ភ្នំពេញៈ យោងតាមគោលនយោបាយសង្ខេបដែលបានចេញផ្សាយនៅក្នុងសប្តាហ៍នេះបានឱ្យដឹងថាមានស្ត្រីតែម្នាក់ប៉ុណ្ណោះក្នុងចំណោម ៥ នាក់បានកាន់តំណែងជាថ្នាក់ដឹកនាំនៅក្នុងវិស័យសុខាភិបាល បើទោះជាបុគ្គលិកផ្នែកសុខាភិបាលនៅទូទាំងប្រទេសមានជាង ១៩០០០ នាក់ជាបុគ្គលិកស្ត្រីក្តី។
លើសពីនេះទៀតបើយោងតាមអត្ថបទសង្ខេបស្តីពីការលើកកម្ពស់ភាពជាអ្នកដឹកនាំរបស់ស្ត្រីក្នុងវិស័យសុខាភិបាលនៅក្រោយសង្គ្រាមនៅក្នុងវិស័យសុខាភិបាលរបស់កម្ពុជាដែលត្រូវបានចេញផ្សាយដោយសមាគមស្រាវជ្រាវអន្តរជាតិនៅសាលា the London School of Hygiene and Tropical Medicine បានឲ្យដឹងថាមានត្រឹមតែ ១៦ ភាគរយប៉ុណ្ណោះនៃបុគ្គលិកសុខាភិបាលជាន់ខ្ពស់ដូចជាវេជ្ជបណ្ឌិតជាដើមដែលជាស្ត្រីបើប្រៀបធៀបទៅនឹងឆ្មបដែលមាន ១០០ ភាគរយ។
យោងតាមរបាយការណ៍សង្ខេបនោះបានឱ្យដឹងថាស្ត្រីក៏មានឱកាសតិចតួចបើប្រៀបធៀបទៅនឹងបុរសក្នុងការទទួលបានតួនាទីថ្មី។
អត្ថបទសង្ខេបដែលបានចេញផ្សាយកាលពីថ្ងៃអង្គារបានបង្ហាញថា៖ «នេះជាបញ្ហាមួយសម្រាប់ហេតុផលជាច្រើន។ ឧទាហរណ៍បញ្ហារបស់ស្ត្រីមិនត្រូវបានឆ្លុះបញ្ចាំងនៅក្នុងគោលនយោបាយសុខភាព... គោលនយោបាយធនធានមនុស្សដូចជាបញ្ហាដែលទាក់ទងទៅនឹងការដំឡើងតំណែងជាដើមដោយមិនត្រូវបានគិតគូរអំពីហេតុការណ៍ផ្សេងៗដែលកើតឡើងក្នុងជីវិតរបស់ស្ត្រីទេដូចជានៅពេលដែលស្ត្រីសម្រាលកូន និងថែទាំកូនជាដើម»។
របាយការណ៍សង្ខេបនោះបានបញ្ជាក់ថានៅក្នុងប្រទេសកម្ពុជាស្ត្រីភាគច្រើនចូលចិត្តឲ្យមានសេវាថែទាំសុខភាពពីបុគ្គលិកថែទាំសុខភាពជាស្ត្រីហើយកង្វះខាតគ្រូពេទ្យជាស្ត្រីអាចកម្រិតចំនួនស្ត្រីនៅក្នុងការទទួលយកសេវាថែទាំសុខភាព។
អ្នកនាំពាក្យក្រសួងសុខាភិបាលលោកវេជ្ជបណ្ឌិត លីសុវណ្ណ មិនបានឆ្លើយតបនឹងសំណើសុំការបំភ្លឺទេ។
លោក ជុំ សុផា នាយកប្រតិបត្តិអង្គការសម្ព័ន្ធសុខភាព និងអភិវឌ្ឍន៍បានថ្លែងថាការរកឃើញក្នុងរបាយការណ៍សង្ខេបនេះបានឆ្លុះបញ្ចាំងពីការពិតដោយផ្អែកលើការអង្កេតរបស់លោក។
ប៉ុន្តែលោកថា វិសមភាពមួយចំនួនអាចទាក់ទងទៅនឹងប្រពៃណីរបស់ប្រទេស និងអស្ថិរភាពកាលពីអតីតកាល។
លោកបានបញ្ជាក់ថា៖ «ប្រសិនបើអ្នកទៅតាមបណ្តាខេត្តនោះ [អ្នកនឹងឃើញ] មានវេជ្ជបណ្ឌិតជាបុរសជាច្រើន»។
លោកបានបន្ថែមថាវិសមភាពបែបនេះក៏ឃើញមាននៅថ្នាក់ស្រុកផងដែរ ហើយបើនៅក្នុងទីក្រុងដូចជាទីក្រុងភ្នំពេញជាដើមគឺមានកាន់តែច្រើន។
លោកបានបន្ថែមថារដ្ឋាភិបាលគួរតែយកចិត្តទុកដាក់បន្ថែមទៀតចំពោះបញ្ហានេះដោយការវិនិយោគមូលនិធិបន្ថែម៕ NS
