.jpg)
លោក គង់ រ៉ៃយ៉ា ពេលនាំមកសាលាដំបូងកន្លងមក។ ហុង មិនា
ភ្នំពេញៈ សាលាដំបូងរាជធានីភ្នំពេញនឹងប្រកាសសាលក្រមសំណុំរឿងសុំនៅក្រៅឃុំរបស់លោក គង់ រ៉ៃយ៉ា ជាលើកទី ២ នៅថ្ងៃសុក្រនេះ បន្ទាប់ពីជំនុំជម្រះកាលពីថ្ងៃទី ២៦ វិច្ឆិកា ពាក់ព័ន្ធនឹងការអំពាវនាវលក់អាវយឺតមានរូប និងទ្រឹស្តីរបស់លោក កែម ឡី នៅមុនថ្ងៃខួបទី ៣ ឆ្នាំ នៃអំពើឃាតកម្មដែលបានកើតឡើងកាលពីឆ្នាំ ២០១៦។
លោក សំ សុគង់ មេធាវីការពារសិទ្ធិឲ្យជនត្រូវចោទ គង់ រ៉ៃយ៉ា បានប្រាប់ភ្នំពេញប៉ុស្តិ៍ពីថ្ងៃពុធថា សាលក្រមនៃសំណុំរឿងរបស់កូនក្តីលោកឈ្មោះ គង់ រ៉ៃយ៉ា នឹងត្រូវសាលាដំបូងរាជធានីភ្នំពេញកំណត់ប្រកាសនៅថ្ងៃទី ២៩ វិច្ឆិកា ឆ្នាំ ២០១៩ នេះហើយលោកសង្ឃឹមថា កូនក្តីរបស់លោកនឹងត្រូវតុលាការអនុញ្ញាតឲ្យនៅក្រៅឃុំ។
លោកបានថ្លែងថា៖ «ខ្ញុំពិតជាមានក្តីសង្ឃឹមថា តុលាការនឹងដោះលែងកូនក្តីរបស់ខ្ញុំបាននៅក្រៅឃុំបណ្តោះអាសន្ននៅថ្ងៃទី ២៩ វិច្ឆិកានេះ»។
ស្រដៀងគ្នានេះដែរអ្នកស្រី សុខ ស្រីនិច អាយុ ២៤ ឆ្នាំដែលត្រូវជាភរិយាលោក គង់ រ៉ៃយ៉ា បានប្រាប់កាលពីថ្ងៃពុធដែរថា អ្នកស្រីសង្ឃឹមថាប្តីរបស់អ្នកស្រីនឹងត្រូវតុលាការដោះលែងឲ្យមានសេរីភាពវិញ ព្រោះអ្នកស្រីយល់ថា ប្តីរបស់អ្នកស្រីគ្មានកំហុសអ្វីទេ។
អ្នកស្រីថា៖ «ខ្ញុំសង្ឃឹមថា តុលាការនឹងផ្តល់យុត្តិធម៌ដល់ប្តីខ្ញុំ និងដោះលែងគាត់មកជួបជុំគ្រួសារជាពិសេសកូនស្រីតូចជាទីស្រឡាញ់របស់គាត់»។
អ្នកស្រី សុខ ស្រីនិច បានបន្តថា ប្តីរបស់អ្នកស្រីជាមេគ្រួសាររកស៊ីផ្គត់ផ្គង់គ្រួសារដែលមានកូនស្រីតូចអាយុទើបបាន ១ ខួប តែនៅពេលគាត់ [គង់ រ៉ៃយ៉ា] ត្រូវជាប់ឃុំបែបនេះ គ្មានអ្នកណាទីពឹងទៀតទេ។ បច្ចុប្បន្នអ្នកស្រីកំពុងតែជួបការលំបាកក្នុងជីវភាពយ៉ាងខ្លាំង ព្រោះត្រូវលក់ទឹកឃ្មុំដើម្បីរកចំណូលចិញ្ចឹមកូនតូច និងបង់ថ្លៃជួលបន្ទប់ស្នាក់នៅផង។
គួរបញ្ជាក់ថា លោក គង់ រ៉ៃយ៉ា ធ្លាប់បានប្តឹងសុំនៅក្រៅឃុំមកសាលាដំបូងរាជធានីភ្នំពេញម្តងរួចមកហើយ ប៉ុន្តែត្រូវបានតុលាការបដិសេធ។ ដោយមិនសុខចិត្តជនត្រូវចោទ គង់ រ៉ៃយ៉ា បានប្តឹងទាស់ទៅសាលាឧទ្ធរណ៍ តែត្រូវឧទ្ធរណ៍បដិសេធ ហើយក៏បានបន្តប្ដឹងទៅតុលាការកំពូលទៀត ប៉ុន្តែតុលាការកំពូលនៅតែមិនអនុញ្ញាតឲ្យនៅក្រៅឃុំដដែលកាលពីថ្ងៃទី ៤ តុលា ឆ្នាំ ២០១៩។ ដោយនៅតែមិនសុខចិត្តលោក គង់ រ៉ៃយ៉ា បានសម្រេចតាមរយៈមេធាវីប្ដឹងមកសាលាដំបូងរាជធានីភ្នំពេញជាលើកទី ២ ទៀតដែលការសម្រេចប្រកាសសាលក្រមរបស់ចៅក្រមត្រូវធ្វើនៅថ្ងៃសុក្រនេះ។
លោក គង់ រ៉ៃយ៉ា ត្រូវបានសមត្ថកិច្ចចាប់ឃុំខ្លួននៅថ្ងៃទី ១១ ខែ កក្កដា ឆ្នាំ ២០១៩ ដោយរងការចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងការអំពាវនាវលក់អាវយឺតមានរូប និងទ្រឹស្តីរបស់លោក កែម ឡី មុនថ្ងៃគម្រប់ខួប ៣ ឆ្នាំ នៃឃាតកម្មលើលោក កែម ឡី ដែលបានកើតឡើងកាលពីថ្ងៃទី ១០ ខែ កក្កដា ឆ្នាំ ២០១៦៕
