ភ្នំពេញៈ លោក ស៊ុន ចាន់ថុល ដែលបច្ចុប្បន្នជារដ្ឋមន្ត្រីក្រសួងពាណិជ្ជកម្មដែលនឹងត្រូវចូលកាន់តំណែងជារដ្ឋមន្ត្រីក្រសួងសាធារណការ និងដឹកជញ្ជូនបានប្តេជ្ញាធ្វើកំណែទម្រង់ប្រព័ន្ធវិស័យសាធារណការដែលរងការរិះគន់ឱ្យមានការរីកចម្រើនដើម្បីបង្កលក្ខណៈងាយស្រួលដល់ប្រជាពលរដ្ឋជាពិសេសទាក់ទាញវិនិយោគផងដែរ។
ក្រោយពីបញ្ចប់វេទិកាស្តីពីវិស័យពាណិជ្ជកម្ម និងអប់រំនៅកម្ពុជាកាលព្រឹកថ្ងៃទី ១៩ ខែមីនា នៅវិទ្យាស្ថានបច្ចេកវិទ្យាកម្ពុជា លោក ស៊ុន ចាន់ថុល ដែលធ្លាប់ជាអតីតថ្នាក់ដឹកនាំក្រសួងសាធារណការ និងដឹកជញ្ជូនកាលពីឆ្នាំ ២០០៤ ដល់ឆ្នាំ ២០០៨ ថ្លែងប្រាប់អ្នកសារព័ត៌មានថា លោកប្តេជ្ញាថា នឹងខិតខំប្រឹងប្រែងទាំងកម្លាំងកាយ និងចិត្តបម្រើប្រជាពលរដ្ឋឱ្យបានល្អដើម្បីឱ្យពលរដ្ឋងាយស្រួលក្នុងការធ្វើប័ណ្ណបើកបរ ឆៀករថយន្ត និងកសាងផ្លូវថ្នល់បន្ថែមទៀតដើម្បីឱ្យទាក់ទាញការវិនិយោគផងដែរ។
លោកបញ្ជាក់ថា៖ «យើងនឹងពង្រីកកំពង់ផែ ស្តាផ្លូវរទះភ្លើងដើម្បីឱ្យការដឹកជញ្ជូនមានតម្លៃថោកជាងមុនអាចប្រកួតប្រជែងជាមួយប្រទេសជិតខាង និងដើម្បីទាក់ទាញវិនិយោគក៏ដូចជាអ្នកទេសចរផងដែរ»។
លោកថា ការវិលត្រឡប់ទៅកាន់តំណែងចាស់របស់លោកនេះគឺដើម្បីរៀបចំសេវាសាធារណៈឱ្យល្អប្រសើរជាងមុន និងហេដ្ឋារចនាសម្ព័ន្ធ។
យ៉ាងណាក៏ដោយ លោកមិនស្តាយតួនាទីជារដ្ឋមន្ត្រីក្រសួងពាណិជ្ជកម្មនោះទេខណៈលោកអះអាងថាបានធ្វើការកែសម្រួលក្រសួងនេះបានច្រើន និងរង់ចាំជួយយ៉ាងពេញទំហឹងប្រសិនក្រសួងនេះត្រូវការលោកផ្តល់ជាយោបល់។
លោកថា៖ «ខ្ញុំក៏បានផ្តាំទៅឯកឧត្តមរដ្ឋមន្ត្រីថ្មីថាខ្ញុំត្រៀមខ្លួនជួយក្រសួងពាណិជ្ជកម្មជានិច្ចក្នុងការចរចាត្រូវការខ្ញុំម៉ោងណាខ្ញុំជួយបានទាំងអស់មិនមានបញ្ហានោះទេ»។
ការប្តេជ្ញារបស់លោក ស៊ុន ចាន់ថុល ធ្វើឡើងភា្លមៗ បន្ទាប់ពីលោកនាយករដ្ឋមន្ត្រី ហ៊ុន សែន បានសម្រេចផ្លាស់ប្តូររូបលោកពីរដ្ឋមន្ត្រីក្រសួងពាណិជ្ជកម្មទៅកាន់ដំណែងជារដ្ឋមន្ត្រីក្រសួងសាធារណការ និងដឹកជញ្ជូនវិញម្តង។ កន្លងទៅលោក ហ៊ុន សែន ក៏ធ្លាប់បានរិះគន់ទៅលើក្រសួងសាធារណការផងដែរថា ធ្វើការមានភាពស្ពឹកស្រពន់ជាងក្រសួងដទៃ។
