ភ្នំពេញៈ ស្ត្រីកម្ពុជាចំនួន ៣ រូប បានជាប់ជាបេក្ខជនផ្ដាច់ព្រ័ត្រសម្រាប់ពានរង្វាន់ «ស្ត្រីឆ្នើមសម្រាប់អនាគតអាស៊ីអាគ្នេយ៍ឆ្នាំ ២០២០» ដែលជាវេទិកានវានុវត្តន៍ដើម្បីបង្ហាញពីស្ត្រីអ្នកដឹកនាំ និងជាថ្នាលបណ្ដុះអ្នកមានទេពកោសល្យនៅក្នុងតំបន់។
អ្នកស្រី សុខ មួយហ្គេច ស្ថាបនិកនៃក្រុមហ៊ុន BMK Architects, អ្នកស្រី អាត សុធាវី អ្នកគ្រប់គ្រងកម្មវិធីជាន់ខ្ពស់ផ្នែកនវានុវត្តន៍នៅអង្គការ DAI Global និងអ្នកស្រី យូ សុធារី ស្ថាបនិកគេហទំព័រ Next Women Generation គឺជាស្ត្រីខ្មែរ ៣ រូប ក្នុងចំណោមបេក្ខជនចុងក្រោយចំនួន ៤៩ នាក់ មកពីប្រទេសចំនួន ១០ នៅក្នុងតំបន់អាស៊ាន។ អ្នករៀបចំកម្មវិធីបានចាត់ទុកបេក្ខភាពទាំងអស់ថា ជាអ្នក «កំពុងជួយធ្វើឲ្យមានការផ្លាស់ប្ដូរជាវិជ្ជមាន និងជម្នះនូវឧបសគ្គនៅក្នុងវិស័យដែលពួកគេកំពុងធ្វើ» ។
តាមសេចក្ដីប្រកាសព័ត៌មានរបស់អ្នករៀបចំកម្មវិធីកាលពីសប្ដាហ៍មុនបានឲ្យដឹងថា «ស្ត្រីឆ្នើមសម្រាប់អនាគតអាស៊ីអាគ្នេយ៍ឆ្នាំ ២០២០» បានលើកឡើង ថា៖ «បេក្ខជនចុងក្រោយទាំងនេះបង្ហាញឲ្យឃើញពីស្ត្រីឆ្នើមដែលមានឥទ្ធិពលក្នុងតំបន់អាស៊ីអាគ្នេយ៍ដោយអ្នកទាំងនេះមានទាំងថ្នាក់ដឹកនាំនៃកងទ័ពឥណ្ឌូនេស៊ីរហូតដល់អ្នកដែលមានចក្ខុវិស័យវែងឆ្ងាយក្នុងការលើកកម្ពស់ការយល់ដឹងបន្ថែមលើវាសនាជនភៀសខ្លួននៅប្រទេស ម៉ាឡេស៊ី»។
សេចក្ដីប្រកាសព័ត៌មានបានបន្តថា ស្ត្រីទាំង ៤៩ នាក់នោះ ត្រូវបានជ្រើសរើសតាមវិស័យចំនួន ១០ ពាក់ព័ន្ធនឹងការងាររបស់ពួកគេ ហើយការប្រកាសជយលាភីតាមវិស័យនីមួយៗនឹងធ្វើនៅថ្ងៃទី ១៨ ខែ មីនា ឆ្នាំ ២០២០។
អ្នកស្រី សុខ មួយហ្គេច ស្ថាបនិកនៃក្រុមហ៊ុន BMK Architects ដែលជាបេក្ខជនម្នាក់ក្នុងចំណោម ៣ នាក់ ពីកម្ពុជាត្រូវបានចាត់ចូលក្នុងវិស័យមួយឈ្មោះថា «ទ្រព្យសំណង់ និងហេដ្ឋារចនាសម្ព័ន្ធ»។ បេក្ខជននៅក្នុងវិស័យនេះត្រូវបានគេចាត់ទុកថាជាអ្នកដែល «បង្កើតពិភពលោកដែលយើងរស់នៅតាមរយៈការងាររបស់ពួកគេទាំងក្នុងវិស័យទ្រព្យសំណង់ ឬហេដ្ឋារចនាសម្ព័ន្ធ»។
