The Phnom Penh Post Search

Search form




Logo of Phnom Penh Post newspaper Phnom Penh Post - ស៊ុយ សុផាន ចូល​បំភ្លឺ​រដ្ឋសភា​ជុំវិញ​ជម្លោះ​នៅ​តំបន់​បុរីកីឡា

ស៊ុយ សុផាន ចូល​បំភ្លឺ​រដ្ឋសភា​ជុំវិញ​ជម្លោះ​នៅ​តំបន់​បុរីកីឡា

លោក​ស្រី ស៊ុយ សុផាន ប្រធាន​ក្រុម​ហ៊ុន ផានអ៊ីម៉ិច ផ្តល់​សម្ភាស​ដល់​អ្នក​កាសែត​ជុំវិញ​ជម្លោះ​នៅ​តំបន់​បុរីកីឡា កាល​ពី​ថ្ងៃ​ម្សិល​មិញ។
លោក​ស្រី ស៊ុយ សុផាន ប្រធាន​ក្រុម​ហ៊ុន ផានអ៊ីម៉ិច ផ្តល់​សម្ភាស​ដល់​អ្នក​កាសែត​ជុំវិញ​ជម្លោះ​នៅ​តំបន់​បុរីកីឡា កាល​ពី​ថ្ងៃ​ម្សិល​មិញ។ ហេង ជីវ័ន

ស៊ុយ សុផាន ចូល​បំភ្លឺ​រដ្ឋសភា​ជុំវិញ​ជម្លោះ​នៅ​តំបន់​បុរីកីឡា

ភ្នំពេញៈ នេះ​ជា​លើក ទី១ ហើយ ដែល​ប្រធាន​ក្រុម​ហ៊ុន ផានអ៊ីម៉ិច ដ៏​ល្បី​ល្បាញ​ក្នុង​រឿង​ជម្លោះ​ដី​លោក​ស្រី ស៊ុយ សុផាន បាន​ចេញ​មុខ​ឆ្លើយ​បំភ្លឺ​ចំពោះ​មុខ​អ្នក​តំណាង​រាស្ត្រ នៅ​ក្នុង​រដ្ឋសភា​ជុំវិញ​ជម្លោះ​ដី​ធ្លី​នៅ​តំបន់​បុរីកីឡា ដែល​ត្រូវ​បាន​បណ្តេញ​ពលរដ្ឋ​ស្នាក់​នៅ​ចេញ​ដោយ​ហិង្សា កាល​ពី​ដើម ឆ្នាំ​២០១២ កន្លង​ទៅ។

ក្រោយ​ជំនួប​ឆ្លើយ​បំភ្លឺ​ចំពោះ​មុខ​ប្រធាន និង​សមាជិក​គណៈ​កម្មការ​អង្កេត បោស​សម្អាត និង​ប្រឆាំង​អំពើ​ពុក​រលួយ​នៃ​រដ្ឋសភា​អស់​ពេល​ជាង ២ ម៉ោង​រួច​មក នៅ​ម៉ោង​ជិត ៥ ល្ងាច​ម្សិល​មិញ លោក​ស្រី ស៊ុយ សុផាន បាន​ប្រាប់​ក្រុម​អ្នក​យក​ព័ត៌មាន​ថា ក្រុម​ហ៊ុន​នឹង​ផ្តល់​ដំណោះ​ស្រាយ​តែ​ចំពោះ​គ្រួសារ​ណា ដែល​ដំណើរ​ការ​ដោះ​ស្រាយ​ដោយ​គណៈកម្មការ​របស់​សាលា​រាជធានី​រក​ឃើញ​ថា បាន​មក​តាំង​លំនៅ​ពិត​ប្រាកដ​នៅ​មុន ឆ្នាំ​២០០៣ និង​មាន​ឯកសារ​ច្បាស់​លាស់​ប៉ុណ្ណោះ។

