.jpg)
ទីតាំងសិប្បកម្មលីងកាហ្វេ និងសណ្ដែកផលិតជាកាហ្វេមួយកន្លែង នៅភូមិត្រពាំងខ្ទឹម ឃុំក្រាំងម្កាក់ ស្រុកអង្គស្នួល ដែលបង្កគ្រោះថ្នាក់ដល់សុខភាព។ រូបថត CCC
ភ្នំពេញ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃនឹងបញ្ជូនសំណុំរឿងសិប្បកម្មលីងកាហ្វេ និងសណ្ដែក យីហោថុន ណាត ដែលសង្ស័យបង្កគ្រោះថ្នាក់ និងហានិភ័យខ្ពស់ដល់សុខភាព ទៅតុលាការនៅថ្ងៃចន្ទនេះ។
កាលពីរសៀលថ្ងៃទី ២ ខែ កក្កដា ឆ្នាំ ២០២០ កម្លាំងគណៈកម្មាធិការប្រយុទ្ធប្រឆាំងផលិតផលក្លែងក្លាយ និងមានការសម្របសម្រួល ដោយព្រះរាជអាជ្ញារងនៃអយ្យការអមសាលាដំបូងខេត្តកណ្តាល បានចុះត្រួតពិនិត្យ និងបិទទីតាំងសិប្បកម្មលីងកាហ្វេ និងសណ្ដែកផលិតជាកាហ្វេមួយកន្លែង នៅភូមិត្រពាំងខ្ទឹម ឃុំក្រាំងម្កាក់ ស្រុកអង្គស្នួល។
លោក កឹម ជាតិ អនុរដ្ឋលេខាធិការក្រសួងមហាផ្ទៃ និងជាអនុគណៈកម្មាធិការ ប្រយុទ្ធប្រឆាំងផលិតផលក្លែងក្លាយ ថ្លែងពីថ្ងៃអាទិត្យថា ម្ចាស់ទីតាំងមានឈ្មោះ ថុន ណាត ភេទស្រីអាយុ ៣៣ ឆ្នាំ។ លោកបន្តថា នៅពេលចុះបង្ក្រាបម្ចាស់សិប្បកម្មរូបនេះ មិនត្រូវបានឃាត់ខ្លួននោះទេ។
លោកថា៖ «យើងអត់ទាន់បានឃាត់គាត់ទេ ដោយសារតែគាត់មិនរត់ទៅណាទេ ហើយមានអ្នកធានា។ ពេលដែលសមត្ថកិច្ច និងតុលាការហៅគាត់ គាត់នឹងមានវត្តមានចូលខ្លួន ហើយថ្ងៃចន្ទនេះយើងនឹងបញ្ជូនសំណុំរឿងហ្នឹងទៅតុលាការ ដើម្បីឲ្យតុលាការធ្វើការវិនិច្ឆ័យ និងចោទប្រកាន់ទៅលើអ្វីដែលគាត់បានធ្វើខុស»។
តាមរបាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយបានឲ្យដឹងថា ក្រោយការចុះបង្ក្រាបសមត្ថកិច្ចបានត្រួតពិនិត្យរកឃើញមាន ១-គ្រាប់-សណ្តែកសៀង ៦០ បាវ, ២-គ្រាប់កាហ្វេលេខ ១ ចំនួន ៦ បាវ, ៣-គ្រាប់កាហ្វេលេខ ២ ចំនួន ១០ បាវ, ៤-កាហ្វេលីងរួច ៦ បាវ, ៥-ម៉ាស៊ីនលាយប៊័រ ១ គ្រឿង, ៦-ម៉ាស៊ីនលាយស្ករ ១ គ្រឿង មេក្លិនសម្រាប់លាយកាហ្វេ និងសម្ភារផ្សេងៗមួយចំនួនទៀត។
បើតាមលោក ជាតិ មុននឹងឈានដល់ការចុះត្រួតពិនិត្យ កម្លាំងរបស់លោកបានធ្វើការស្រាវជ្រាវអស់រយៈពេលជាយូរថ្ងៃដោយមានការរាយការណ៍ពីពលរដ្ឋ។ លោកបន្តថា សិប្បកម្មលីងកាហ្វេនេះ បង្កផលប៉ះពាល់ដល់សុខភាពអ្នកផឹកច្រើនណាស់ ព្រោះម្ចាស់បានលាយគ្រឿងផ្សំច្រើនមុខធ្វើឲ្យកាហ្វេឈ្ងុយ មានលាយទឹកស៊ីអ៊ីវ ប៊័រ ទឹកស្ករ caramel មេក្លិនសម្រាប់លាយកាហ្វេ ល័ក្តពណ៌ ស្ករស អំបិល ទឹកត្រី ស្រាស ប៊ីចេង ទឹកដោះគោ និងសណ្ដែកសៀងផងដែរ។
«អ្វីដែលយើងបានចោទប្រកាន់គាត់ទៅតុលាការ គឺមិនមានលើកស្លាកយីហោ មិនទាន់មានចុះបញ្ជីផលិតផល (ចបផ) គ្មានវិញ្ញាបនបត្រត្រួតពិនិត្យគុណភាព នៅលើសម្បកវេចខ្ចប់កាហ្វេ មិនមានដាក់អាសយដ្ឋាន និងរបៀបប្រើប្រាស់។ និយាយទៅការផលិតកាហ្វេ គ្មានស្តង់ដា»៕
