The Phnom Penh Post Search

Search form

Logo of Phnom Penh Post newspaper Phnom Penh Post - ស៊ីខៅឌូ​ថា​រដ្ឋបាល​អ៊ីហ្គាមេន​ជួល​ក្មេង​វាយ​ពួក​គេ




ស៊ីខៅឌូ​ថា​រដ្ឋបាល​អ៊ីហ្គាមេន​ជួល​ក្មេង​វាយ​ពួក​គេ

ស៊ីខៅឌូ​ថា​រដ្ឋបាល​អ៊ីហ្គាមេន​ជួល​ក្មេង​វាយ​ពួក​គេ

130225_05a
កម្មកររោងចក្រអ៊ីហ្គាមេន ធ្វើកូដកម្មមុខរោងចក្រ កាលពីដើមខែនេះ ផា លីណា

កណ្តាលៈ សមាជិក​៧ នាក់​នៃ​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ហៅ​ស៊ីខៅឌូ អះអាង​ថា ក្រុម​ក្មេង​ទំនើង​ដែល​ជួល​ដោយ​ក្រុមហ៊ុន បាន​វាយ​ប្រហារ​លើ​ពួក​គេ​ដែល​កំពុង​ធ្វើ​កូដកម្ម កាល​ពី​រសៀល​ថ្ងៃ​ព្រហស្បតិ៍ នៅ​ខាង​ក្រៅ​រោងចក្រ​កាត់​ដេរ​អ៊ីហ្គាមេន ក្នុង​ស្រុក​ស្អាង​ ខេត្ត​កណ្តាល។ នេះ​ជា​លើក​ទី ២ ហើយ​ក្នុង​ខែ​នេះ​ដែល​កូដកម្ម​​បាន​ប្រែ​ក្លាយ​ទៅ​ជា​ស្ថានការណ៍​ អាក្រក់។

សហជីព​ថា បាន​ដាក់​ពាក្យ​បណ្តឹង​ទៅ​នគរបាល​ប៉ុស្តិ៍​ឃុំ​ពី​ថ្ងៃ​សុក្រ ហើយ​សមាជិក​សហជីព​ដែល​រង​របួស​បាន​ចេញ​ពី​មន្ទីរ​ពេទ្យ​ដែរ​ថ្ងៃ​នោះ ហើយ​ថា សមត្ថកិច្ច​នគរបាល​កំពុង​តែ​តាម​រក​ជន​សង្ស័យ​នៅ​ឡើយ។

លោក គង់ អាទិត្យ អនុប្រធាន ស៊ីខៅឌូ ពី​ម្សិលមិញ​ប្រាប់​ថា ក្រុម​ជន​ប្រមាណ​២០​នាក់ បាន​វាយ​ប្រហារ​មក​លើ​សមាជិក​សហជីព​ចំនួន ៧ នាក់ ខណៈ​ពួក​គេ​ចាក​ចេញ​ពី​កូដកម្ម​នៅ​ថ្ងៃ​នោះ​វិល​មក​ផ្ទះ​វិញ។

លោក​បញ្ជាក់​ថា ៖ «​ពួក​គេ​ប្រើ​ដំបង ​បំពង់ ​និង​ដុំ​ថ្ម ​វាយ​មក​លើ​សមាជិក​ខ្ញុំ នៅ​តាម​ផ្លូវ​ត្រឡប់​ទៅ​ផ្ទះ​វិញ កាល​ពី​រសៀល​ថ្ងៃ​ព្រហស្បតិ៍។ យើង​ស្គាល់​ក្មេងៗ​ទាំង​នោះ ពួក​គេ​ពាក់ព័ន្ធ​នឹង​ក្រុមហ៊ុន មន្រ្តី​រដ្ឋបាល​ក្រុមហ៊ុន​បញ្ជា​ពួក​គេ​ឲ្យ​ធ្វើ​បែប​នោះ​មក​លើ​សមាជិក សហជីព​ខ្ញុំ​»។

កម្មករ​នៅ​រោងចក្រ​អ៊ីហ្គាមេន ដែល​ផ្គត់ផ្គង់​ឲ្យ​ម៉ាក​ H&M​ បាន​ធ្វើ​កូដកម្ម​ចាប់​តាំង​ដើម​ខែ​នេះ ទាមទារ​ឲ្យ​ទទួល​យក​កម្មករ​៤១​នាក់ ជា​ផ្នែក​នៃ​ក្រុម​កម្មករ​ដែល​ត្រូវ​បណ្តេញ​ចេញ​ពី​ឆ្នាំ ២០០៧ ក្នុង​អំឡុង​នៃ​ការ​បង្កើត​សហជីព។ រោងចក្រ​បាន​ទទួល​យក​ពួក​គេ​ខ្លះ​ឲ្យ​ធ្វើ​ការ​វិញ ប៉ុន្តែ​បញ្ឈប់​៨នាក់​ម្តង​ទៀត នៅ​ក្នុង​ឆ្នាំ ២០១០។

លោក អាទិត្យ បន្ត​ថា កម្មករ​ដែល​នៅ​តែ​មាន​ការ​ងារ ទី​បំផុត​បាន​វិល​ត្រឡប់​ចូល​ធ្វើ​ការ​វិញ​​បន្ទាប់​ពី​ធ្វើ​កូដកម្ម​ រយៈ​ពេល​១សប្តាហ៍ ប៉ុន្តែ​សមាជិក​សហជីព​៤០ នាក់ នៅ​តែ​បន្ត​ធ្វើ​កូដ​កម្ម។

នៅ​ដើម​ខែ​នេះ កម្មករ​មួយ​ចំនួន​ក្នុង​ចំណោម​អ្នក​វិល​ត្រឡប់​ចូល​ធ្វើ​ការ​វិញ ដែល​កំពុង​ធ្វើ​ការ​តវ៉ា​នៅ​ពេល​នោះ បាន​អះអាង​ថា ពួកគេ​រង​របួស​ក្នុង​ការ​ប៉ះ​ទង្គិច​គ្នា​ជាមួយ​នឹង​នគរបាល​ដែល បាន​បដិសេធ​ការ​ចោទ​ប្រកាន់​នោះ។

លោក អាទិត្យ បាន​បន្ថែម​ថា សមាជិក​សហជីព​នឹង​បន្ត​ធ្វើ​កូដកម្ម​នេះ រហូត​ទាល់​តែ​ភាគី​និយោជក​ទទួល​យក​សំណើ​ពួក​គេ​វិញ។

លោក សូ សុខអាន អ្នក​គ្រប់គ្រង​រដ្ឋបាល​នៅ​រោងចក្រ​អ៊ីហ្គាមេន បាន​បដិសេធ​មិន​ផ្តល់​ការ​អត្ថាធិប្បាយ​លម្អិត​ទេ កាល​ពី​ម្សិលមិញ។

លោក​បាន​បន្ថែម​ថា៖ «វា​គ្រាន់​តែ​ជា​ការ​ចោទ​ប្រកាន់​ប៉ុណ្ណោះ ហើយ​ខ្ញុំ​ទុក​ឲ្យ​នគរបាល​ស៊ើប​អង្កេត​ករណី​នេះ»។

នគរបាល​ឃុំ​ស្វាយ​រលំ​ម្នាក់ ដែល​បដិសេធ​មិន​បញ្ចេញ​ឈ្មោះ បាន​ថ្លែង​ថា សមត្ថកិច្ច​នគរបាល​កំពុង​តាម​រក​អ្នក​វាយប្រហារ៕

អត្ថបទគួរចាប់អារម្មណ៍