.jpg)
ចង្អូរផ្លូវរថភ្លើងស្របតាមផ្លូវថ្នល់កាត់ពីមុខផ្ទះរបស់ប្រជាពលរដ្ឋ។ ស្រេង ម៉េងស្រ៊ុន
ភ្នំពេញៈ ប្រជាពលរដ្ឋនៅផ្លូវ ១០៥ K ត្រូវបានរំខានដោយសារសំឡេងរថភ្លើង ខណៈរថភ្លើងនេះបានចុចស៊ីផ្លេ និងបញ្ចេញសញ្ញា ហើយអ្នកបើកម៉ូតូ និងរថយន្តបានឈប់ដើម្បីទុកឲ្យរថភ្លើងឆ្លងកាត់។
ប្រជាពលរដ្ឋនៅក្នុងសង្កាត់នេះបានធ្វើការតវ៉ាប្រឆាំងនឹងគម្រោងរថភ្លើងនេះ ចាប់តាំងពីការប្រកាសកាលពីឆ្នាំមុន។
ឥឡូវនេះ ២ សប្តាហ៍ បន្ទាប់ពីវាចាប់ផ្តើមប្រជាពលរដ្ឋបាននិយាយថារថភ្លើងនេះរត់ ២ ដងក្នុងមួយម៉ោង និងរត់ទាំងថ្ងៃទាំងយប់ដែលដឹកប្រជាពលរដ្ឋពីព្រលានយន្តហោះមកក្នុងទីក្រុង។
ស្ត្រីម្នាក់ដែលជាម្ចាស់ហាងតូចមួយដែលសុំមិនបញ្ចេញឈ្មោះបានថ្លែងថា៖ «ខ្ញុំគ្មានពាក្យអ្វីនិយាយទេ។ យើងហាក់បីដូចជាមិនអាចឈ្នះពួកគេទេ។ វារត់ ២៤ ម៉ោងក្នុងមួយថ្ងៃ។ វាធ្វើឲ្យរញ្ជួយដីនៅជិតនោះ»។
ខណៈដែលសំឡេងរថភ្លើងកំពុងខិតជិតមកដល់ និងចុចស៊ីផ្លេឮៗ អ្នកស្រីបានសម្លក់ទៅរថភ្លើងនោះ។
អ្នកស្រីបានថ្លែងថា៖ «យើងបានធ្វើការតវ៉ាតាំងពីមុនពួកគេចាប់ផ្តើមគម្រោងនេះមកម្ល៉េះ។ ប៉ុន្តែឥឡូវនេះវាត្រូវបានសាងសង់រួច ហើយអ្នកចង់សម្ភាសខ្ញុំ តើវានឹងធ្វើឲ្យមានភាពផ្លាស់ប្តូរឬ?»។
ប្រជាពលរដ្ឋបានថ្លែងថាពួកគេដេកមិនលក់នៅពេលយប់ដោយសារតែសំឡេងឮខ្លាំងៗរបស់រថភ្លើង។ ម្ចាស់ហាងនៅជាប់ផ្លូវរថភ្លើងនិយាយថា អាជីវកម្មរបស់ពួកគេធ្លាក់ចុះ។ ជាងនេះទៀតគម្រោងទីក្រុងដែលពង្រីកផ្លូវមិនទាន់បញ្ចប់នៅឡើយទេ។
អ្នកនាង លីម លីណា អាយុ ២៧ ឆ្នាំដែលជាអ្នកធ្វើសក់បានថ្លែងថា៖ «ឥឡូវនេះវាប៉ះពាល់អាជីវកម្មរបស់ខ្ញុំ ដោយសារអាជីវកម្មរបស់ខ្ញុំស្ងាត់ខ្លាំងណាស់ឥឡូវនេះ»។ អ្នកស្រីថា៖ «ប្រសិនបើវានៅតែដូចអ៊ីចឹង យើងអាចនឹងស្វែងរកកន្លែងផ្សេង បន្ទាប់ពីពួកគេបញ្ចប់ការសាងសង់»។
លោក John Guiry អគ្គនាយកនៃក្រុមហ៊ុន Royal Railways Cambodia បានទទួលស្គាល់ការរំខានដែលរថភ្លើងបង្កទៅលើប្រជាពលរដ្ឋ ប៉ុន្តែបានសម្តែងទំនុកចិត្តថា ពួកគេនឹងសម្របខ្លួនទៅនឹងស្ថានភាពនេះ។
