The Phnom Penh Post Search

Search form




Logo of Phnom Penh Post newspaper Phnom Penh Post - ស៊ូប៊ែរឌី បន្ត​រិះគន់​ការ​បណ្តេញ​អ្នក​តំណាង​រាស្ត្រ​ពី​រដ្ឋសភា




ស៊ូប៊ែរឌី បន្ត​រិះគន់​ការ​បណ្តេញ​អ្នក​តំណាង​រាស្ត្រ​ពី​រដ្ឋសភា

ស៊ូប៊ែរឌី បន្ត​រិះគន់​ការ​បណ្តេញ​អ្នក​តំណាង​រាស្ត្រ​ពី​រដ្ឋសភា

130819_07
លោកស៊ូប៊ែរឌី នៅក្នុងសន្និសីទកាសែតមួយនៅពេលមកកម្ពុជាកាលពីខែឧសភា ហេង ជីវ័ន

ភ្នំពេញៈ ប្រេសិត​សិទ្ធិ​មនុស្ស​របស់​អង្គការ​សហ​ប្រជាជាតិ ប្រចាំ​នៅ​កម្ពុជា លោក សូរិយា ស៊ូប៊ែរឌី បាន​ថ្លែង​នៅ​ក្នុង​របាយ​ការណ៍​ចុង​ក្រោយ​បំផុត ស្តី​ពី​កម្ពុជា​ថា ថ្វី​បើ​រដ្ឋាភិបាល បង្ហាញ​ថា​ខ្លួន​បើក​ចំហ​ដល់​កំណែ​ទម្រង់​សភា​ក៏​ដោយ ក៏​ការ​បណ្តេញ​ចេញ​ក្រុម​សមាជិក​សភា​គណបក្ស​ប្រឆាំង កាល​ពី​ខែ មិថុនា គឺជា​ការ​ងាក​ចេញ​គួរ​ឲ្យ​បារម្ភ ពី​ការ​ប្តេជ្ញា​មួយ ចំពោះ​ការ​ការពារ​សិទ្ធិ​មនុស្ស។

របាយ​ការណ៍ ដែល​គេ​ទទួល​បាន កាល​ពី​ថ្ងៃ​សុក្រ ឲ្យ​ដឹង​ថា ឯកសារ​នេះ បាន​ពិនិត្យ​ជា​ថ្មី នូវ​អនុសាសន៍​ជា​ច្រើន ដែល​លោក ស៊ូបែឌី បាន​ដាក់​ជូន​ទៅ​អង្គការ​សហ​ប្រជាជាតិ បន្ទាប់​ពី​ដំណើរ​ទស្សនកិច្ច មក​កម្ពុជា កាល​ពី​លើក​មុន ហើយ​បាន​សន្និដ្ឋាន​ថា ទោះ​បី​រដ្ឋធម្មនុញ្ញ​របស់​កម្ពុជា បាន​កំណត់​យក​របប​ប្រជាធិបតេយ្យ​សេរី​ពហុបក្ស​ក៏​ដោយ ក៏​កម្ពុជា «នៅ​តែ​មាន​ទំនាក់​ទំនង​លទ្ធិ​ប្រជាធិបតេយ្យ​មួយ ដែល​មាន​ដែន​កំណត់»។

លោក ស៊ូប៊ែរឌី បាន​បញ្ជាក់​ក្នុង​របាយ​ការណ៍ ដែល​គេ​សរសេរ​កាល​ពី​មុន​ការ​បោះឆ្នោត​ថា លោក ទទួល​បាន​ការ​ឆ្លើយ​តប​វិជ្ជមាន​ជាច្រើន ពី​តំណាង​រាស្រ្ត និង​ព្រឹទ្ធសភា ជុំវិញ​ការ​ផ្តល់​អនុសាសន៍​របស់​លោក ដែល​លោក និយាយ​ថា ចាំបាច់​ត្រូវ «បង្កើន​ដំណើរការ​នៃ​លទ្ធិ​ប្រជាធិបតេយ្យ​ភាវូបនីយកម្ម ក្នុង​ប្រទេស​ពាក់​ព័ន្ធ​នឹង​សភា»។

លោក បាន​មាន​ប្រសាសន៍​បន្ត​ថា ប៉ុន្តែ​ការ​បណ្តេញ​សមាជិក​សភា មក​ពី​គណបក្ស សម រង្ស៊ី និង​សិទ្ធិ​មនុស្ស​កាល​ពី​ខែ មិថុនា ដោយ​គណៈកម្មាធិការ​សភា ដែល​គ្រប់​គ្រង​ដោយ​គណបក្ស​ប្រជាជន ដោយ​សារ​តែ​សមាជិក​សភា​ទាំង​នោះ បាន​ចូល​រួម​ជាមួយ​គណបក្ស​សង្គ្រោះ​ជាតិ ដែល​គេ​បាន​ច្របាច់​បញ្ចូល​គ្នា គឺជា​ការ​ដើរ​ថយ​ក្រោយ។

