.jpg)
ប្រជាសហគមន៍ចូលរួមដាំកូនឈើកន្លងមក។ រូប Embassy of Sweden page
ភ្នំពេញៈ ស្ថានទូតស៊ុយអែតប្រចាំនៅកម្ពុជាសហការជាមួយក្រសួងបរិស្ថាន និងអង្គការ UNDP ប្រកាសចាប់ផ្ដើមអនុវត្តកម្មវិធីឆ្លើយតបចំពោះផលប៉ះពាល់នៃជំងឺកូវីដ ១៩ ដោយផ្ដល់ការគាំទ្រផ្នែកហិរញ្ញវត្ថុដល់សហគមន៍ជនបទប្រមាណ ១ ៦០០ គ្រួសារ ក្នុងខេត្តចំនួន ២ ដោយពួកគេត្រូវចូលរួមដាំដើមឈើនៅក្នុងមូលដ្ឋានជាថ្នូរនឹងការទទួលបានសាច់ប្រាក់ដើម្បីផ្គត់ផ្គង់ជីវភាព។
សេចក្តីប្រកាសព័ត៌មានរួមរបស់ស្ថានទូតស៊ុយអែត និងអង្គការ UNDP ស្តីពីកម្មវិធីសាច់ប្រាក់ពលកម្មបានឱ្យដឹងកាលពីថ្ងៃអង្គារថា ក្រៅពីដាំដើមឈើឡើងវិញ គម្រោងនេះក៏នឹងបង្កើតជាស្ថានីយបណ្ដុះកូនឈើ ដើម្បីចូលរួមក្នុងសកម្មភាពអភិរក្សដទៃទៀតនៅទូទាំងប្រទេសផងដែរ។
សេចក្តីប្រកាសព័ត៌មានរួមបញ្ជាក់ថា៖ «ព្រៃឈើ និងជីវចម្រុះនៅបន្តរងសម្ពាធក្នុងកម្រិតខ្ពស់ហើយវាកំពុងមានការកើនឡើងដោយសារតែការរាតត្បាតជាសកលនៃជំងឺកូវីដ ១៩។ នៅទូទាំងប្រទេសកម្ពុជា មនុស្សរាប់ម៉ឺននាក់បាត់បង់ការងារធ្វើ ហើយពលករចំណាកស្រុកជាង ១០ ម៉ឺននាក់បានវិលត្រឡប់ពីប្រទេសជិតខាងទៅកាន់ស្រុកកំណើតនៅតំបន់ជនបទវិញ»។
សេចក្តីប្រកាសដដែលបន្តថា៖ «ការស្វែងរកប្រាក់ចំណូល និងស្បៀងអាហារកាន់តែលំបាកទៅៗសម្រាប់ប្រជាជនមួយចំនួន។ ដើម្បីជីវភាពរស់នៅជាពិសេសក្នុងអំឡុងពេលនៃជំងឺរាតត្បាតនេះ ប្រជាជនកាន់តែច្រើនចាប់ផ្ដើមចូលព្រៃដើម្បីកាប់ឈើ បរបាញ់សត្វព្រៃ និងនេសាទជាដើម ដែលជាការដាក់សម្ពាធបន្ថែមទៀតមកលើប្រព័ន្ធអេកូឡូស៊ីដែលកំពុងមានភាពផុយស្រួយរួចទៅហើយនោះ»។
លោក ប្យ៊ន ហេកម៉ាក ឯកអគ្គរាជទូតស៊ុយអែតប្រចាំកម្ពុជាថ្លែងថា ការកាត់បន្ថយផលវិបាកដែលបង្កឡើងដោយសារការរាតត្បាតជាសកលនៃជំងឺកូវីដគឺជារឿងចាំបាច់។ លោកថា ការគាំទ្ររបស់ប្រទេសស៊ុយអែតចំពោះកញ្ចប់ថវិកាសង្គ្រោះបន្ទាន់គឺក្នុងទំហំទឹកប្រាក់ ៤ ៣០០ ០០០ SEK ឬ ប្រមាណជិតកន្លះលានដុល្លារអាមេរិក ហើយវានឹងរួមចំណែកដោះស្រាយបញ្ហានេះ។
លោកបញ្ជាក់ថា៖ «កញ្ចប់ថវិកានេះនឹងផ្ដល់ឱ្យសហគមន៍ដែលងាយរងគ្រោះនូវឱកាសរកប្រាក់ចំណូលបានភ្លាមៗ តាមរយៈការដាំដើមឈើ ដើម្បីជួយឱ្យពួកគេអាចទប់ទល់ជាមួយនឹងវិបត្តិសេដ្ឋកិច្ចដែលកំពុងកើតមាន។ សកម្មភាពនេះក៏នឹងរួមចំណែកដល់ការស្ដារប្រព័ន្ធអេកូឡូស៊ីដ៏មានសារៈសំខាន់ផងដែរ»។