អ្នកស្រី មួយហ្គេច បានបញ្ចប់ការសិក្សាថ្នាក់អនុបណ្ឌិតផ្នែកស្ថាបត្យកម្មពីសាកលវិទ្យាល័យ Nottingham ចក្រភពអង់គ្លេស។ អ្នកស្រីបានថ្លែងប្រាប់ភ្នំពេញប៉ុស្តិ៍កាលពីថ្ងៃអាទិត្យថា ការដែលអ្នកស្រីសម្រេចចិត្តចូលរួមក្នុងកម្មវិធីនេះគឺដោយសារមានជំនឿថា អ្នកស្រីអាចធ្វើឲ្យមានភាពវិជ្ជមានដល់សង្គមតាមរយៈការងាររបស់អ្នកស្រី។
អ្នកស្រីបានបញ្ជាក់ថា៖ «តាមពិតទៅ យើងមិនមែនប្រកួតប្រជែងដើម្បីយកពាន់រង្វាន់នោះទេ ខ្ញុំជឿថាអ្នកដែលឈ្នះពានរង្វាន់នេះនឹងធ្វើឲ្យមានឥទ្ធិពលវិជ្ជមានដល់ពិភពលោកដែលយើងរស់នៅ។ ដូច្នេះបញ្ហាសំខាន់គឺនៅត្រង់ថា តើអ្នកណាអាចធ្វើឲ្យមានឥទ្ធិពលវិជ្ជមាន និងរួមចំណែកដល់សង្គម»។
យោងតាមរបៀបវារៈនៃកម្មវិធីនេះបេក្ខជនដែលជាប់ចុងក្រោយនឹងត្រូវទៅឆ្លើយសំណួរផ្ទាល់មាត់ជាមួយអ្នកដាក់ចំណាត់ថ្នាក់តាមវិស័យនីមួយៗនៅប្រទេសសិង្ហបុរីនាចុងខែវិច្ឆិកានេះ។
អ្នកស្រី មួយហ្គេច បន្តថាអ្នកស្រីនឹងព្យាយាមឲ្យអស់សមត្ថភាព ដើម្បីឆ្លើយតបនឹងសំណួរដែលនឹងលើកឡើងដោយអ្នកដាក់ពិន្ទុ ខណៈដែលក្នុងវិស័យ «ទ្រព្យសំណង់ និងហេដ្ឋារចនាសម្ព័ន្ធ» នេះមានសុទ្ធតែស្ត្រីឆ្នើមៗ។
អ្នកស្រីបានថ្លែងថា៖ «អ្វីដែលសំខាន់គឺថាតើយើងរួមចំណែកអ្វីខ្លះដល់សង្គមដើម្បីធ្វើឲ្យស្ត្រីផ្សេងទៀតចូលរួមក្នុងសង្គម ជាពិសេសការតស៊ូលើផ្នត់គំនិត (អវិជ្ជមាន) មួយចំនួនទម្លាប់ (មិនល្អ) ក្នុងសង្គម និងធ្វើឲ្យសំឡេងរបស់យើងត្រូវបានគេឮ»។
កាលពីឆ្នាំមុនតារាចម្រៀង និងជាអ្នកនិពន្ធបទចម្រៀង ឡូរ៉ា ម៉ម ដែលជាស្ថាបនិកផលិតកម្មបារមី គឺជាអ្នកទទួលបានជយលាភីសម្រាប់វិស័យ «សិល្បៈ និងវប្បធម៌» ហើយនៅឆ្នាំនេះ អ្នកនាង ម៉ៅ គន្ធា ស្ថាបនិកក្រុមហ៊ុន «តស៊ូ» ទទួលជយលាភីសម្រាប់វិស័យ «សហគ្រិនសង្គម»៕