The Phnom Penh Post Search

Search form

Logo of Phnom Penh Post newspaper Phnom Penh Post - សំណើ​សុំ​លើក​លែង​​ទោស​ពី​បក្ស​ប្រឆាំង​ត្រូវ​បាន​ច្រាន​ចោល




សំណើ​សុំ​លើក​លែង​​ទោស​ពី​បក្ស​ប្រឆាំង​ត្រូវ​បាន​ច្រាន​ចោល

Content image - Phnom Penh Post
លោក សម រង្សី និង លោក គឹម សុខា នៅ​ឯ​​ព្រលាន​យន្ត​ហោះ​ភ្នំពេញ បន្ទាប់​ពី​បាន​ការ​លើក​លែង​ទោស​ពី​ព្រះមហាក្សត្រ​ ​កាល​ពី​ឆ្នាំ ២០១៣។ ម៉ៃ វីរៈ

សំណើ​សុំ​លើក​លែង​​ទោស​ពី​បក្ស​ប្រឆាំង​ត្រូវ​បាន​ច្រាន​ចោល

ភ្នំពេញៈ សំណើ​សុំ​​ការ​លើកលែង​ទោស​ពី​ព្រះមហាក្សត្រ នរោត្តម សីហមុនី ដោយ​មេដឹកនាំ​គណបក្ស​ប្រឆាំង​ដែល​សុំ​​​ឲ្យ​​ព្រះអង្គ​​​លើក​លែង​ទោស​​​ និង​ទម្លាក់​ចោល​ការ​ប្តឹងប្ដល់​ចំពោះ​បទ​​ចោទប្រកាន់​​​នានា​ទៅ​​លើ​សមាជិក​របស់​ខ្លួន​ និង​​សកម្មជន​អង្គការ​សង្គម​ស៊ីវិល​ព្រម​ទាំង​​មន្ត្រី​ គជប ដែល​ត្រូវ​បាន​មជ្ឈដ្ឋាន​ជាតិ​ និង​អន្តរជាតិ​ជាច្រើន​ចាត់ទុក​ថា​ជា​​រឿង​នយោបាយ​​ត្រូវ​បាន​ច្រាន​ចោល​ដោយ​​​លោក​នាយក​រដ្ឋមន្រ្តី ហ៊ុន សែន។

បើ​តាម​​ឯកសារ​​ដែល​ចេញ​​ដោយ​​ប្រព័ន្ធ​ផ្សព្វផ្សាយ​ក្នុង​ស្រុក​ផង​ដែរ​នោះ​លោក សម រង្ស៊ី ​ប្រធាន​គណបក្ស​សង្គ្រោះ​ជាតិ​​ និង​លោក កឹម សុខា ប្រធាន​ស្តីទី​នៃ​គណបក្ស​សង្គ្រោះ​ជាតិ​បាន​ផ្ញើ​លិខិត​​រួម​មួយ​​កាល​ថ្ងៃ​ទី​ ៨ ​តុលា​មួយ​ថ្ងៃ​បន្ទាប់ពី​​មាន​សារ​ដ៏កម្រ​មួយ​ពី​ព្រះមហាក្សត្រ​ នរោត្តម សីហមុនី ​ដែល​អំពាវនាវ​ឲ្យ​​​សមាជិក​រដ្ឋសភា​ «​គោរព​​សិទ្ធិ​មនុស្ស​»​ ​និង​ប្រកាន់​ភ្ជាប់​នូវ​​ «គោលការណ៍​ប្រជាធិបតេយ្យ​​សេរី​ពហុបក្ស​» ​​ដែល​ត្រូវ​បាន​អាន​ទៅ​រដ្ឋសភា​។

ដោយ​កត់សម្គាល់​ព្រះរាជ​បន្ទូល​របស់​ព្រះមហាក្សត្រ​ដែល​បាន​អំពាវនាវ​ឲ្យ​តំណាង​រាស្រ្ត​​ «​ដោះស្រាយ​​បញ្ហា​» ​​សម្រេច​លើ​ «​គោលដៅ​រួម​» និង​ធ្វើការ​ «​​មួយ​ជំហានៗ​» ​គណបក្ស​សង្គ្រោះ​ជាតិ​បាន​​ស្នើសុំ​ព្រះមហាក្សត្រ​ នរោត្តម សីហមុនី អន្តរាគមន៍​។ ពួកគេ​​បាន​ស្នើសុំ​ឲ្យ​មាន​​ការ​លើកលែង​ទោស​ពី​ព្រះមហាក្សត្រ​​​ និង​​ទម្លាក់​ចោល​​ការ​​ចោទប្រកាន់​​​ចំពោះ​​ «សកម្មជន​​សិទ្ធិ​មនុស្ស​ សកម្មជន​ដីធ្លី សកម្មជន​​បរិស្ថាន ​អគ្គលេខាធិការរង​គណៈកម្មាធិការ​ជាតិ​រៀបចំ​ការ​បោះឆ្នោត​ ​សកម្មជន​នយោបាយ និង​ថ្នាក់ដឹកនាំ​​គណបក្ស​សង្គ្រោះ​ជាតិ​»​។

