The Phnom Penh Post Search

Search form

Logo of Phnom Penh Post newspaper Phnom Penh Post - ស៊ុយអែត និង​ស្វ៊ីស​ផ្តល់​ប្រាក់​ជាង $ ១៥​លាន




ស៊ុយអែត និង​ស្វ៊ីស​ផ្តល់​ប្រាក់​ជាង $ ១៥​លាន

Content image - Phnom Penh Post
ពិធី​ចុះហត្ថលេខា​ផ្តល់​ហិរញ្ញប្បទាន​​កាល​ពី​ម្សិល​មិញ។ ម៉ៃ វីរៈ

ស៊ុយអែត និង​ស្វ៊ីស​ផ្តល់​ប្រាក់​ជាង $ ១៥​លាន

ភ្នំពេញៈ រដ្ឋាភិបាល​ស៊ុយអែត និង​រដ្ឋាភិបាល​ស្វ៊ីស បាន​ចុះហត្ថលេខា​ផ្តល់​ហិរញ្ញប្បទាន​សរុប​ជាង​ ១៥ លាន​ដុល្លារ ដល់​កម្ពុជា ក្នុង​ការ​ពង្រឹង​ការ​អនុវត្ត​កំណែ​ទម្រង់​តម្រូវការ​សេវា​សាធារណៈ​នៅ​ថ្នាក់​ក្រោម​ជាតិ និង​លើក​កម្ពស់​អភិបាល​កិច្ច​ល្អ សម្រាប់​រយៈពេល​បី​ឆ្នាំ ចាប់ពី​ឆ្នាំ ២០១៥ ដល់​ឆ្នាំ ២០១៧។

កិច្ចព្រមព្រៀង​ក្នុង​ទឹកប្រាក់​ចំនួន​ ៨ លាន​ដុល្លារ​ពី​រដ្ឋាភិបាល​ ស៊ុយអែត និង​ទឹកប្រាក់​ចំនួន ៧,៨ លាន​ដុល្លារ ពី​រដ្ឋាភិបាល​ស្វ៊ីស​នេះ ត្រូវ​បាន​ចុះ​ហត្ថលេខា​កាលពី​ព្រឹក​ម្សិលមិញ រវាង​លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ និង​លោកស្រី Anna Maj Hultgard ឯក​អគ្គរាជទូត​ស៊ុយអែត និង​លោកស្រី Rahel Bosch នាយិកា​ការិយាល័យ​ទីភ្នាក់ងារ​សហប្រតិបត្តិការ​ស្វ៊ីស ប្រចាំ​កម្ពុជា​នៅ​ក្រសួង​មហាផ្ទៃ។

លោកស្រី Rahel Bosch នៃ​ប្រទេស​ស្វ៊ីស ឲ្យ​ដឹង​ថា លោកស្រី​ចង់​មើល​ឃើញ​កំណែ​ទម្រង់​វិមជ្ឈការ តាម​បែប​ប្រជាធិបតេយ្យ ដោយ​លើក​កម្ពស់​ការ​ចូលរួម។

លោកស្រី​កត់សម្គាល់​ថា អត្រា​នៃ​ភាព​ក្រីក្រ​នៅ​កម្ពុជា ត្រូវ​បាន​កាត់បន្ថយ ដល់​កម្រិត​ ១៩,៥ ភាគរយ តែ​ទោះ​យ៉ាង​ណា «ប្រជាពលរដ្ឋ​ ៥០ ភាគរយ​នៅ​តែ​ទទួល​រង​នូវ​ភាពក្រីក្រ​នៅ​ឡើយ និង​ទទួល​រង​នូវ​ការ​គំរាមកំហែង​ផ្សេងៗ រួមទាំង​ការ​មិន​ទទួល​បាន​នូវ​ការ​ថែទាំ​សេវា​សុខភាព​ឲ្យ​ប្រសើរ ការ​ខ្វះ​ចំណី​អាហារ​ និង​ជីវជាតិ ក៏​ដូចជា​ការ​ខ្វះ​នូវ​ប្រាក់​ចំណូល​»​។

លោកស្រី​ថា៖ «ការ​ប្រឈម​នៃ​ការ​អភិវឌ្ឍ​ទាំងនេះ ត្រូវ​បាន​ភ្ជាប់​ជា​សំខាន់ នូវ​សេចក្តី​ត្រូវការ​ក្នុង​ការ​ពង្រឹង ប្រព័ន្ធ​រដ្ឋបាល​វិមជ្ឈការ ដើម្បី​ឲ្យ​មាន​លទ្ធភាព ក្នុង​ការ​ធានា​បាន​នូវ​ការ​ទទួល​សេវា​ប្រកប​ដោយ​​គុណភាព​ស្មើៗ​គ្នា ជាពិសេស​សេវា​សាធារណៈ​ស្មើៗ​គ្នា»។

លោក ស ខេង ជា​ប្រធាន​គណៈកម្មាធិការ​ជាតិ​សម្រាប់​ការ​អភិវឌ្ឍ​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​ (គជអប) ផង​នោះ បាន​ថ្លែង​ថា៖ «ការ​ផ្តល់​ហិរញ្ញប្បទាន គាំទ្រ​សម្រាប់​រយៈពេល​ ៣ ឆ្នាំ បន្ទាប់​របស់​រដ្ឋាភិបាល​ស្វ៊ីស និង​រដ្ឋាភិបាល​ស៊ុយអែត នឹង​ផ្តល់​លទ្ធភាព​ឲ្យ គ ជ អ ប ក្នុង​ការ​ពង្រឹង​សមត្ថភាព និង​កែលម្អ​ប្រព័ន្ធ​គ្រប់គ្រង​នៅ​រដ្ឋបាល​ថ្នាក់​ក្រោម​ជាតិ​ឲ្យ​កាន់តែ​មាន​ភាព​ប្រសើរ​ឡើង​ថែម​ទៀត ជាពិសេស ចំពោះ​រដ្ឋបាល​ថ្នាក់​ក្រុង ស្រុក»៕

អត្ថបទគួរចាប់អារម្មណ៍