សៀមរាបៈ អយ្យការអមសាលាដំបូងខេត្តសៀមរាបបានចោទប្រកាន់និងបញ្ជូនស្ត្រីដែលតែងខ្លួនធ្វើប្រុសម្នាក់ទៅឃុំនៅពន្ធនាគារខេត្តកាលពីថ្ងៃទី ២៣ មីនាពាក់ព័ន្ធករណីចាក់សាំងដុតក្មេងប្រុសម្នាក់រឿងលួចលុយ ១ ម៉ឺនរៀលប្រព្រឹត្តនៅភូមិកោកក្នាំង ឃុំរើល ស្រុកពួកកាលពីថ្ងៃ ២២ មីនា។
លោក យិន ស្រាង អ្នកនាំពាក្យសាលាដំបូងខេត្តសៀមរាបប្រាប់កាលពីម្សិលមិញថាករណីជនសង្ស័យដែលថាចាក់សាំងដុតក្មេងនោះលោកចៅក្រមបានចោទប្រកាន់និងសម្រេចឃុំខ្លួនហើយ។
លោកបានបញ្ជាក់ថា៖ «រឿងនេះចៅក្រមចោទប្រកាន់ពីបទប្រើហិង្សាដោយចេតនានិងសម្រេចឲ្យឃុំខ្លួនក្នុងពន្ធនាគារខេត្ត»។
លោក ហង្ស សុផាភារម្យ ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសៀមរាបប្រាប់ភ្នំពេញប៉ុស្តិ៍កាលពីម្សិលមិញដែរថាស្ត្រីសង្ស័យ ឈ្មោះ តែម មឿត អាយុ ៣៩ ឆ្នាំ។ រីឯក្មេងប្រុសរងគ្រោះ ឈ្មោះ ពន ប៉ិន អាយុ ៩ ឆ្នាំ ប៉ុន្តែស្ត្រីនោះ ត្រូវបានសាលាដំបូងខេត្តសៀមរាបចោទប្រកាន់និងបញ្ជូនខ្លួនទៅឃុំបណ្តោះអាសន្ននៅពន្ធនាគារខេត្តហើយ បន្ទាប់ពីសមត្ថកិច្ចចាប់បញ្ជូនទៅតុលាការ។
លោកបញ្ជាក់ថា៖ «ជនសង្ស័យរូបនោះត្រូវបានលោកចៅក្រមស៊ើបសួរឈ្មោះ ឆែ វីរៈ ជាអ្នកចោទប្រកាន់ពីបទហិង្សាដោយចេតនាមានស្ថានទម្ងន់តាមបញ្ញត្តិមាត្រា ៥១៣ នៃក្រមព្រហ្មទណ្ឌ»។
បើតាមមាត្រានេះ ប្រសិនបើតុលាការរកឃើញបទល្មើសមែននោះស្ត្រីសង្ស័យរូបនេះប្រឈមនឹងការជាប់ពន្ធនាគារពី ២ ឆ្នាំទៅ ៥ ឆ្នាំនិងពិន័យជាប្រាក់ពី ៤ លានរៀលទៅ ១០ លានរៀល។
លោក ទេព ពុំសែន អធិការនគរបាលស្រុកពួក បានរំឭកកាលពីម្សិលមិញថា រវាងជនសង្ស័យនិងកុមារារងគ្រោះរស់នៅក្នុងភូមិ-ឃុំជាមួយគ្នាដោយស្ត្រីនោះជាអ្នកលក់ចាប់ហួយហើយនៅថ្ងៃកើតហេតុខណៈជនសង្ស័យកំពុងលក់ដូរស្រាប់តែក្មេងរងគ្រោះចូលលួចលុយបាន ១ ម៉ឺនរៀល។ តែត្រូវស្ត្រីសង្ស័យចាប់បានស្ត្រីនោះក៏ទាញយកសាំងក្នុងដបទុកសម្រាប់លក់ទៅចាក់លើក្មេងរងគ្រោះនោះរួចកេះដែកកេះដុតតែម្តង។
លោកបានប្រាប់បន្តថាបន្ទាប់ពីដុតរួចស្ត្រីសង្ស័យនោះបានរត់គេចខ្លួន។ ប៉ុន្តែប៉ុន្មានម៉ោងក្រោយមកក៏ត្រូវសមត្ថកិច្ចរបស់លោកតាមចាប់ខ្លួនបានមកវិញ។ លោកថា ក្មេងរងគ្រោះឈ្មោះ ពន ប៉ិន កំព្រាម្ដាយ តែបានរស់នៅជាមួយឪពុក និងរៀននៅសាលាបឋមសិក្សាក្នុងភូមិ-ឃុំ ខាងលើ។
លោកថា៖ «ក្មេងប្រុសរងគ្រោះរលាកភ្លើងសាំងពីត្រឹមដើមទ្រូងទៅលើដៃមួយចំហៀងខ្លួន និងរលាកថ្ពាល់ខាងឆ្វេងផងដែរ។ប៉ុន្តែពេលនេះរបួសនោះបានធូរស្រាលបន្តិចហើយ»៕