លោក ស៊ូប៊ែរឌី បាន​សរសេរ​ថា៖ «ដោយ​សារ​តែ​សកម្មភាព​បែប​នេះ សមាជិក​សភា​ទាំង​នោះ ត្រូវ​បាន​គេ​បដិសេធ មិន​ត្រឹម​តែ​លទ្ធភាព ពាំនាំ​សារ​របស់​ពួក​គេ តាម​រយៈ​សភា​ប៉ុណ្ណោះ​ទេ ប៉ុន្តែ​ថែម​ទាំង​ប្រាក់​ខែ​របស់​ពួក​គេ ត្រូវ​បាន​គេ​កាត់​ហើយ​អភ័យ​ឯកសិទ្ធិ​សភា​របស់​ពួក​គេ ត្រូវ​បាន​គេ​ដក ដែល​បាន​ធ្វើ​ឲ្យ​មាន​បរិយាកាស​មិន​ល្អ និង​មិន​ស្រប​តាម​លទ្ធិ​ប្រជាធិបតេយ្យ​ឡើយ»។

អនុសាសន៍​មួយ ក្នុង​ចំណោម​អនុសាសន៍​ជាច្រើន របស់​លោក ស៊ូប៊ែរឌី គឺថា នីតិវិធី​សម្រាប់​ការ​ដក​អភ័យ​ឯក​សិទ្ធិ និង​ចំណាត់ការ​វិន័យ​ផ្សេងៗ ប្រឆាំង​នឹង​សមាជិក​សភា ដែល​កំពុង​ស្ថិត​ក្នុង​តំណែង នឹង​ត្រូវ​ធ្វើ​ស្រប​តាម «គោលការណ៍​យុត្តិធម៌ ដែល​មាន​ពី​កំណើត ស្តង់ដារ​រដ្ឋ​ធម្មនុញ្ញ និង​សេរីភាព​នៃ​ការ​បញ្ចេញ​មតិ»។

លោក បាន​សរសេរ​បន្ថែម​ថា៖ «ប៉ុន្តែ (អនុសាសន៍) ស្ទើរ​តែ​ទាំង​អស់ របស់​ខ្ញុំ ខ្ញុំ​មាន​ការ​សោក​ស្តាយ​ដែល​ថា ដំណើរការ​វិវត្ត​ថ្មីៗ​នេះ មិន​បាន​បង្ហាញ​ពី​ការ​វិវត្ត​ឆ្ពោះ​ទៅ​រក​ការ​ការពារ​សិទ្ធិ​មនុស្ស​ឲ្យ​កាន់​តែ​ប្រសើរ​ទេ តែ​ផ្ទុយ​ទៅ​វិញ ជា​ការ​ប្រែ​ក្រឡាស់​មួយ ដែល​គួរ​ឲ្យ​បារម្ភ»។

យ៉ាង​ណា​ក៏​ដោយ សមាជិក​សភា​បក្ស​កាន់​អំណាច​លោក ឈាង វុន បាន​និយាយ​កាល​ពី​ថ្ងៃ​ម្សិលមិញ​ថា លោក​មិន​បាន​កត់​សម្គាល់​អំពី​អ្វី​ដែល​របាយ​ការណ៍​របស់​លោក ស៊ូប៊ែរឌី ឬ​អ្វី​ដែល​បាន​កើត​ឡើង ក្នុង​សភា​កាល​ពី​ខែ មិថុនា​នោះ​ទេ។ លោក បញ្ជាក់​ថា ផែនការ​កំណែ​ទម្រង់​ណា​មួយ អាច​នឹង​កើត​ឡើង តែ​បន្ទាប់​ពី​សភា​ជាតិ បើក​សម័យ​ប្រជុំ​ជា​ថ្មី នៅ​ចុង​ខែ កញ្ញា​ខាង​មុខ។ លោក បាន​បន្ថែម​ថា៖ «យើង នឹង​មាន​ការ​សោកស្តាយ ប្រសិន​បើ​គណបក្ស​សង្គ្រោះ​ជាតិ មិន​ចូល​រួម​ក្នុង​សភា​ជាតិ»។

នៅ​ក្នុង​របាយ​ការណ៍​ដដែល លោក ស៊ូប៊ែរឌី ក៏​បាន​ពិនិត្យ​ជា​ថ្មី នូវ​អនុសាសន៍​ជាច្រើន ដែល​លោក​បាន​លើក​ឡើង​ជុំវិញ​បញ្ហា​តុលាការ ការ​បោះឆ្នោត និង​សម្បទាន​ដីធ្លី​។ ជា​ការ​កត់​សម្គាល់​លោក ស៊ូប៊ែរឌី បាន​បញ្ជាក់​ក្នុង​របាយ​ការណ៍​ថា៖ «ជា​រួម កម្ពុជា ទំនង​ជា​កំពុង​តែ​ដើរ​លើ​ផ្លូវ​ឆ្ពោះ​ទៅ​រក​លទ្ធិ​ប្រជាធិបតេយ្យ» ដោយ​លោក កត់​សម្គាល់​ថា «ចំណាត់ការ​ធំៗ» មាន​ដូច​ជា​ការ​ដោះលែង​ប្រធាន​វិទ្យុ​សំបុក​ឃ្មុំ​លោក ម៉ម សូណង់ដូ ពី​ពន្ធនាគារ និង​ការ​ប្រទាន​ការ​លើក​លែង​ទោស​ពី​ព្រះ​មហាក្សត្រ ដល់​មេ​ដឹក​នាំ​បក្ស​ប្រឆាំង​លោក សម រង្ស៊ី​ជាដើម៕

រាយការណ៍​បន្ថែម​ដោយ វង្ស សុខេង និង AFP

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។