ភ្នំពេញៈ ប្រទេសស៊ុយអែតតាមរយៈទីភ្នាក់ងារអភិវឌ្ឍន៍អន្តរជាតិប្រទេសស៊ុយអែត (SIDA) បានផ្តល់ទឹកប្រាក់ជិត ៣ លានដុល្លារដល់អង្គការតម្លាភាពកម្ពុជាដើម្បីប្រយុទ្ធប្រឆាំងអំពើពុករលួយនៅកម្ពុជាក្នុងរយៈពេល ៣ ឆ្នាំដែលកិច្ចព្រមព្រៀងថ្មីនេះរំពឹងថានឹងគាំទ្រដល់ការងារពង្រឹងតម្លាភាព និងគណនេយ្យភាពរបស់រាជរដ្ឋាភិបាលកម្ពុជា។
កាលពីរសៀលថ្ងៃអង្គារ អង្គការតម្លាភាពកម្ពុជា និង (SIDA) បានចុះកិច្ចព្រមព្រៀងហិរញ្ញប្បទានដែលមានទំហំទឹកប្រាក់ចំនួន ២៥,៥ លានសេក ឬ (ប្រមាណជា ២,៧ លានដុល្លារអាមេរិក) ក្នុងរយៈពេល ៣ ឆ្នាំចាប់ពីឆ្នាំ ២០២០ ដល់ឆ្នាំ ២០២២។
តាមសេចក្តីប្រកាសព័ត៌មានរបស់ស្ថានទូតស៊ុយអែតប្រចាំកម្ពុជាបានឲ្យដឹងថា សកម្មភាពទាំងនេះមានគោលបំណងបង្កើនអនុលោមភាពចំពោះច្បាប់ប្រឆាំងអំពើពុករលួយដែលសហភាពអឺរ៉ុប និងប្រទេសស៊ុយអែតសហការជាមួយស្ថាប័នដៃគូនៅកម្ពុជាដើម្បីពង្រឹងតម្រូវការ និងការផ្គត់ផ្គង់តម្លាភាព និងគណនេយ្យភាពនៅក្នុងវិស័យសាធារណៈកម្ពុជា។ បន្ថែមពីនេះជំនួយថវិកាដែលផ្តល់ទៅឲ្យអង្គការតម្លាភាពកម្ពុជាក៏នឹងរួមចំណែកដល់ការអនុវត្តផែនការយុទ្ធសាស្ត្ររយៈពេល ៣ ឆ្នាំ «រួមគ្នាប្រឆាំងអំពើពុករលួយ» របស់អង្គការតម្លាភាពកម្ពុជាផងដែរ។
ស្ថានទូតស៊ុយអែតប្រចាំកម្ពុជាបានឲ្យដឹងថា ផែនការយុទ្ធសាស្ត្រនេះមានកម្មវិធីស្នូលចំនួន ៥ ដូចជា ១- កម្មវិធីការចូលរួមក្នុងវិស័យសាធារណៈ និងកសាងភាពជាដៃគូ ២- កម្មវិធីពង្រឹងសិទ្ធិអំណាចប្រជាពលរដ្ឋ និងយុវជន ៣- កម្មវិធីសុចរិតភាពធុរកិច្ច ៤- កម្មវិធីពង្រឹងអភិបាលកិច្ចផ្ទៃ ក្នុង និងអភិវឌ្ឍន៍សមត្ថភាព និង ៥- កម្មវិធីស្រាវជ្រាវ និងអភិវឌ្ឍស្ថាប័ន។
សេចក្តីប្រកាសដដែលបានបន្តថា «គោលបំណងនៃកម្មវិធីគឺបង្កើតបរិយាកាសអំណោយផលសម្រាប់កំណែទម្រង់ការគ្រប់គ្រងហិរញ្ញវត្ថុសាធារណៈ។ ការងារនេះនឹងត្រូវអនុវត្តតាមរយៈការកសាងសមត្ថភាពស្ថាប័ន។ តួនាទីរបស់អង្គការតម្លាភាពកម្ពុជាគឺដើម្បីលើកកម្ពស់ការយល់ដឹងជុំវិញបញ្ហាពុករលួយដែលជាឧបសគ្គរាំងស្ទះកិច្ចអភិវឌ្ឍន៍ក្នុងសង្គមកម្ពុជា»។