លោក Nick Beresford តំណាងនិវាសនដ្ឋាននៃ UNDP ប្រចាំកម្ពុជាថ្លែងថា រដ្ឋាភិបាលប្រទេសស៊ុយអែត និង UNDP ប្ដេជ្ញាផ្ដល់ការគាំទ្រពេញទំហឹងដល់ប្រទេសកម្ពុជាក្នុងអំឡុងពេលនៃការរាតត្បាតជាសកលនេះ។ លោកថា៖ «កម្មវិធីដាំដើមឈើនេះជួយផ្ដល់ជាសាច់ប្រាក់ជាផ្នូរនឹងកម្លាំងពលកម្មនៅពេលដែលគេត្រូវការសាច់ប្រាក់ជាងគេបំផុតហើយតាមរយៈការវិនិយោគលើគម្របព្រៃឈើ យើងអាចរួមចំណែកដល់ការកសាងអនាគតកាន់តែបៃតងនិងកាន់តែស្អាតសម្រាប់គ្រប់គ្នា»។
លោក ទិន ពន្លក រដ្ឋលេខាធិការក្រសួងបរិស្ថានលើកឡើងថា កម្មវិធីផ្តល់សាច់ប្រាក់តាមរយៈការធ្វើពលកម្មគឺជាអន្តរាគមន៍ទាន់ពេលវេលាដែលគេត្រូវការជាចាំបាច់ ដើម្បីឆ្លើយតបភ្លាមៗចំពោះតម្រូវការបន្ទាន់របស់សហគមន៍ជនបទដែលរងផលប៉ះពាល់ដោយសារជំងឺកូវីដ ១៩ និងភាពចាំបាច់ក្នុងការស្ដារប្រព័ន្ធអេកូឡូស៊ីសំខាន់ៗដែលកំពុងទទួលរងសម្ពាធនៅកម្ពុជា។
លោកបញ្ជាក់ថា៖ «ការងារនេះនឹងជួយបង្កើនគម្របព្រៃឈើក្នុងតំបន់គោលដៅ ដែលជាប្រភពស្រូបយកកាបូន រួមចំណែកដល់ការបន្តប្រយុទ្ធប្រឆាំងទៅនឹងការប្រែប្រួលអាកាសធាតុរបស់យើង»។
បើតាមលោក នេត្រ ភក្ត្រា អ្នកនាំពាក្យក្រសួងបរិស្ថានតាមការធ្វើផែនការថវិកា គម្រោងនេះបានទិញកូនឈើប្រមាណ ៥១ ៧៥០ ដើម ហើយត្រូវចំណាយថវិកាប្រមាណ ៥១ ៧៥០ ដុល្លារ សម្រាប់យកទៅដាំឡើងវិញ នៅក្នុងខេត្តគោលដៅមានខេត្តសៀមរាប និងខេត្តពោធិ៍សាត់។
ក្រៅពីគម្រោងនេះលោកថា៖ «ម្ចាស់ជំនួយស៊ីដាតាមរយៈ UNDP ក៏បានផ្តល់ថវិកាដល់អង្គការមួយចំនួនផងដែរក្នុងការដាំកូនឈើនេះដែលអង្គការទាំងនោះមានដូចជា អង្គការ RECOFTC និង ADF ចំពោះតំបន់គោលដៅគឺនៅខេត្តពោធិ៍សាត់ និងសៀមរាបដូចគ្នា»។
គម្រោងស្តីពីកម្មវិធីផ្តល់សាច់ប្រាក់លើកម្លាំងពលកម្មនេះនឹងបន្តអនុវត្តរហូតដល់ខែមិថុនា ឆ្នាំ ២០២១ ក្នុងការផ្ដល់ឱកាសការងារភ្លាមៗដល់សហគមន៍ដែលមានតម្រូវការចាំបាច់ជាងគេ តាមរយៈសកម្មភាពដាំដើមឈើនៅខេត្តពោធិ៍សាត់ និងខេត្តសៀមរាបព្រមទាំងបណ្តុះកូនឈើនៅរដូវប្រាំង និងគាំទ្រដល់សកម្មភាពដាំដើមឈើ ១ ជុំទៀតចន្លោះពីខែឧសភា ដល់ខែមិថុនា ឆ្នាំ ២០២១៕