ទោះ​បី​យ៉ាង​ណា លោក​ស្រី ស៊ុយ សុផាន បាន​បដិសេធ​មិន​ឆ្លើយ​ចំពោះ​ការ​សាក​សួរ​ថា តើ​នេះ​ជា​ការ​រំលោភ​លើ​កិច្ចសន្យា​ឬ ដែល​គាត់​បាន​សាង​សង់​តែ ៨ អគារ ហើយ​នៅ​ខ្វះ ២ អគារ​ទៀត​នោះ ដោយ​សំអាង​ថា ការ​សាង​សង់​អគារ គឺ​ផ្អែក​លើ​ចំនួន​ប្រជា​ពលរដ្ឋ​រស់​នៅ​ជាក់​លាក់​ក្នុង​តំបន់​បុរីកីឡា​នោះ។

លោក​ស្រី ស៊ុយ សុផាន បាន​តប​ថា៖ «បញ្ហា​ទាមទារ​ឲ្យ​តែ​មាន​ឯកសារ​មុន ឆ្នាំ​២០០៣ គឺ​យើង​ឲ្យ តែ​បើ​អត់ គឺ​អត់​ហើយ»។

សម្រាប់​លោក ហូរ វ៉ាន់ ប្រធាន​គណៈកម្មការ​អង្កេត បោស​សម្អាត និង​ប្រឆាំង​អំពើ​ពុក​រលួយ បាន​ឲ្យ​ដឹង​ថា ក្នុង​កិច្ច​សន្យា គឺ​ភាគី​លោក​ស្រី ស៊ុយ សុផាន ត្រូវ​សាង​សង់​អគារ ១០ សម្រាប់​ប្រជា​ពលរដ្ឋ ១ ៧៧៦ គ្រួសារ ប៉ុន្តែ ជាក់​ស្តែង គឺ​អគារ​ទាំង ៨ ដែល​បាន​សាង​សង់​រួច​នោះ គឺ​មាន​តែ​ប្រជា​ពលរដ្ឋ ១២៦១ គ្រួសារ​ប៉ុណ្ណោះ ហើយ​ក្នុង​នោះ ២៦១ គ្រួសារ ត្រូវ​បាន​ប្រជា​ពលរដ្ឋ​រង​គ្រោះ​ជម្លោះ​ដីធ្លី អះអាង​ថា ជា​ភាព​មិន​ប្រក្រតី ដែល​កើត​ឡើង​តាម​រយៈ​អំពើ​ពុក​រលួយ។

លោក​ថ្លែង​ថា៖ «គាត់ (ស៊ុយ សុផាន) ថា មិន​បាន​ដឹង​ពី​ភាព​មិន​ប្រក្រតី​ទាំង​នោះ​ទេ ហើយ​ក៏​មិន​បាន​ទទួល​ស្គាល់​ថា បំពាន​កិច្ចសន្យា​ដែរ ដោយ​គ្រាន់​តែ​ឆ្លើយ​ថា អគារ​ទាំង ៨ នោះ មិន​ទាន់​មាន​អ្នក​នៅ​អស់​ផង»។

លោក​ស្រី ស៊ុយ សុផាន ប្រធាន​ក្រុម​ហ៊ុន ផានអ៊ីម៉ិច ចេញ​ពី​ឆ្លើយ​បំភ្លឺ​គណៈ​កម្មការ ទី១០ សភា។
លោក​ស្រី ស៊ុយ សុផាន ប្រធាន​ក្រុម​ហ៊ុន ផានអ៊ីម៉ិច ចេញ​ពី​ឆ្លើយ​បំភ្លឺ​គណៈ​កម្មការ ទី១០ សភា។ ហេង ជីវ័ន

លោក ហូរ វ៉ាន់ បន្ថែម​ថា នេះ​ជា​កាតព្វកិច្ច​របស់​ក្រុម​ហ៊ុន ដែល​ត្រូវ​តែ​ដោះ​ស្រាយ ហើយ​សមត្ថកិច្ច​ត្រូវ​ពន្លឿន​នីតិវិធី ដើម្បី​ផ្តល់​យុត្តិធម៌​ដល់​ប្រជា​ពលរដ្ឋ ក្នុង​ជម្លោះ​ដីធ្លី ដែល​នៅ​សេស​សល់​ទាំង​នោះ។

លោក​មាន​ប្រសាសន៍​ថា៖ «ខ្ញុំ​ក៏​មាន​វត្តមាន​នៅ​ទី​នោះ ពេល​ដែល​គេ​កំពុង​កម្ទេច​អគារ​នោះ​ដែរ បង​ប្អូន​ប្រជា​ពលរដ្ឋ​មិន​មាន​ឱកាស​ប្រមូល​ឯកសារ​សូម្បី​តែ​របស់​មាន​តម្លៃ​ផង​ទេ»។

