កណ្តាលៈ អគ្គនាយកស៊ីម៉ាក់បានអំពាវនាវឲ្យប្រជាពលរដ្ឋបញ្ឈប់ការយកគ្រាប់មិនទាន់ផ្ទុះដែលសេសសល់ពីសម័យសង្គ្រាម ទៅកែច្នៃធ្វើជាឧបករណ៍ប្រើប្រាស់ផ្សេងៗ បន្ទាប់ពីបុរសម្នាក់បានយកក្បាលគ្រាប់មិនទាន់ផ្ទុះទៅកែច្នៃធ្វើជាគ្រឿងបន្លាស់គ្រឿងយន្តកសិកម្មដែលបណ្ដាលឲ្យផ្ទុះស្លាប់នៅនឹងកន្លែងកាលពីថ្ងៃទី ២៨ ខែ មិថុនា ឆ្នាំ ២០២០ នៅចំណុចភូមិត្រពាំងព្រលិត ឃុំជ្រៃលាស់ ស្រុកពញាឮ។
លោក ទឹម វុត្ថា អធិការរងស្រុកពញាឮទទួលបន្ទុកផ្នែកសណ្ដាប់ធ្នាប់ និងអាវុធជាតិផ្ទុះថ្លែងពីម្សិលមិញថា នៅមុនពេលកើតហេតុ គេបានឃើញជនរងគ្រោះឈ្មោះ អ៊ី សារិន អាយុ ៥១ ឆ្នាំ ជាម្ចាស់រោងសិប្បកម្មកែច្នៃគ្រឿងយន្តកសិកម្មនៅក្នុងភូមិ-ឃុំកើតហេតុខាងលើបានយកក្បាលគ្រាប់ប្រភេទ ១០៥ មិល្លីម៉ែត្រ ចូលទៅក្នុងរោងសិប្បកម្មកែច្នៃរបស់គាត់ ដើម្បីកែច្នៃជាគ្រឿងបន្លាស់ផ្សេងៗ។ លុះប្រមាណ ៣០ នាទីក្រោយមកក៏ឮសំឡេងផ្ទុះយ៉ាងខ្លាំងបណ្ដាលឲ្យមានការភ្ញាក់ផ្អើល។
លោក វុត្ថា ថ្លែងថា៖ «ឥទ្ធិពលនៃក្បាលគ្រាប់នោះបានផ្ទុះបំបែកសពជនរងគ្រោះជាច្រើនបំណែកខ្ទាតរាយប៉ាយពេញក្នុងបន្ទប់រោងសិប្បកម្មដែលមើលទៅគួរឲ្យរន្ធត់បំផុត»។
បើតាមលោក វុត្ថា ក្រោយករណីនេះកើតឡើងក្រុមសមត្ថកិច្ចបានធ្វើការពិនិត្យទីតាំងគំនរអេតចាយរបស់ជនរងគ្រោះនៅក្បែររោងសិប្បកម្មជាលក្ខណៈគ្រួសារនោះហើយបានរកឃើញក្បាលគ្រាប់កាំភ្លើងធំប្រភេទ ១០៥ មិល្លីម៉ែត្រចំនួន ២ គ្រាប់ថែមទៀតនៅសេសសល់ក្នុងគំនរអេតចាយនោះដើម្បីទុកប្រគល់ឲ្យមន្ត្រីជំនាញនាំយកទៅកម្ទេចចោល។
លោក យន ថានុង អាយុ ២៥ ឆ្នាំ ជាកូនប្រុសបង្កើតរបស់ជនរងគ្រោះប្រាប់ភ្នំពេញប៉ុស្តិ៍ពីម្សិលមិញថា ក្បាលគ្រាប់ដែលយកមកកែច្នៃធ្វើជាគ្រឿងបន្លាស់ផ្សេងៗនេះគឺជាក្បាលគ្រាប់កាំភ្លើងធំចាស់ៗ ដែលឪពុករបស់លោកប្រមូលទិញពីអ្នកលក់អេតចាយនៅក្នុងភូមិកាលពី ១០ ឆ្នាំមុន។ «កន្លងមកពុកខ្ញុំ គាត់ធ្លាប់យកក្បាលគ្រាប់ចាស់ៗមកកែច្នៃធ្វើជាគ្រឿងបន្លាស់សម្រាប់គ្រឿងយន្តកសិកម្មជាច្រើនប្រភេទ មិនដែលមានបញ្ហាអ្វីនោះទេ»។ ថានុង និយាយទាំងសំឡេងយំតិចៗថា៖ «ប៉ុន្តែកាលពីថ្ងៃអាទិត្យ មិនដឹងថាគាត់ភ្លាត់ស្នៀតអ្វីនោះទេធ្វើឲ្យក្បាលគ្រាប់នោះផ្ទុះឡើងបណ្ដាលឲ្យគាត់ស្លាប់ ស្ទើរតែរកបំណែកនៃសពពុំឃើញ»។
ជុំវិញករណីនេះលោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) បានអំពាវនាវដល់ពលរដ្ឋសូមឲ្យបញ្ឈប់ការយកគ្រាប់សំណល់ពីសង្គ្រាមមកកែច្នៃធ្វើជាឧបករណ៍ប្រើប្រាស់ផ្សេងៗ ព្រោះវាជាអំពើខុសច្បាប់ និងអាចបង្កគ្រោះថ្នាក់ដល់អាយុជីវិត។
លោកថ្លែងថា៖ «ជាបឋមខ្ញុំសូមចូលរួមសោកស្តាយជាមួយគ្រួសារសព។ ឆ្លៀតឱកាសនេះ ខ្ញុំសូមអំពាវនាវជាថ្មី ចំពោះប្រជាពលរដ្ឋ ជាពិសេសអ្នកប្រកបមុខរបរគ្រឿងអេតចាយសូមបញ្ឈប់ការយកគ្រាប់សំណល់ពីសង្គ្រាមមកកែច្នៃ ព្រោះវាខុសច្បាប់ និងគ្រោះថ្នាក់ដល់អាយុជីវិតខ្លួនឯង សមាជិកគ្រួសារ និងអ្នកជិតខាង»។
ដោយឡែកនៅឯខេត្តបាត់ដំបង នគរបាលស្រុក រុក្ខគិរី បានរាយការណ៍ថា នៅរសៀលថ្ងៃទី ២៨ ខែ មិថុនា ឆ្នាំ ២០២០ មានករណីបើកត្រាក់ទ័រភ្ជួរដីស្រែកិនលើគ្រាប់មីនតោន ១ គ្រាប់ បណ្ដាលឲ្យផ្ទុះដាច់ជើងបុរសម្នាក់ ហើយត្រាក់ទ័រខូចខាតទាំងស្រុង។
លោក ឆែ ម៉ាប់ អធិការស្រុករុក្ខគិរីថ្លែងថា ជនរងគ្រោះឈ្មោះ ជន នាល់ អាយុ ៣៥ ឆ្នាំ មានលំនៅភូមិ ក្រញាំមាន់ ឃុំ អូរតាប៉ោង ស្រុកបាកាន ខេត្តពោធិ៍សាត់ ជាកម្មករស៊ីឈ្នួលបើកត្រាក់ទ័រភ្ជួរដីស្រែឲ្យក្រុមហ៊ុនឯកជនមួយនៅស្រុករុក្ខគិរី ខេត្តបាត់ដំបង។ ជនរងគ្រោះត្រូវបានអ្នកភូមិ និងអាជ្ញាធរជួយអន្តរាគមន៍ដឹកទៅកាន់មន្ទីរពេទ្យខេត្តបាត់ដំបងដើម្បីព្យាបាលរបួស៕