ភ្នំពេញៈ អង្គជំនុំជម្រះតុលាការកំពូលនៃសាលាក្ដីខ្មែរក្រហមប្រកាសថា បណ្ដឹងអាជ្ញាលើ នួន ជា ក្នុងសំណុំរឿង ០០២/០២ បានរលត់ទៅតាមមរណភាពរបស់លោកហើយ រាល់កិច្ចការដំណើរការនីតិវិធីសម្រាប់ នួន ជា នៅតុលាការកំពូល។ មេធាវីការពារក្តីអះអាងថាតាមផ្លូវច្បាប់ នួន ជា មិនមានទោសក្នុងសំណុំរឿង ០០២/០២ ទេ។
អង្គជំនុំជម្រះតុលាការកំពូលនៃសាលាក្ដីខ្មែរក្រហម កាលពីថ្ងៃអង្គារទី ១៣ សីហា បានចេញសេចក្ដីសម្រេចមួយពាក់ព័ន្ធសំណុំរឿងរបស់លោក នួន ជា បងធំទី២ នៃរបបខ្មែរក្រហមដែលបានស្លាប់កាលពីដើមខែនេះ។ អង្គជំនុំជម្រះតុលាការកំពូលសម្រេចថា៖ «មរណភាពរបស់ជនជាប់ចោទ នួន ជា មានអនុភាពរលត់បណ្ដឹងអាជ្ញាលើរូបគាត់ និងបញ្ចប់រាល់កិច្ចដំណើរការនីតិវិធីពាក់ព័ន្ធនឹងរូបគាត់ នៅចំពោះមុខអង្គជំនុំជម្រះតុលាការកំពូល និងបន្តទទួលពិនិត្យលើសំណើសុំបន្ទាន់របស់ក្រុមមេធាវីការពារក្ដី នួន ជា»។
លោក នួន ជា ស្ថិតនៅក្នុងសំណុំរឿងចំនួន ២ របស់សាលាក្ដីខ្មែរក្រហម គឺសំណុំរឿង ០០២/០១ ដែលលោកនិង ខៀវ សំផន ត្រូវបានផ្ដន្ទាទោស ១ ជីវិត ពីបទឧក្រិដ្ឋកម្មប្រឆាំងមនុស្សជាតិ។ សំណុំរឿងទី២ របស់ នួន ជា គឺសំណុំរឿង ០០២/០២ ដែលក្នុងសំណុំរឿងនេះ លោកត្រូវបានផ្ដន្ទាទោសដោយសាលាដំបូងនៃសាលាក្ដីខ្មែរក្រហម កាលពីខែ វិច្ឆិកា ២០១៨ ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងការបំពានយ៉ាងធ្ងន់ធ្ងរលើអនុសញ្ញាទីក្រុងហ្ស៊ឺណែវ។
ប៉ុន្តែមុនពេលលោកស្លាប់ ក្រុមមេធាវីរបស់លោកបានដាក់ពាក្យបណ្ដឹងសារទុក្ខប្រឆាំងនឹងការសម្រេចលើសំណុំរឿង ០០២/០២។ ដោយសារបណ្ដឹងសារទុក្ខនេះ ក្រុមមេធាវីបានស្នើសុំឲ្យតុលាការកំពូលសម្រេចឲ្យ នួន ជា រួចផុតពីការផ្ដន្ទាទោស ឬមួយត្រូវបន្តនីតិវិធីលើបណ្ដឹងសារទុក្ខ។ ប៉ុន្តែការសម្រេចរបស់អង្គជំនុំជម្រះតុលាការកំពូលមិនបានបញ្ជាក់ថា ការផ្តន្ទាទោសលើ នួន ជា បានរលត់ទៅតាមមរណភាពរបស់លោកទេ។ នៅក្នុងការពិភាក្សារបស់អង្គជំនុំជម្រះតុលាការកំពូលបានសរសេរថា៖ «ច្បាប់ អ.វ.ត.ក. និងវិធានផ្ទៃក្នុងពុំបានបញ្ជាក់ច្បាស់លាស់អំពីផលវិបាកនៃការដាក់ពិរុទ្ធពីតុលាការជាន់ដំបូងប្រឆាំងនឹងជនជាប់ចោទ ដែលបានស្លាប់បន្ទាប់ពីដាក់សេចក្ដីជូនដំណឹងអំពីបណ្ដឹងសារទុក្ខ»។
លោក នេត្រ ភក្ត្រា អ្នកនាំពាក្យសាលាក្ដីខ្មែរក្រហម បានថ្លែងថា៖ «តុលាការកំពូលបានបញ្ចប់ដំណើរការនីតិវិធីបណ្ដឹងសារទុក្ខរបស់ នួន ជា ប៉ុន្តែនៅតែទទួលពិនិត្យសំណើសុំបន្ទាប់នៃក្រុមមេធាវីរបស់លោកពាក់ព័ន្ធនឹងមរណភាពរបស់លោក ទៅលើសាលដីការបស់សាលាដំបូង និងការផ្ដន្ទាទោសលើរូបលោក»។
លោកបញ្ជាក់ថា៖ «អង្គជំនុំជម្រះតុលាការកំពូលនឹងសម្រេចលើ [សំណើសុំបន្ទាប់នៃក្រុមមេធាវី] នៅពេលសមរម្យណាមួយ»។
អ្នកស្រី Doreen Chen មេធាវីការពារក្តីមួយរូបរបស់លោក នួន ជា បានថ្លែងកាលពីម្សិលមិញថា អង្គជំនុំជម្រះតុលាការកំពូលមិនបានបញ្ជាក់សម្រេចឲ្យបានច្បាស់ លើការផ្ដន្ទាទោសលោក នួន ជា ក្នុងសំណុំរឿង ០០២/០២ ទេ។
អ្នកស្រីថ្លែងថា៖ «វាហាក់ដូចជាពួកគាត់ នៅតែមិនទាន់សម្រេចលើចំណុចនេះ។ យើងគិតថាច្បាប់បានចែងច្បាស់ហើយថា នួន ជា ពេលនេះតាមច្បាប់គឺ គ្មានទោស ហើយអង្គជំនុំជម្រះត្រូវតែបញ្ជាក់ចំណុចនេះជាសាធារណៈ»។
អ្នកស្រី Chen បន្តថា អ្នកស្រីមិនដឹងថាចម្លើយតបពីតុលាការនឹងចេញពេលណាទេអំពីបញ្ហាដ៏សំខាន់ «សម្រាប់ លោក នួន ជា, ប្រជាជនខ្មែរ និងផលវិបាកទូទៅ និងកេរដំណែលនៃសាលាក្ដីខ្មែរក្រហម»។
អ្នកស្រីគិតថា អង្គជំនុំជម្រះហាក់ដូចជាព្យាយាមមិនឆ្លើយសំណួរ ថាតើក្រុមមេធាវីការពារក្តីគួរតែបន្តការងាររបស់ពួកគេ នៅពេលដែលអង្គជំនុំជម្រះកំពុងធ្វើការសម្រេច។
អ្នកស្រីថ្លែងថា៖ «ខ្ញុំគិតថា រដ្ឋបាលនឹងបន្តដំណើរការទៅមុខដោយមានវិធានការក្នុងការបណ្ដេញ និងដកពួកយើងចេញពីប្រព័ន្ធរបស់គេ»៕