.jpg)
សាកលវិទ្យាល័យភូមិន្ទភ្នំពេញ ដែលទទួលបានជំនួយផ្នែកស្រាវជ្រាវពីប្រទេសស៊ុយអែត។ សហការី
ភ្នំពេញៈ រដ្ឋាភិបាលស៊ុយអែត បានផ្តល់ថវិកាប្រមាណ ១០ លានដុល្លារជាជំនួយដើម្បីគាំទ្រដល់ការកសាងសមត្ថភាពផ្នែកស្រាវជ្រាវ និងការបណ្តុះបណ្តាលផ្នែកស្រាវជ្រាវប្រកបដោយគុណភាពខ្ពស់ នៅក្នុងប្រទេស កម្ពុជា ខណៈរដ្ឋមន្ត្រីក្រសួងអប់រំថា កម្ពុជាកំពុងត្រូវការក្រុមដែលទទួលបានការបណ្តុះបណ្តាលផ្នែកនេះ ច្បាស់លាស់។
ពិធីចុះកិច្ចព្រមព្រៀងលើដំណាក់កាលសាកល្បង ដែលមានរយៈពេល ៤ ឆ្នាំ រវាងរដ្ឋមន្ត្រីក្រសួងអប់រំ យុវជន និងកីឡា លើទឹកប្រាក់ ១០ លានដុល្លារនេះបានធ្វើឡើង កាលពីរសៀលថ្ងៃពុធនៅអគារ CKCC ក្នុងសាកលវិទ្យាល័យភូមិន្ទភ្នំពេញ។ តាមសេចក្តីប្រកាសរបស់ស្ថានទូតស៊ុយអែត បានឲ្យដឹងថា កិច្ចសហប្រតិបត្តិការនេះនឹងផ្តោតលើការពង្រឹងហេដ្ឋារចនាសម្ព័ន្ធបច្ចេកវិទ្យាព័ត៌មាន និងគមនាគមន៍នៅក្នុងសាកលវិទ្យាល័យភូមិន្ទភ្នំពេញ ព្រមទាំងការកសាងសមត្ថភាពផ្នែកស្រាវជ្រាវបែបវិទ្យាសាស្ត្រ និងការបណ្តុះបណ្តាលថ្នាក់ក្រោមឧត្តមសិក្សា នៅមហាវិទ្យាល័យវិទ្យាសាស្ត្រ និងវិស្វកម្ម។
លោកស្រី Anna Maria Oltorp ប្រធានផ្នែកកិច្ចសហប្រតិបត្តិការស្រាវជ្រាវនៃជំនួយអភិឌ្ឍន៍អន្តរជាតិរបស់ប្រទេសស៊ុយអែត បានថ្លែងថា ការស្រាវជ្រាវផ្នែកវិទ្យាសាស្ត្រ គឺជាសសរស្តម្ភមួយ សម្រាប់ការអភិវឌ្ឍប្រកបដោយចីរភាព។
លោកស្រីបន្តថា ស្របពេលដែលកម្ពុជាមានគោលដៅប្រែក្លាយជាប្រទេសមួយមានចំណូលមធ្យម ដូច្នេះការពង្រឹងសមត្ថភាពផ្នែកស្រាវជ្រាវ និងការបង្កើតប្រព័ន្ធមូលនិធិសម្រាប់ការស្រាវជ្រាវនៅកម្ពុជា គឺជាកិច្ចការចាំបាច់បំផុតដែលកម្ពុជាត្រូវធ្វើជាបន្ទាន់។
