ភ្នំពេញៈ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់មួយចំនួនលើកឡើងថា សំណើរបស់ពួកគេភាគច្រើនត្រូវបានរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទច្រានចោលមិនយកមកដោះស្រាយ ខណៈសំណើនេះធ្វើឡើងក្នុងកិច្ចប្រជុំឧត្តមក្រុមប្រឹក្សាពិគ្រោះ និងផ្ដល់យោបល់នៅវិមានសន្តិភាពកាលពីម្សិលមិញដោយផ្ដោតលើបញ្ហានានាក្នុងវិស័យកសិកម្ម។
លោក ពេជ្រ ស្រស់ ប្រធានគណបក្សយុវជនកម្ពុជាប្រាប់ភ្នំពេញប៉ុស្ដិ៍ថា លោកបានលើកយោបល់ ៧ ចំណុចប្រាប់ទៅលោក វេង សាខុន រដ្ឋមន្ត្រីក្រសួងកសិកម្ម ដើម្បីចូលរួមស្វែងរកដំណោះ ស្រាយជូនកសិករ ដូចជា ការស្នើឱ្យត្រៀមបម្រុងថវិកាសម្រាប់ទប់ទល់នៅពេលតម្លៃកសិកម្មចុះថោក ការស្នើទម្លាក់តម្លៃសម្ភារផ្គត់ផ្គង់វិស័យកសិកម្ម ការបង្កើតប្រព័ន្ធធារាសាស្ដ្រដល់ទីតាំងធ្វើកសិកម្មគ្រប់កន្លែង ការទប់ស្កាត់កុំឱ្យឈ្មួញកណ្ដាលទម្លាក់តម្លៃកសិកម្ម ការប្រកាសនូវតម្លៃកសិកម្មមុនកសិករដាំដុះ ការបង្កើនទីផ្សារលក់កសិកម្មក្នុងស្រុក និងការទប់ស្កាត់នាំចូលកសិផលពីបរទេស។
យ៉ាងណាក្ដី លោក ពេជ្រ ស្រស់ បានបង្ហាញពីការសោកស្ដាយខណៈសំណើភាគច្រើនត្រូវបានលោក វេង សាខុន ឆ្លើយតបថា ក្រសួងកសិកម្មគ្មានលទ្ធភាពធ្វើតាមជាអ្វីដែលលោកយល់ថាក្រសួងមិនបានខំជួយកសិករ តែបែរជាលើកហេតុផលមកគ្របសង្កត់លើចំណុចដែលលោកបានលើកឡើងទៅវិញ។
លោកថា៖ «ក្រសួងមិនអាចធ្វើតាមបានហើយគាត់លើកហេតុផល ១,២,៣,៤ អ៊ីចឹងទៅ។ ខ្ញុំសោកស្ដាយពេលក្រសួងមិនស្វែងរកដំណោះស្រាយ និងដូចជាមិនប្រឹងប្រែងស្វែងរកដំណោះស្រាយបែរជាលើកហេតុផលមកគ្របដណ្ដប់លើអ្វីដែលយើងបានស្នើទៅវិញ»។
បើតាមលោក ពេជ្រ ស្រស់ ក្នុងចំណោមសំណើទាំង ៧ គឺមានរហូត ៤ ចំណុចដែលរដ្ឋមន្ត្រីក្រសួងកសិកម្មឆ្លើយតបបែបអវិជ្ជមានក្នុងនោះដចជា ការបង្កើតថវិកាបម្រុងទុកសម្រាប់ជួយកសិករនៅពេលកសិផលធ្លាក់ថ្លៃនិងការទប់ស្កាត់ការនាំចូលផលិតផលពីបរទេសជាដើម។ ក្រៅពីនេះ ចំណុចចំនួន ៣ ដែលក្រសួងទទួលយកនិងអះអាងថាកំពុងធ្វើដូចជា ការជួយត្រួតពិនិត្យធ្វើឱ្យសម្ភារផ្គត់ផ្គង់កសិកម្មមានតម្លៃទាប ការស្ដារប្រឡាយនិងប្រព័ន្ធធារាសាស្ដ្រនិងការទប់ស្កាត់ឈ្មួញកណ្ដាលកុំឱ្យដំឡើងតម្លៃកសិកម្ម។
លោកថា៖ «គាត់ថាចំណុចទី ១ គាត់គ្មានលទ្ធភាពធ្វើទេ ព្រោះក្រសួងសេដ្ឋកិច្ចជាអ្នកផ្ដល់លុយជូន តែអ្វីដែលខ្ញុំលើកឡើង ចង់ឱ្យក្រសួងកសិកម្មហ្នឹង មានគម្រោងស្នើសុំថវិកាពីថ្នាក់ជាតិ តែគាត់ឆ្លើយតបមកវិញក្នុងន័យអវិជ្ជមានតែម្ដង»។
ចំណែកលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យបានថ្លែងដែរថា អ្វីដែលលោកបានលើកឡើងក្នុងកិច្ចប្រជុំនោះគឺស្នើឱ្យបំបាត់អំពើពុករលួយដែលនាំឱ្យមានបទល្មើសនេសាទដោយគ្មានការបង្ក្រាបពីមន្ត្រី។
លោក សូណង់ដូ ក៏បានបង្ហាញការមិនចេញចិត្តចំពោះចម្លើយពីរដ្ឋមន្ត្រីក្រសួងកសិកម្មដែរថា៖ «គាត់និយាយដូចជាមិនសូវឆ្លើយមកសំណួរបស់ពូប៉ុន្មានទេ គាត់ឆ្លើយទៅថា យើងមានប្រជាពលរដ្ឋក្រីក្រ ហើយធ្វើអ្វីមួយកុំឱ្យគំហុក ជាចំណុចដែលពូមិនអាចទទួលបាន»។
បើតាមលោក សូណង់ អ្វីដែលលោកចុះស្រាវជ្រាវឃើញគឺពលរដ្ឋមានការសាទរនៅពេលអាជ្ញាធរអាចទប់ស្កាត់បទល្មើសនេសាទ ដែលលោកថា អ្នកប្រព្រឹត្តបទល្មើសទ្រង់ទ្រាយធំមិនមែនជាពលរដ្ឋក្រីក្រឡើយ។
ទោះជាយ៉ាងណា នៅក្នុងទំព័រហ្វេសប៊ុករបស់លោក វេង សាខុន បានចុះផ្សាយថា លោកបានរាយការណ៍សង្ខេបជូនកិច្ចប្រជុំអំពីវិស័យនីមួយៗ ដូចជា អនុវិស័យដំណាំគ្រប់ប្រភេទ ព្រៃឈើ ជលផល ផលិតកម្មសត្វ និងសុខភាពសត្វ និងអនុវិស័យកៅស៊ូ ដោយផ្ដោតទៅលើវឌ្ឍនភាព គោលនយោបាយ និងផែនការអភិវឌ្ឍវិស័យកសិម្ម និងបញ្ហាប្រឈមពាក់ព័ន្ធ។
ហ្វេកប៊ុកដដែលបន្តថា៖ «ឯកឧត្តមរដ្ឋមន្ត្រីបានបកស្រាយនិងគូសបញ្ជាក់អំពីយន្តការនៃដំណោះស្រាយបញ្ហាដោយឈរលើគោលការណ៍បច្ចេកទេស ច្បាប់ គោលនយោបាយ និងជាសំខាន់គឺយោងទៅតាមតួនាទី និងភារកិច្ចរបស់ក្រសួង»។
លោក ស្រី វុឌ្ឍី មន្ត្រីនាំពាក្យក្រសួងកសិកម្មបានបន្ថែមប្រាប់ភ្នំពេញប៉ុស្ដិ៍ថា ចំណុចលើកឡើងពីក្រុមឧត្តមក្រុមប្រឹក្សាពិគ្រោះនិងផ្ដល់យោបល់គឺក្រសួងទទួលយកអនុវត្ត ប៉ុន្តែចំណុចខ្លះដូចជា ការស្នើស្ដារឬបង្កើតប្រព័ន្ធធារាសាស្ដ្រជាដើម គឺមិនមែនជាសិទ្ធិអំណាចរបស់ក្រសួងកសិកម្មឡើយរួមទាំងការបង្កើតឱ្យមានតំបន់កសិកម្មទេសចរណ៍ជាដើម។
លោកថា៖ «ក្រសួងកសិកម្មអត់មានធ្វើបញ្ហាទឹកទេ ប៉ុន្តែក្រសួងកសិកម្មជំរុញសហការដើម្បីធ្វើកិច្ចការហ្នឹងជាមួយក្រសួងធនធានទឹក»។
បើតាមលោក ពេជ្រ ស្រស់ បន្ទាប់ពីកិច្ចប្រជុំជាមួយរដ្ឋមន្ត្រីក្រសួងកសិកម្មនេះ គឺលោកនឹងផ្ដោតលើរឿងសំខាន់មួយចំនួនទៀត ដូចជា បន្តតាមដានអំពីភាពអសកម្មរបស់មន្ត្រីថ្នាក់ក្រោមជាតិក្នុងការផ្ដល់សេវាជូនពលរដ្ឋ រួមទាំងដំណើរការប្រព័ន្ធយុត្តិធម៌ ជាពិសេសជួយជំរុញឱ្យមានការលើកទឹកចិត្តសម្រាប់សហគ្រាសធុនតូចនិងធំដើម្បីឱ្យពួកគេចូលរួមធ្វើឱ្យសេដ្ឋកិច្ចកម្ពុជាកាន់តែរឹងមាំបន្ថែមទៀត៕