.jpg)
កុមារា វីណេត បានបង្ហាញសៀវភៅដែលសរសេរអំពីខ្លួន ក្នុងពិធីសម្ភោធក្រុមសៀវភៅ "កុមារពិសេស"។ ហេង ជីវ័ន
ភ្នំពេញៈ ក្រុមសៀវភៅ «កុមារពិសេស» ៤ រឿងរបស់អង្គការស៊ីប៉ា គឺរឿង លក្ស្មី វីណិត គីមឡាង និងទីណា បានបក ស្រាយរឿងពិតនៃពិការភាពរបស់កុមារកម្ពុជា ៤ រូប និងប្រាប់ឲ្យមនុស្សទាំងអស់ទទួលយកភាពពិការរបស់ពួកគេដើម្បីឲ្យពួកគេទទួលបានការអប់រំដូចមនុស្សទូទៅដែរ។
លោក ហុក សុទ្ធិ នាយកអង្គការស៊ីប៉ាកម្ពុជា បានថ្លែងក្នុងពិធីសម្ពោធសៀវភៅ «កុមារពិសេស» នេះកាលពីម្សិលមិញថា៖ «សៀវភៅនេះយើងនិយាយពីរឿងពិតនៃពិការភាពទាំង ៤ របស់កុមារ។ យើងព្យាយាមធ្វើការបកស្រាយតាមបែបសប្បាយ មិនមែនគិតពីពិការភាពនេះ ជាទុក្ខលំបាកវេទនាទេ។ ពួកគាត់កើតមកអ៊ីចឹង វាមិនមែនជាបំណងរបស់ពួកគាត់ទេ»។
លោកបន្ដថា៖ «យើងចង់ឲ្យមនុស្សទាំងអស់គ្នាទទួលយកភាពពិការរបស់ពួកគាត់ ក្នុងន័យធម្មតា ហើយចូលរួមជួយដល់ពួកគាត់ឲ្យទទួលបានការអប់រំដូចមនុស្សទូទៅដែរនៅក្នុងសាលារៀន»។
បើតាមលោក សុទ្ធិ សៀវភៅនេះបានបោះពុម្ពជាលើកទី២ ដោយបោះពុម្ពក្នុង ១ លើកចំនួន ៣០០ ក្បាលក្នុង ១ ប្រភេទរឿង ១ និងបានដាក់បញ្ចូលទៅបណ្ណាល័យសាលាបឋមសិក្សាសាធារណៈចំនួន ៣០០ កន្លែង គ្រប់ខេត្ដទូទាំងប្រទេស កម្ពុជា។ លោកឲ្យដឹងថា អង្គការស៊ីប៉ាក៏បានដាក់សៀវភៅនេះទៅតាមបណ្ណាល័យតាមរោងចក្រ បណ្ណាល័យតាមមន្ទីរពេទ្យកុមារ និងបណ្ណាល័យនៅពន្ធនាគារផងដែរ។
លោក សុទ្ធិ ថ្លែងថា៖ «សៀវភៅនេះយើងចង់បង្ហាញពីជីវិតពិការភាពរបស់កុមារ។ ពួកគាត់មានការរស់នៅមិនដូចយើងទេ។ កាយវិការមួយចំនួនពួកគាត់មិនអាចធ្វើបានដូចយើងទេ ប៉ុន្ដែមានរឿងមួយចំនួនដែលយើងជាមនុស្សធម្មតាមិនអាចធ្វើបាន តែពួកគាត់ (កុមារពិការភាព) អាចធ្វើបាន។ អ្នកពិការភាពភាគច្រើនគឺបែបនេះ ពួកគាត់ដើរមិនកើតជាការលំបាកមួយរបស់ពួកគាត់ហើយ ប៉ុន្ដែពួកគាត់អាចមានជំនាញណាមួយទៀតអាចវិវឌ្ឍខុសពីមនុស្សធម្មតា»។
លោក សុទ្ធិ បញ្ជាក់ថា តាមរយៈកម្មវិធីលើកកម្ពស់ការយល់ដឹងស្ដីពីពិការភាព ស៊ីប៉ា បានបង្កើតកម្មវិធីនេះជាមួយនឹងសារថា «មាន ឬគ្មានពិការភាព កុមារទាំងអស់មានសិទ្ធិដូចគ្នាក្នុងការទទួលបានការអប់រំ»។
លោកបានបង្ហាញថា ក្នុងចំណោមក្រុមសៀវភៅពិការភាពទាំង ៤ នេះ សៀវភៅដែលមានចំណងជើងថា «លក្ស្មីមិនអាចរត់ និងលោតបាន» ដែលបង្ហាញពីកុមារី លក្ស្មី ក្នុងវ័យ ១៤ ឆ្នាំ ការទៅសាលារៀនរបស់នាង និងចំណង់ចំណូលចិត្ដចង់ក្លាយជាអ្នករចនាម៉ូដម្នាក់នៅថ្ងៃអនាគតផងដែរ។ សៀវភៅនេះក៏បានទទួលជយលាភីជាសៀវភៅឆ្នើមផ្នែកពិការភាពពីក្រុមប្រឹក្សាអន្ដរជាតិស្ដីពីសៀវភៅសម្រាប់កុមារ International Board on Books for Young People (IBBY) ផងដែរ។
ដោយឡែកសៀវភៅដែលមានចំណងជើងថា «គីមឡាង មើលមិនឃើញ តែ» ក៏បានបង្ហាញពីកុមារី គីមឡាង ក្នុងវ័យ ១៣ ឆ្នាំ ពីការទៅសាលារៀន និងចំណង់ចំណូលចិត្ដ និងក្ដីប្រាថ្នាចង់ក្លាយជាគ្រូភាសាអង់គ្លេស ១ រូបនៅថ្ងៃអនាគតរបស់នាងផងដែរ។
តាំងពីឆ្នាំ ២០០០ មក អង្គការស៊ីប៉ាបានចាប់ផ្ដើមកម្មវិធីបោះពុម្ពផ្សាយ ផលិតសៀវភៅអប់រំ និងសៀវភៅរឿងជាភាសាខ្មែរ ដើម្បីឲ្យកុមារទទួលបានចំណេះដឹង និងការកម្សាន្ដតាមរយៈការអាន៕
