​រូប​នោះ​មិន​មាន​វិជ្ជាជីវៈ​ទេ ជក់បារី ស្លៀក​ខោខ្លី​មើល​ជំងឺ​ឲ្យ​គេ»។

លោក សៀន សេន បញ្ជាក់​ថា៖ «លោក អ៊ូច វុទ្ធី ជា​វេជ្ជបណ្ឌិត​មាន​សញ្ញាបត្រ​ពេទ្យ​យោធា... សមាគម​របស់​គាត់​មាន​ទីតាំង​គ្លីនិក​ធំ​នៅ​រាជធានី​ភ្នំពេញ​ទទួល​ស្គាល់​ដោយ​ក្រសួង​មហាផ្ទៃ​ប៉ុន្តែ​សាខា​គ្លីនិក​របស់​គាត់​គឺ​មិន​បាន​ចុះ​បញ្ជី​នៅ​មន្ទីរ​សុខាភិបាល​នោះ​ទេ​ចំណែក​ថ្នាំ​ក៏​មិន​បាន​ចុះ​បញ្ជិកា​អ៊ីចឹង​រឿង​នេះ​ក៏​នឹង​ត្រូវ​បញ្ជូន​ទៅ​តុលាការ​ផង​ដែរ​»​។

តប​នឹង​បញ្ហា​នេះ​លោក អ៊ូច វុទ្ធី ជា​ប្រធាន​សមាគម​គ្រូពេទ្យ​គុណធម៌​កម្ពុជា​អាយុ ៤៤ ឆ្នាំ​បាន​បដិសេធ​ចំពោះ​ការ​អះអាង​របស់​សមត្ថកិច្ច​ដែល​ថា​ថ្នាំ​របស់​លោក​មិន​បាន​ចុះ​បញ្ជិកា។

លោក​ថា៖ «ថ្នាំ​នោះ​មាន​បី​ប្រភព​គឺ​យើង​ទិញ​ត​ពី​ក្រុមហ៊ុន​លក់​ថ្នាំ​ដែល​បាន​ចុះ​បញ្ជិកា​រួច​ថ្នាំ​ដែល​ទទួល​បាន​ពី​សប្បុរសធម៌ និង​ថ្នាំ​ទិញ​នៅ​ផ្សារ​អូឡាំពិក។ សមាគម​គ្រូពេទ្យ​គុណធម៌​កម្ពុជា​ទទួល​បាន​ជំនួយ​ពី​សប្បុរសជន​នៅ​ប្រទេស​ចិន​គឺ​មិន​រក​កម្រៃ​នោះ​ទេ។

អ៊ីចឹង​ហើយ​យើង​ក៏​បើក​សាខា​ជាច្រើន​កន្លែង​ក្នុង​គោលដៅ​ផ្តល់​សេវា​សាធារណៈ​ដល់​ពលរដ្ឋ​តែ​ប៉ុណ្ណោះ​»។

លោក វុទ្ធី ​បន្ត​ថា ​ស្ត្រី​ជនជាតិ​ចិន​ដែល​ជា​វេជ្ជបណ្ឌិត​នៅ​ប្រទេស​ចិន​នោះ​គឺ​គ្រាន់តែ​ជា​ពេទ្យ​ដែល​ចុះ​កម្មសិក្សា​ក្នុង​រយៈពេល ៣ ​ខែ​តែ​ប៉ុណ្ណោះ​មិនមែន​ជា​គ្រូពេទ្យ​ប្រចាំ​ការ​ព្យាបាល​អ្នក​ជំងឺ​នោះ​ទេ។

បើ​តាម​លោក អ៊ូច វុទ្ធី សមាគម​របស់​លោក​បាន​ទទួល​ការ​អនុញ្ញាត​ដំណើការ​ជា​ផ្លូវការ​ពី​ក្រសួង​មហាផ្ទៃ​កាលពី​ជាង ១០ ​ឆ្នាំ​មុន​ដែល​គ្រា​នោះ​ការ​បើក​សាខា​គឺ​មិន​បាន​តម្រូវ​ឲ្យ​ស្នើសុំ​អាជ្ញាប័ណ្ណ​ទីតាំង​ពី​មន្ទីរ​សុខាភិបាល​ខេត្ត​នោះ​ទេ​ប៉ុន្តែ​នៅ​ឆ្នាំ ២០១៤ លោក​រៀបចំ​ឯកសារ​ស្នើសុំ​ចុះ​អាជ្ញាប័ណ្ណ​នៅ​ខេត្ត​សៀមរាប​ដោយ​ដាក់​ឈ្មោះ​លោក​ផ្ទាល់​តែ​ត្រូវ​បាន​មន្ទីរ​សុខាភិបាល​ស្នើ​ឲ្យ​ដាក់​ឈ្មោះ​អ្នក​ទទួល​ខុស​ត្រូវ​ម្នាក់​ទៀត។

លោក​ថា៖ «ខ្ញុំ​ទទួល​ស្គាល់​ចំពោះ​ការ​យឺតយ៉ាវ​ក្នុង​ការ​ស្នើ​ចុះ​បញ្ជី​ជាថ្មី​ព្រោះ​ខ្ញុំ​មិន​ទាន់​រក​វេជ្ជបណ្ឌិត​ដែល​អាច​ប្រចាំ​ការ​ជាប់​នៅ​ទី​នោះ​បាន​មាន​តែ​អ្នក​ផ្លាស់​វេន​»។

ប្រធាន​មន្ទីរ​សុខាភិបាល​ខេត្ត​សៀមរាប​លោក ក្រូស សារ៉ាត់ បដិសេធ​ធ្វើ​អធិប្បាយ​ចំពោះ​រឿង​នេះ​ប៉ុន្តែ​លោក អ៊ាម ប៊ុនលឿន អនុប្រធាន​មន្ទីរ​សុខាភិបាល​បាន​ឲ្យ​ដឹង​ថា​ទីតាំង​នេះ​មាន​លិខិត​អនុញ្ញាត​ដោយ​ក្រសួង​មហាផ្ទៃ​កាលពី​ឆ្នាំ​ ២០០៦ ប៉ុន្តែ​ជា​លិខិត​បើក​សមាគម​គ្រូពេទ្យ​គុណធម៌​កម្ពុជា​មិនមែន​បើក​សាខា​នោះ​ទេ។

លោក​ សារ៉ាត់ បាន​បញ្ជាក់​ថា៖ «មន្ទីរ​សុខាភិបាល​ធ្លាប់​បាន​ណែនាំ​ទីតាំង​ខាង​លើ​នេះ​ឲ្យ​សុំ​ច្បាប់​តែ​ម្ចាស់​ទីតាំង​មិន​បាន​ធ្វើ​តាម​ទេ​ទើប​សមត្ថកិច្ច​អនុវត្ត​ច្បាប់​តែ​ម្តង​»៕

អត្ថបទគួរចាប់អារម្មណ៍