កាលពី​ថ្ងៃ​ទី​ ១១ តុលា ព្រះមហាក្សត្រ នរោត្តម សីហមុនី ​​បាន​បញ្ជូន​សំណើ​​នេះ​ទៅ​​​លោក​នាយក​រដ្ឋមន្រ្តី ហ៊ុន សែន ​«​ដើម្បី​ពិនិត្យ»។

ជា​ការ​ឆ្លើយតប​លោក​នាយក​រដ្ឋមន្រ្តី ហ៊ុន សែន បាន​ហៅ​ករណី​នេះ​​ថា​ជា​ការ​អនុវត្ត​ច្បាប់​ហើយ​លើក​ឡើង​ថា​វា​មិន​សមស្រប​​ក្នុង​ការ​អន្តរាគមន៍​​ទេ​។ ​

លោក​នាយក​រដ្ឋមន្រ្តី​បាន​សរសេរ​ថា​៖ «​​ទូល​ព្រះបង្គំ​ជា​ខ្ញុំ​មាន​ជំនឿ​ដ៏​មុតមាំ​ថា​ការ​ពង្រឹង និង​ការ​លើក​កម្ពស់​នីតិរដ្ឋ​តាមរយៈ​​ការ​​អនុវត្ត​ច្បាប់​​ឲ្យ​បាន​ត្រឹមត្រូវ​ម៉ឺងម៉ាត់ និង​មាន​ប្រសិទ្ធភាព​គឺជា​ការ​ចាំបាច់ និង​ជា​កត្តា​​គន្លឹះ​ដើម្បី​ជួយ​​ឲ្យ​ប្រទេស​​ជាតិ​មាន​របៀប​​រៀបរយ​ស្ថិរភាព និង​សន្តិសុខ​ជាពិសេស​​ជួយ​ឲ្យ​លទ្ធិប្រជាធិបតេយ្យ​​សេរី​ពហុបក្ស​​របស់​កម្ពុជា​មាន​កិច្ចដំណើរការ​​ទៅ​មុខ​ប្រកប​ដោយ​ចីរភាព​»។

បច្ចុប្បន្ន​នេះ​ទាំង​លោក សម រង្ស៊ី និង​ទាំង​លោក កឹម សុខា ប្រឈម​មុខ​នឹង​ការ​កាត់ទោស​ជាប់​ពន្ធនាគារ​​ក្នុង​សំណុំ​រឿង​​ដែល​ត្រូវ​បាន​ចាត់​ទុក​យ៉ាង​ទូលំ​ទូលាយ​ថា​ជា​រឿង​នយោបាយ​។ ​លោក​ សម រង្ស៊ី កំពុង​រស់នៅ​និរទេស​នៅ​បរទេស​ហើយ​លោក កឹម សុខា កំពុង​រស់នៅ​មួយ​កន្លែង​​ក្នុង​ទីស្នាក់ការ​គណបក្ស​ដើម្បី​គេច​​ចេញ​​ពី​ការ​ចាប់​ខ្លួន។

អង្គការ​សិទ្ធិ​មនុស្ស​​លីកាដូ​បាន​​ចាត់​ទុក​​មនុស្ស​ ២៧ ​នាក់​​ដែល​បច្ចុប្បន្ន​នេះ​កំពុង​ជាប់​ពន្ធនាគារ​រួម​ទាំង​​ឥស្សរជន​គណបក្ស​សង្គ្រោះ​ជាតិ​មួយ​ចំនួន​ផង​ដែរ​នោះ​ថា​ជា​អ្នក​ទោស​នយោបាយ​។

លោក​នាយក​រដ្ឋមន្រ្តី​ជា​ញឹកញាប់​បាន​លើក​ឡើង​​ថា​តុលាការ​មាន​ឯករាជភាព​នៅ​ពេល​ត្រូវ​បាន​ចោទ​ប្រកាន់​ថា​រដ្ឋាភិបាល​មាន​​ឥទ្ធិពល​ទៅលើ​ប្រព័ន្ធ​តុលាការ​។ ក្រុម​អ្នក​រិះគន់​ជាច្រើន​បាន​ចោទ​ប្រកាន់​លោក​​ ហ៊ុន សែន ​ជា​យូរ​មក​ហើយ​ថា​បាន​ប្រើ​តុលាការ​​ដើម្បី​តម្រង់​ទិសដៅ​ទៅ​រក​​​ក្រុម​ប្រឆាំង​​​តាមរយៈ​បទចោទ​ដែល​មិន​សម​ទំនង​មួយ​ចំនួន​។