លោក ហូរ វ៉ាន់ បន្ត​ឲ្យ​ដឹង​ថា លោក​នឹង​បន្ត​ទំនាក់​ទំនង​ជាមួយ​លោក​ស្រី ស៊ុយ សុផាន ដើម្បី​ផ្តល់​ជម្រើស​បន្ថែម​ផ្សេងៗ​ទៀត ក្នុង​បញ្ហា​ជម្លោះ​នេះ ហើយ​ក្នុង​ករណី​ដែល​នៅ​តែ​មិន​មាន​ដំណោះ​ស្រាយ​សមរម្យ​ដល់​ប្រជា​ពលរដ្ឋ​ទាំង​នោះ ក្នុង​រយៈ​ពេល​សមរម្យ​នោះ លោក​នឹង​ធ្វើ​ចំណារ​លើ​លិខិត​ទៅ​កាន់​លោក​នាយក​រដ្ឋ​មន្រ្តី សើរើ​កិច្ច​សន្យា​ផ្តល់​សិទ្ធិ​ដល់​ក្រុម​ហ៊ុន​នេះ​វិញ។

ឆ្លើយ​តប​ទៅ​នឹង​បញ្ហា​នេះ តំណាង​ពលរដ្ឋ​បុរីកីឡា អ្នក​ស្រី ឆាយ គឹមហ៊ន បាន​ឲ្យ​ដឹង​ថា ដំណោះ​ស្រាយ​ដែល​លោក​ស្រី ស៊ុយ សុផាន ផ្តល់​ឲ្យ​នេះ គឺជា​ចេតនា​គាប​សង្កត់​មក​លើ​ពួក​គាត់ និង​គេច​វេះ​ពី​កាតព្វកិច្ច​របស់​ខ្លួន។

អ្នក​ស្រី​បន្ត​ថា៖ «ពួក​យើង​គ្មាន​ឯកសារ សម្រាប់​វាយ​តម្លៃ​ពី​កម្មសិទ្ធិ​នោះ​ទេ ហើយ​ពួក​យើង​នឹង​បន្ត​យុទ្ធនាការ​ទាម​ទារ​របស់​យើង លុះ​ណា​តែ​មាន​ដំណោះ​ស្រាយ​សមរម្យ»។

គួរ​បញ្ជាក់​ថា ជម្លោះ​ដីធ្លី​តំបន់​បុរីកីឡា នេះ បាន​កើត​ឡើង​បន្ទាប់​ពី​រដ្ឋាភិបាល​កម្ពុជា បាន​ផ្តល់​សិទ្ធិ​ដល់​ក្រុម​ហ៊ុន ផានអ៊ីម៉ិច ទទួល​យក​ដី​មួយ​ភាគ​ធំ​នៅ​តំបន់​នោះ ជា​ថ្នូរ​នឹង​ការ​សាង​សង់​អគារ​ចំនួន ១០ ខ្នង​ដល់​ប្រជា​ពលរដ្ឋ ប៉ុន្តែ​ដំណើរ​ការ​សាង​សង់​នោះ​បាន​ត្រឹម ៨ អគារ ក៏​បាន​ផ្អាក​ទៅ​វិញ​បណ្តាល​ឲ្យ​ប្រជា​ពលរដ្ឋ​រ៉ាប់​រយ​គ្រួសារ​រង​ផល​ប៉ះពាល់​និង​រង​ការ​បណ្តេញ​ចេញ​ដោយ​ហិង្សា ក្នុង​នោះ​មាន​ជាង ១៥០ គ្រួសារ​បាន​បន្ត​ការ​ទាម​ទារ​ដោយ​ស្វែង​រក​អន្តរាគមន៍​ពី​អង្គការ​និង​តាម​អង្គទូត​នានា​និង​អាជ្ញាធរ​ពាក់​ព័ន្ធ​រហូត​មក​ដល់​បច្ចុប្បន្ន​នេះ៕

អត្ថបទគួរចាប់អារម្មណ៍