លោកស្រី Anna Maria បញ្ជាក់ថា៖ «ជំហានដំបូង នៃកិច្ចសហប្រតិបត្តិការនេះចាប់ផ្តើមនៅក្នុងសាកលវិទ្យាល័យភូមិន្ទភ្នំពេញ ដោយសារយើងបានវាយតម្លៃសាកលវិទ្យាល័យមួយនេះថា មានគុណវុឌ្ឍិគ្រប់គ្រាន់ ក្នុងការក្លាយជាសាកលវិទ្យាល័យគំរូ សម្រាប់ការសិក្សាជាន់ខ្ពស់ និងការស្រាវជ្រាវ ហើយថែមទាំងអាចធ្វើការបណ្តុះបណ្តាលដល់អ្នកស្រាវជ្រាវ នៅតាមផ្នែកជាច្រើនផ្សេងៗគ្នា»។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជននិងកីឡា បានថ្លែងថា រដ្ឋាភិបាលកម្ពុជា មើលឃើញអំពីសារៈសំខាន់នៃការសិក្សាជាន់ខ្ពស់ និងការស្រាវជ្រាវ ព្រមទាំងតម្រូវការដើម្បីធានាបាននូវភាពពាក់ព័ន្ធ និងគុណភាព។
លោកបញ្ជាក់ថា៖ «ការស្រាវជ្រាវគឺជាមូលដ្ឋានគ្រឹះសម្រាប់ការច្នៃប្រឌិត និងអាស្រ័យលើគុណភាពអប់រំនៅសាកលវិទ្យាល័យរួមទាំងក្រុមអ្នកស្រាវជ្រាវ ដែលទទួលបានការបណ្តុះបណ្តាលច្បាស់លាស់»។
លោក ជួនណារ៉ុន ក៏បញ្ជាក់ដែរថា កិច្ចសហប្រតិបត្តិការនេះ គឺបានបង្ហាញពីការបន្តតក្កភាព និងពង្រីកកិច្ចសហប្រតិបត្តិការរវាងប្រទេសទាំង ២ នៅក្នុងវិស័យអប់រំផងដែរ។
សាកលវិទ្យាល័យភូមិន្ទភ្នំពេញ គឺជាសាកលវិទ្យាល័យរដ្ឋ មានវ័យចំណាស់ និងធំជាងគេបង្អស់ នៅក្នុងប្រទេស ដែលវាបានចាប់ផ្តើមដំណើរការតាំងពីដើមឆ្នាំ ១៩៦០ ដោយមានមហាវិទ្យាល័យចំនួន ៥ និងមាននិស្សិតកំពុងសិក្សាថ្នាក់អាហារូបករណ៍ និងបង់ថ្លៃសិក្សាចំនួនជិត ២ ម៉ឺននាក់។
លោក ជេត ជាលី សាកលវិទ្យាធិការ នៃសាកលវិទ្យាល័យភូមិន្ទភ្នំពេញថ្លែងថា គោលបំណងរបស់យើងគឺធ្វើឲ្យសាកលវិទ្យាល័យនេះក្លាយជាគំរូមួយសម្រាប់ការបង្រៀនស្រាវជ្រាវ និងសេវាកម្មសហគមន៍។
លោកបញ្ជាក់ថា៖ «យើងពិតជារីករាយចំពោះការគាំទ្ររបស់ប្រទេសស៊ុយអែតក្នុងការកែលម្អប្រព័ន្ធបច្ចេកវិទ្យាព័ត៌មាន និងគមនាគមន៍ និងការកសាងសមត្ថភាពផ្នែកស្រាវជ្រាវ ក្នុងវិស័យវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា»។
ចាប់តាំងពីឆ្នាំ ១៩៧០ មក ប្រទេសស៊ុយអែត បានបន្តការគាំទ្រដល់កម្មវិធីជាច្រើន ដើម្បីកសាងសមត្ថភាពផ្នែកស្រាវជ្រាវ នៅតាមបណ្តាប្រទេសដែលមានចំណូលទាបក្នុងនោះ ក៏មានកម្ពុជាផងដែរដែលស៊ុយអែត ស្ថិតក្នុងចំណោមម្ចាស់ជំនួយធំៗ ដែលបានដើរតួនាទីដ៏មានសារៈសំខាន់ក្នុងការអភិវឌ្ឍវិស័យអប់រំនៅកម្ពុជា៕