កាលពី​អតីតកាល​លោក​ ហ៊ុន សែន បាន​រៀបចំ​ឲ្យ​មាន​ការ​​លើក​លែង​ទោស​​​ពី​ព្រះមហាក្សត្រ​​ជា​ផ្នែក​នៃ​​កិច្ចព្រមព្រៀង​នយោបាយ​រួម​មាន​កិច្ចព្រមព្រៀង​​ដែល​​អនុញ្ញាត​ឲ្យ​លោក សម រង្ស៊ី ត្រឡប់​មក​​ប្រទេស​វិញ​ពី​ការ​រស់នៅ​និរទេស​នៅ​បរទេស​​ក្នុង​ឆ្នាំ​ ២០១៣ ​ដើម្បី​ប្រកួត​ប្រជែង​​​នៅ​ក្នុង​ការ​បោះឆ្នោត​ជាតិ​​លើក​មុន។ ​

ទោះ​យ៉ាង​ណា​ក្តី ​ចាប់​តាំង​​ពី​ស្ថានការណ៍​នយោបាយ​រវាង​បក្ស​កាន់​អំណាច​ និង​បក្ស​ប្រឆាំង​បាន​ឡើង​កម្តៅ​ជាថ្មី​មក​លោក​ ហ៊ុន សែន ​​បាន​​ប្រកាស​ថា​ប្រសិន​បើ​លោក​ស្នើ​ឲ្យ​មាន​ការ​លើក​លែង​ទោស​លោក សម រង្ស៊ី ម្តង​ទៀត​លោក​នឹង​កាត់​ដៃ​លោក​ចោល​។

នៅពេល​ទាក់ទង​កាល​ពី​ម្សិលមិញ​អ្នក​នាំ​ពាក្យ​គណបក្ស​​ប្រជាជន​លោក ​សុខ ឥសាន ​បាន​អះអាង​ថា​ការ​លើកលែង​ទោស​គឺ​ផ្ទុយ​នឹង​នីតិវិធី​។

ប៉ុន្តែ​អ្នក​នាំ​ពាក្យ​​​​របស់​គណបក្ស​​សង្គ្រោះ​ជាតិ​លោក យឹម សុវណ្ណ ​បាន​ថ្លែង​ថា​ករណី​​នេះ​គឺ​ច្បាស់​ណាស់​ជា​​ករណី​នយោបាយ​ហើយ​ហេតុ​ដូច្នេះ​ត្រូវ​ការ​ដំណោះស្រាយ​​​នយោបាយ​។

លោក​ សុវណ្ណ ​បាន​បញ្ជាក់​​ទៀត​ថា​៖ «​​ពិភពលោក​ប្រជាពលរដ្ឋ ​និង​គណបក្ស​សង្គ្រោះ​ជាតិ​ទាំងអស់​គ្នា​ដឹង​ថា​នេះ​​ជា​​រឿង​នយោបាយ​... ​វា​ត្រូវ​តែ​ដោះស្រាយ​ដោយ​ការ​ចរចា​នយោបាយ​»។

កាលពី​ម្សិលមិញ​ព្រះអង្គ​ម្ចាស់ ស៊ីសុវត្ថិ ធម្មិកោ បាន​មាន​បន្ទូល​​ថា​៖ «​​វា​ជា​លើក​ទី​មួយ​ហើយ​ដែល​ព្រះមហាក្សត្រ​​លើក​ឡើង​ឲ្យ​មាន​ការ​គោរព​សិទ្ធិ​មនុស្ស​ និង​ប្រជាធិបតេយ្យ​សេរីពហុហក្ស​»។ «​ខ្ញុំ​គិត​ថា​ព្រះអង្គ​ព្យាយាម​ផ្ញើសារ​មួយ​ប៉ុន្តែ​​ចំពោះ​គោល​បំណង​គឺ​ដើម្បី​​បន្ធូរ​បន្ថយ​ភាព​តានតឹង​? ​វា​អាច​ត្រូវ​បាន​បកស្រាយ​ជា​ផ្លូវ​មួយ​​»៕ PS

អត្ថបទគួរចាប់អារម្មណ៍