ស្ត្រីសង្ស័យក្រោយពេលសមត្ថកិច្ចឃាត់ខ្លួន។ សហការី
សៀមរាបៈ ស្ត្រីសង្ស័យម្នាក់ត្រូវបានសមត្ថកិច្ចកងរាជអាវុធហត្ថខេត្តសៀមរាបបញ្ជូនទៅសាលាដំបូងខេត្តពីម្សិលមិញបន្ទាប់ពីឃាត់ខ្លួនរឿងកាប់ប្ដីជាមន្ត្រីយោធានៅវរសេនាតូចបញ្ជូនសារកងពលធំអន្តរាគមន៍លេខ ២ ខេត្ដសៀមរាប បណ្ដាល ឲ្យស្លាប់ពេលបញ្ជូនដល់មន្ទីរពេទ្យដោយសារជម្លោះក្នុងគ្រួសារកាលពីថ្ងៃទី ៣ ខែកុម្ភៈ។
លោក កែវ សារិន មេបញ្ជាការរងកងរាជអាវុធហត្ថស្រុកបន្ទាយស្រីបានប្រាប់កាលពីម្សិលមិញថា ហេតុការណ៍នេះបានកើតឡើងនៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប។
លោកបានឲ្យដឹងថា មូលហេតុបណ្តាលឲ្យមានអំពើហិង្សាកើតឡើងគឺដំបូងដោយសារប្រពន្ធសុំលែងលះ តែបុរសរងគ្រោះជាប្តីមិនព្រម ក៏ទាស់សម្តីគ្នាហើយកើតជាអំពើហិង្សារហូតដល់ប្រពន្ធយកកាំបិតបុ័ងតោមកកាប់ប្តីចំភ្លៅខាងឆ្វេងបណ្ដាលឲ្យស្លាប់បន្ទាប់ពីបញ្ជូនដល់មន្ទីរពេទ្យខេត្ដសៀមរាប។
លោក សារិន បានឲ្យដឹងថា៖ «ករណីនេះ កើតឡើងតាំងពីម៉ោងប្រហែល ២ រសៀល ថ្ងៃអាទិត្យ។ ពេលកើតហេតុមិនមានសាក្សីនៅកន្លែងកើតហេតុទេ គឺមានតែជនរងគ្រោះ និង ប្រពន្ធតែម្ដង»។
ទោះបីយ៉ាងណា លោក កែវ សារិន បានបញ្ជាក់ថា ស្ត្រីជាជនសង្ស័យត្រូវបានសមត្ថកិច្ចជំនាញកងរាជអាវុធហត្ថខេត្តបញ្ជូនទៅតុលាការហើយកាលពីម្សិលមិញ បន្ទាប់ពីកងរាជអាវុធហត្ថស្រុកចាប់បញ្ជូនបន្តទៅខេត្តរួចមក។
លោកថា៖ «ជនសង្ស័យសមត្ថកិច្ចខេត្តយើងបញ្ចូនទៅដល់សាលាដំបូងខេត្ដហើយ។ ករណីនេះជាអំពើហិង្សាដោយចេតនា មានស្ថានទម្ងន់ទោស។ជនរងគ្រោះជាពលទាហានធម្មតាទេ»។
បើតាមលោក សារិន ជនរងគ្រោះជាប្ដីដែលស្លាប់នោះ ឈ្មោះ ឆេង ប្រុស អាយុ ២៤ ឆ្នាំ ជាមន្ត្រីយោធានៅវរសេនាតូចបញ្ជូនសារ កងពលធំអន្តរាគមន៍លេខ ២ ។ ចំណែកស្រ្តីសង្ស័យជាប្រពន្ធ មានឈ្មោះ បេង សុខលាភ អាយុ ១៩ ឆ្នាំ។
លោកបញ្ជាក់ថា៖ «ជនរងគ្រោះត្រូវប្រពន្ធកាប់ត្រូវចំភ្លៅជើងខាងឆ្វេងរួចក៏បញ្ជូនទៅមន្ទីរពេទ្យខេត្ដ តែដោយសារស្នាមរបួសធំពេក ហើយឈាមហូរខ្សោះអស់ទើបគ្រូពេទ្យជួយមិនទាន់ក៏បណ្ដាលឲ្យស្លាប់។ ឥឡូវយើងរៀបចំធ្វើបុណ្យឲ្យគាត់នៅក្នុងបន្ទាយតែម្ដង»៕
.jpg)
