ភ្នំពេញៈ តាមការណែនាំរបស់លោកនាយករដ្ឋមន្ត្រី ហ៊ុន សែន មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បាននិងកំពុងត្រៀមសត្វសុនខចំនួន ១០ ក្បាល និងមន្ត្រីជំនាញមួយចំនួនដើម្បីសហការជាមួយនឹងសាកលវិទ្យាល័យវិទ្យាសាស្ត្រសុខាភិបាលរបស់ក្រសួងសុខាភិបាល ដើម្បីបង្វឹកឱ្យមានសមត្ថភាពក្នុងការហិតរកអ្នកដែលមានផ្ទុកវីរុសកូវីដ១៩។
លោក ហេង រតនា អគ្គនាយក ស៊ីម៉ាក់ប្រាប់ ភ្នំពេញ ប៉ុស្តិ៍ ពីម្សិលមិញថា នៅចំពោះមុខនេះក្រៅតែពីការត្រៀមសុនខចំនួន ១០ ក្បាល ស៊ីម៉ាក់ក៏បានត្រៀមសម្ភារបរិក្ខារសម្រាប់ហ្វឹកហ្វឺនទាំងផ្នែកទន់ និងផ្នែករឹងដល់សុនខទាំងនេះដែលរហូតមកដល់ពេលនេះរង់ចាំតែជួបពិភាក្សាជាមួយនឹងមន្ត្រីជំនាញរបស់ក្រសួងសុខាភិបាលតែប៉ុណ្ណោះព្រោះអ្វីៗត្រូវបានត្រៀមរួចរាល់អស់ហើយទាំងទីកន្លែងនៅឡើយតែបំពាក់ជំនាញកូវីដ (ប្រភេទក្លិនរបស់មេរោគកូរ៉ូណា) ។
លោក ហេង រតនា ថ្លែងថា សុនខទាំង ១០ ក្បាលនេះ ត្រូវបានបែងចែកជា ២ ក្រុមដែលក្នុង ១ ក្រុមៗមានចំនួន ៥ ក្បាលដោយក្នុងនោះស៊ីម៉ាក់ប្រើប្រាស់សត្វសុនខដែលកំពុងហ្វឹកហ្វឺនមូលដ្ឋាន (ថ្នាក់បឋម និងថ្នាក់មធ្យម មិនហិតវីរុសកូរ៉ូណាទេ) ក្នុងការបង្វឹកវាឱ្យមានសមត្ថភាពគ្រប់គ្រាន់ ហើយយ៉ាងហោចណាស់គឺរយៈពេលតែ ៣ ទៅ ៤ ខែអាចប្រើប្រាស់បានហើយ។ ចំណែកសុនខ ១ ក្រុមទៀតអាចនឹងប្រើប្រាស់ពេលយូរជាងនេះ ទើបអាចប្រើប្រាស់បាន។
លោក ហេង រតនា បញ្ជាក់ថា៖ «ចំពោះបញ្ហាលំបាកក្នុងការហ្វឹកហ្វឺនសុនខនេះ គឺមិនមានទេ ព្រោះអ្នកជំនាញរបស់ CMAC មានទំនុកចិត្តខ្ពស់ និងមិនមានអ្វីដែលធ្វើមិនបានទេ ព្រោះនៅប្រទេសផ្សេងក៏គេអាចយកមកប្រើប្រាស់រួចហើយដូចនៅប្រទេសអាល្លឺម៉ង់ រុស្ស៊ី និងប្រទេសមួយចំនួនទៀត»។
លោក ហេង រតនា កាលពីថ្ងៃទី ២៤ ខែមីនា បានចុះទៅពិនិត្យការងារសុនខនៅវិទ្យាស្ថានបច្ចេកទេសសកម្មភាពមីនស៊ីម៉ាក់ខេត្តកំពង់ឆ្នាំងដើម្បីត្រៀមរៀបចំឱ្យក្រុមអ្នកវិទ្យាសាស្ត្រវេជ្ជសាស្ត្ររបស់កម្ពុជា និងក្រុមអ្នកជំនាញសុនខរបស់អង្គភាពស៊ីម៉ាក់សិក្សារួមគ្នាក្នុងការស្វែងរកគ្រប់វិធីសាស្ត្រដែលអាចធ្វើទៅបានដើម្បីប្រយុទ្ធប្រឆាំងជំងឺកូវីដ១៩។
បើតាមលោក ហេង រតនា គំនិតផ្តួចផ្តើមនេះ គឺជាការគិតគូរ និងជាការខិតខំរបស់លោកនាយករដ្ឋមន្ត្រី ហ៊ុន សែន ដើម្បីធ្វើយ៉ាងណាប្រើឱ្យអស់លទ្ធភាពដែលកម្ពុជាមានក្នុងការប្រយុទ្ធប្រឆាំងទៅនឹងជំងឺកូវីដ១៩ ដែលកំពុងរីករាលដាលក្នុងប្រទេស។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងពីម្សិលមិញថា លោកស្រីមិនទាន់ទទួលបានព័ត៌មានលម្អិតជុំវិញអ្វីដែលលោកនាយករដ្ឋមន្ត្រី ហ៊ុន សែន អនុញ្ញាតឱ្យក្រសួងសុខាភិបាល និងស៊ីម៉ាក់រៀបចំកម្មវិធីសិក្សាស្រាវជ្រាវ និងអភិវឌ្ឍសុនខជាជំនួយក្នុងការហិតរកអ្នកផ្ទុកជំងឺកូវីដ ១៩ នេះទេ «ដូច្នេះខ្ញុំសូមមិនមានយោបល់ទេ»។
ទោះជាយ៉ាងណាលោក ហេង រតនា បានពិភាក្សាការងារនេះជាមួយលោក ម៉ម ប៊ុនហេង រដ្ឋមន្ត្រីក្រសួងសុខាភិបាលរួចហើយដោយបានប្រគល់ភារកិច្ចនេះឱ្យទៅសាកលវិទ្យាល័យវិទ្យាសាស្ត្រសុខាភិបាលជាអ្នកអនុវត្តផ្ទាល់ជាមួយអង្គភាពស៊ីម៉ាក់៕
វីដេអូ៖