បើតាមលោក Guiry បានឲ្យដឹងថា បញ្ហាជាច្រើនជាមួយអ្នកបើកយានយន្តគួរត្រូវដោះស្រាយបាននៅពេលសាលារាជធានីបញ្ចប់ការពង្រីកផ្លូវ ដោយធ្វើឲ្យផ្លូវមានទំហំធំជាងមុន។ លោកថ្លែងថាគម្រោងនោះត្រូវបានរំពឹងថានឹងបញ្ចប់ពីមុនការបើកផ្លូវដែក ប៉ុន្តែក្រុង «មិនអាចធ្វើទាន់ពេល»។
លោក Guiry ដែលបានថ្លែងថាលោកជិះរថភ្លើងម្តងក្នុងមួយថ្ងៃក៏បានទទួលស្គាល់ថាអ្នកបើកត្រូវតែ «បញ្ឈប់ទម្លាប់ផ្លុំកញ្ចែ»។ លោកបានថ្លែងថា៖ «នោះជាបញ្ហា។ ខ្ញុំបានប្រាប់អ្នកបើកបរជាលក្ខណៈបុគ្គល សូមឈប់ប្រើកញ្ចែ ឈប់ប្រើស៊ីផ្លេ។ អ្នកមិនមែនកំពុងបើកនៅលើផ្លូវធំទេ»។
អ្នកនាំពាក្យសាលារាជធានីលោក ម៉េត មាសភក្តី មិនអាចទាក់ទងសុំអត្ថាធិប្បាយបានទេកាលពីថ្ងៃព្រហស្បតិ៍។
ទោះយ៉ាងណាក្តីប្រជាពលរដ្ឋមួយចំនួននិយាយថា ការពង្រីកផ្លូវដែលពាក់ព័ន្ធនឹងការពង្រីកផ្នែកខាងមុខផ្ទះរបស់ប្រជាពលរដ្ឋបានបង្កបញ្ហាឈឺក្បាលបន្ថែមទៀត។
អ្នកស្រី ហន់ អង្គហន អាយុ ៤៨ ឆ្នាំដែលជាអ្នកលក់អាហារបានថ្លែងថា រចនាសម្ព័ន្ធ និងទុយោទឹកនៅផ្ទះរបស់អ្នកស្រីបានខូចខាតដោយសារការសាងសង់នេះហើយឥឡូវនេះអ្នកស្រីត្រូវការជួលជាងមកជួសជុល។
អ្នកស្រី អង្គហន ដែលបានរស់នៅលើផ្លូវ ១០៥ K តាំងពីអ្នកស្រីអាយុ ៨ ឆ្នាំបានថ្លែងថា៖ «ដើម្បីបញ្ចៀសគ្រោះថ្នាក់ផ្សេងៗពួកគេពង្រីកផ្លូវ ហើយឥឡូវនេះវាកំពុងប៉ះពាល់ប្រជាពលរដ្ឋ»។ អ្នកស្រីបានបញ្ជាក់ថា៖ «ពួកគេផ្តល់គម្រោងនេះទៅក្រុមហ៊ុន ប៉ុន្តែមិនគិតអំពីប្រជាពលរដ្ឋ»។
ប្រជាពលរដ្ឋមួយចំនួនក៏ថ្លែងផងដែរថាពួកគេបារម្ភអំពីគ្រោះថ្នាក់ដែលរថភ្លើងនេះអាចបង្កទៅលើកូនរបស់ពួកគេ។
អ្នកស្រី កាន់ ពុត្រា អ្នករដ្ឋបាលនៅសាលាមត្តេយ្យឯកជនមួយដែលមានចម្ងាយពីរបីម៉ែត្រពីផ្លូវរថភ្លើងបានថ្លែងថា អ្នកស្រីបានសុំឲ្យសាលាដើរជូនក្មេងៗនៅពេលពួកគេចាប់ផ្តើមដើរទៅផ្ទះ។
អ្នកស្រី ពុត្រា បានសួរថា៖ «ហេតុអ្វីនៅលើផ្លូវតូចមួយបែរជាពួកគេសាងសង់ផ្លូវរថភ្លើងដូចនេះទៅវិញ? ប្រជាពលរដ្ឋនៅទីនេះមិនសប្បាយចិត្ត ប៉ុន្តែចាំមើល»៕