លោក Magnus Saerundsson ប្រធានស្តីទីផ្នែកកិច្ចសហប្រតិបត្តិការអភិវឌ្ឍន៍អន្តរជាតិរបស់ស្ថានទូតស៊ុយអែតបានថ្លែងថា តម្លាភាព និងគណនេយ្យភាពនៅក្នុងសេចក្តីសម្រេចចិត្តការបែងចែកធនធាន និងការផ្តល់សេវាសាធារណៈពិតជាមានសារៈសំខាន់ខ្លាំងណាស់សម្រាប់លទ្ធិប្រជាធិបតេយ្យ និងការការពារសិទ្ធិមនុស្ស។
លោកបន្តថា៖ «យើងជឿថា កម្មវិធីភាពជាដៃគូដើម្បីគណនេយ្យភាព និងតម្លាភាពរួមជាមួយស្ថាប័នដៃគូនៅកម្ពុជា អ្នកជំនាញរបស់អាជ្ញាធរស៊ុយអែតនឹងរួមចំណែកជាវិជ្ជមានលើទិដ្ឋភាពជាច្រើននៅប្រទេសកម្ពុជា ដូចជា ការប្រឆាំងអំពើពុករលួយ ការរស់នៅរបស់ប្រជាជន និងបរិយាកាសអាជីវកម្មជាដើម។ កម្មវិធីនេះមានគោលដៅស្របគ្នានឹងការងារអាទិភាពដែលដាក់ចេញដោយរាជរដ្ឋាភិបាលកម្ពុជា»។
លោក ព្រាប កុល នាយកប្រតិបត្តិអង្គការតម្លាភាពកម្ពុជាបានប្រាប់ភ្នំពេញប៉ុស្តិ៍ពីម្សិលមិញថា ការបង្កើនគណនេយ្យភាព និងតម្លាភាពតាមរយៈការតស៊ូមតិ និងកិច្ចសន្ទនាដោយផ្អែកលើភ័ស្តុតាង និងការចូលរួមរបស់ប្រជាពលរដ្ឋ គឺជាមូលដ្ឋានគ្រឹះនៅក្នុងកិច្ចខិតខំប្រឹងប្រែងប្រឆាំងអំពើពុករលួយ និងកំណែទម្រង់ការគ្រប់គ្រងហិរញ្ញវត្ថុសាធារណៈនៅក្នុងប្រទេសកម្ពុជា។
លោក ព្រាប កុល បានបន្ថែមថា៖ «ជាលទ្ធផលនៃការធ្វើកំណែទម្រង់ និងកិច្ចខិតខំរបស់រដ្ឋាភិបាលមានផ្នែកមួយចំនួនឃើញមានការប្រសើរឡើង ដូចជា ការប្រមូលពន្ធ វិស័យអប់រំ និងការផ្តល់សេវា (សាធារណៈ) ជាដើម។ ប៉ុន្តែកម្ពុជាគឺនៅតែញាំញីដោយអំពើពុករលួយផ្នែកនយោបាយ និងអំពើពុករលួយដែលប្រព្រឹត្តដោយមន្ត្រីជាន់ខ្ពស់។ យើងជឿជាក់ថា ការគាំទ្រផ្នែកហិរញ្ញវត្ថុសប្បុរសរបស់ SIDA នឹងជួយជំរុញឲ្យកម្ពុជាទទួលបានភាពល្អប្រសើរបន្ថែមទៀត»។
កម្មវិធីភាពជាដៃគូដើម្បីគណនេយ្យភាព និងតម្លាភាពត្រូវបានរៀបចំឡើងដើម្បីបំពេញបន្ថែមដល់ជំនួយគាំទ្រផ្នែកថវិកាសាធារណៈរបស់សហភាពអឺរ៉ុបដើម្បីធ្វើកំណែទម្រង់ការគ្រប់គ្រងហិរញ្ញវត្ថុសាធារណៈតាមរយៈការផ្តល់ជំនួយបច្ចេកទេសដល់ស្ថាប័នរដ្ឋដែលធ្វើការលើការងារប្រមូលពន្ធ ការងារស្ថិតិ ការគ្រប់គ្រងហិរញ្ញវត្ថុសាធារណៈ តម្លាភាព និងគណនេយ្យភាព។
ស្ថាប័នដៃគូកម្ពុជាសម្រាប់កម្មវិធីភាពជាដៃគូដើម្បីគណនេយ្យភាព និងតម្លាភាពដំណាក់កាលទី ២ រួមមាន វិទ្យាស្ថានស្ថិតិអគ្គនាយកដ្ឋានពន្ធដារ វិទ្យាស្ថានសភាកម្ពុជា និងអង្គការតម្លាភាពកម្ពុជា។ នេះបើតាមសេចក្តីប្រកាសព័ត៌មានខាងលើ៕