នាយកវិទ្យាស្ថានសុវត្ថិភាពចរាចរណ៍លោក អ៊ា ចរិយា បង្ហាញសុដ្ឋិនិយមថាលោក ស៊ុន ចាន់ថុល អាចនឹងធ្វើឱ្យវិស័យសាធារណការមានភាពល្អប្រសើរជាងមុន ខណៈលោកមើលឃើញនៅពេលរដ្ឋមន្ត្រីរូបនេះធ្លាប់ជារដ្ឋមន្ត្រីនៅក្រសួងសាធារណការគឺមានការអភិវឌ្ឍច្រើនលើប្រព័ន្ធដឹកជញ្ចូន។
លោកថា៖ «ខ្ញុំសង្ឃឹមថា អ្វីដែលជាការប្តេជ្ញារបស់គាត់នឹងធ្វើឱ្យបានសម្រេចហើយសង្ឃឹមថាមន្ត្រីនៅក្រសួងសាធារណការ នឹងសហការជួយគាំទ្រការប្តេជ្ញានេះ ដើម្បីឲ្យបានសម្រេចប្រកបដោយប្រសិទ្ធភាពនៅក្នុងក្រសួងនេះ»។
យ៉ាងណាក៏ដោយលោកមើលឃើញថាប្រព័ន្ធសេវាសាធារណៈបច្ចុប្បន្នមានការខ្វះខាតច្រើនរួមមានសេវានៃការផ្តល់ប័ណ្ណបើកបរធ្វើឆៀករថយន្តនៅមានកម្រិតទាំងគុណភាព និងសេវា និងមិនទាន់មានភាពទូលំទូលាយដើម្បីឱ្យពលរដ្ឋទទួលយកសេវានេះបានទេ»។
បែបនេះក្តីលោកស្នើលោក ស៊ុន ចាន់ថុល នៅពេលក្លាយជារដ្ឋមន្ត្រីថ្មីនៅក្រសួងសាធារណការត្រូវយកចិត្តទុកដាក់លើបញ្ហាដែលជួបប្រទះនាពេលកន្លងមក និងចង់ឃើញការដេញថ្លៃធ្វើផ្លូវប្រកបទៅដោយតម្លាភាព និងប្រសិទ្ធភាព។
លោកថា៖ «ធ្វើម៉េចឱ្យគុណភាពផ្លូវអាចទទួលយកបានដូចនៅប្រទេសជឿនលឿន ធ្វើផ្លូវម្តងទុកបានរហូតទៅដល់ ១០ ទៅ ២០ ឆ្នាំទើបមានការជួសជុលតែកម្ពុជាយើងធ្វើផ្លូវមិនទាន់ចប់ស្រួលបួលផងខូចជាបណ្តើរៗ»។
លោកបន្តថា ចំណែកបរិក្ខារចរាចរណ៍ផ្លូវថ្នល់វិញនៅមានភាពខ្សោយមែនទែន ខណៈដែលលោកចង់ឃើញមានការថែទាំប្រព័ន្ធសុវត្ថិភាពផ្លូវថ្នល់ឱ្យមានភាពល្អប្រសើរ ដើម្បីជួយកាត់បន្ថយគ្រោះថ្នាក់ចរាចរណ៍ និងថវិកាជាតិដោយសារបញ្ហានេះ។
បើតាមលោក អ៊ា ចរិយា សេវាដឹកជញ្ជូនមានសារៈសំខាន់ក្នុងការទាក់ទាញអ្នកវិនិយោគមកកម្ពុជាពោលកាលណាសេវាដឹកជញ្ជូនល្អប្រសើរធ្វើឱ្យដំណើរការអាជីវកម្មប្រកបដោយប្រសិទ្ធភាពខ្ពស់ដោយលោកចង់ឃើញក្រសួងនេះមានការរៀបចំសេវាដឹកជញ្ជូនរួមមានឡានក្រុងនៅក្នុងទីក្រុង និងចេញទៅបណ្តាលខេត្ត និងសេវាដឹកជញ្ជូនតាមផ្លូវរថភ្លើង។
ការធ្វើផ្លូវថ្នល់នៅកម្ពុជាត្រូវបានមជ្ឈដ្ឋានជាច្រើនធ្វើការរិះគន់តាំងពីយូរមកហើយថាផ្លូវធ្វើខាងមុខខូចខាងក្រោយ គឺផ្លូវត្រូវធ្វើជាប់រហូត។ ជាមួយគ្នានេះការចេញប័ណ្ណបើកបរគ្មានតម្លាភាពការត្រួតពិនិត្យបច្ចេកទេសយានយន្ត ការបណ្តែតបណ្តោយឲ្យរថយន្តដឹកលើសចំណុះបំផ្លាញផ្លូវ និងបញ្ហាជាច្រើនទៀតក៏ត្រូវបានគេរិះគន់ផងដែរ៕
