The Phnom Penh Post Search

Search form




Logo of Phnom Penh Post newspaper Phnom Penh Post - ស៊ូប៊ែរឌី បារម្ភ​ពី​ការ​ប្រឆាំង វៀតណាម របស់ CNRP

ស៊ូប៊ែរឌី បារម្ភ​ពី​ការ​ប្រឆាំង វៀតណាម របស់ CNRP

ស៊ូប៊ែរឌី បារម្ភ​ពី​ការ​ប្រឆាំង វៀតណាម របស់ CNRP

ភ្នំពេញៈ លោក សូរិយា ស៊ូប៊ែរឌី ប្រេសិត​សិទិ្ធ​មនុស្ស​របស់​អង្គការ​សហ​ប្រជាជាតិ បាន​ថ្លែង​កាល​ពី​ម្សិលមិញ​ថា លោក​ព្រួយ​បារម្ភ​ដោយ​សារ​តែ​ភាសា​ប្រឆាំង វៀតណាម ដែល​បាន​ប្រើ​ដោយ​គណបក្ស​ប្រឆាំង​ដើម្បី​ប្រមូល​ផ្តុំ​អ្នក​គាំទ្រ​របស់​ខ្លួន ជា​សារ​ដែល​លោក​បាន​ប្រាប់​ថ្នាក់​ដឹក​នាំ​គណបក្ស​សង្គ្រោះ​ជាតិ ក្នុង​អំឡុង​ដំណើរ​ទស្សនកិច្ច​របស់​លោក។

ថ្លែង​ក្នុង​សន្និសីទ​កាសែត​ពេល​បញ្ចប់​បេសកកម្ម​លោក ស៊ូប៊ែរឌី ថ្លែង​ថា លោក​បាន​ប្រាប់​មេ​ដឹក​នាំ​គណបក្ស​សង្គ្រោះ​ជាតិ​ថា ការ​អត់​ឱន​និង​សុខដុម​ជាតិ​សាសន៍​មាន​សារៈ​សំខាន់ ចំពោះ​អនាគត​របស់​លទិ្ធ​ប្រជាធិបតេយ្យ​កម្ពុជា។

លោក​ថ្លែង​ថា៖ «ខ្ញុំ​ព្រួយ​បារម្ភ​ដោយ​សារ​តែ​ភាសា​ប្រឆាំង វៀតណាម ដែល​ប្រើ​ដោយ​គណបក្ស​ប្រឆាំង​ជា​សាធារណៈ»។

លោក ស៊ូប៊ែរឌី កត់​សម្គាល់​ចំពោះ​ការ​វាយ​ប្រហារ​មក​លើ​ហាង វៀតណាម ជាច្រើន​កន្លែង ក្នុង​អំឡុង​ពេល​ប៉ះទង្គិច​រវាង​កម្មករ ដែល​ធ្វើ​កូដកម្ម​និង​អាជ្ញាធរ​កាល​ពី​ថ្ងៃ ទី៣ ខែ មករា កន្លង​ទៅ។

លោក​បញ្ជាក់​ថា៖ «ការ​ផ្សព្វ​ផ្សាយ​គំនិត​ផ្អែក​លើ​ឧត្តមភាព​ឬ​ការ​ស្អប់​ខ្ពើម​និង​ការ​ញុះញង់​ឲ្យ​រើស​អើង​ជាតិ​សាសន៍ ព្រម​ទាំង​អំពើ​ហិង្សា ឬ​ការ​ញុះ​ញង់​ឲ្យ​ប្រព្រឹត្ត​អំពើ​ហិង្សា​ប្រឆាំង​នឹង​ជាតិ​សាសន៍​ណា​មួយ​ដែល​ពណ៌​សម្បុរ​ឬ​ប្រភព​ជាតិ​ផ្សេង ពុំ​មាន​ក្នុង​សង្គម​ប្រជាធិបតេយ្យ»។

លោក ស៊ូប៊ែរឌី បន្ត​ថា មេ​ដឹក​នាំ​គណបក្ស​សង្គ្រោះ​ជាតិ​បាន​បដិសេធ​នៅ​ក្នុង​កិច្ច​ជំនួប​ថា ខ្លួន​មិន​ចង់​មាន​ន័យ​ដូច​អ្វី​ដែល​អ្នក​ដទៃ​លើក​នោះ​ទេ។

លោក​ថ្លែង​ថា៖ «ទោះ​គេ​សន្មត​អ្វី​ក៏​ដោយ ប៉ុន្តែ​វា​មិន​មែន​ជា​ចេតនា​របស់​យើង​ដូច​គេ​មាន​ន័យ​បែប​នោះ​ឡើយ។ ប្រជាជន​អាច​យល់​ផ្សេង​ពី​សេចក្តី​ថ្លែង​នោះ ប៉ុន្តែ​មេ​ដឹក​នាំ​គណបក្ស​សង្គ្រោះ​ជាតិ​បាន​ធានា​នឹង​ខ្ញុំ​ថា គេ​ធ្វើ​ការងារ​នេះ ហើយ​បាន​ធ្វើ​រួច​ហើយ​ក្រោម​ក្របខ័ណ្ឌ​លទិ្ធ​ប្រជាធិបតេយ្យ និង​គោរព​គោល​ការណ៍​អត់ឱន​និង​សុខដុម​ជាតិ​សាសន៍»។

ជន​អន្តោប្រវេសន៍ វៀតណាម រស់​នៅ និង​ធ្វើ​ការ​នៅ​កម្ពុជា ព្រម​ទាំង​ក្រុមហ៊ុន​កាន់​កាប់​ដី​សម្បទាន និង​ការ​ចាប់​យក​ដីធ្លី​ពី​សំណាក់ វៀតណាម ក្លែយ​ជា​ប្រធាន​បទ​នៃ​សេចក្តី​ថ្លែង​របស់​គណបក្ស​សង្គ្រោះ​ជាតិ ទាំង​មុន និង​ក្រោយ​ការ​បោះឆ្នោត។

ក្នុង​ខែ ធ្នូ មជ្ឈមណ្ឌល​សិទិ្ធ​មនុស្ស​កម្ពុជា​រិះគន់​បក្ស​ប្រឆាំង​ថា បាន​ប្រើ​ប្រាស់​សម្តី​ប្រឆាំង​នឹង វៀតណាម ត​មក​ក្នុង​សេចក្តី​ថ្លែង​បន្ត​បន្ទាប់​បាន​យក វៀតណាម មក​ធ្វើ​ការ​រិះគន់៕

រាយការណ៍​បន្ថែមៈ Daniel Pye

អត្ថបទគួរចាប់អារម្មណ៍