ភ្នំពេញៈ លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបញ្ជាក់កាលពីម្សិលមិញថា ស្រ្តីខ្មែរដែលបានប្រកាសឱ្យលោកនាយកមន្រ្តីជួយអន្តរាគមន៍ពីប្រទេសចិន បានវិលត្រឡប់មកដល់អាកាសយាន្ដដ្ឋានអន្តរជាតិភ្នំពេញដោយសុវត្ថិភាព។ លោក ថ្លែងថា៖ «ដូច្នេះគាត់អាចមកដល់ភ្នំពេញហើយពេលនេះ»។
យោងតាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិកាលពីសប្តាហ៍មុនបានឱ្យដឹងទៀតថា ស្ថានអគ្គកុងស៊ុលកម្ពុជា ប្រចាំទីក្រុងសៀងហៃ ប្រទេសចិន បានសហការជាមួយអាជ្ញាធរចិន អន្តរាគមន៍ជួយនារីខ្មែរម្នាក់ឈ្មោះ សែម ស្រីពេជ្រ ស្នាក់នៅខេត្តជឺជាំង ប្រទេសចិន ដែលមានបំណងត្រឡប់មកកម្ពុជាវិញ ដោយសារមិនអាចរស់នៅចុះសម្រុងជាមួយប្តីរបស់នាងបាន។
ស្ថានអគ្គកុងស៊ុលបានចេញលិខិតបើកផ្លូវដល់រូបនាង ហើយប៉ូលីសចិនក៏បានយល់ព្រមនឹងប្រគល់ទិដ្ឋាការជូននៅថ្ងៃទី ២១ ខែ តុលា ឆ្នាំ ២០២០ តាមសំណើរបស់ស្ថានអគ្គកុងស៊ុល អង្គការសម្ព័ន្ធចាប់ដៃកម្ពុជានៅភ្នំពេញ បានយល់ព្រមជួយចេញសំបុត្រយន្តហោះដល់នាង។
ស្ថានអគ្គកុងស៊ុល ក៏បានឧបត្ថម្ភថ្លៃហូបចុក ថ្លៃសំបុត្ររថភ្លើង (ពីទីក្រុងវិនចូវ មកសៀងហៃ) ថ្លៃពិនិត្យស្វែងរកមេរោគកូវីដ ១៩ ដែលសរុបជាទឹកប្រាក់ ៥០០ ដុល្លារអាមេរិក ជូនដល់នាងផងដែរ។
លោក កុយ គួង បញ្ជាក់ថារាជរដ្ឋាភិបាលបានសង្គ្រោះស្រ្តីរងគ្រោះពីប្រទេសចិន បានចំនួន ៧៥ នាក់ ក្នុងរយៈពេល ៩ ខែ ឆ្នាំ ២០២០។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានប្រាប់អ្នកសារព័ត៌មាននៅក្នុងសិក្ខាសាលាថ្នាក់ជាតិស្តីពីសេវាគាំទ្រជនរងគ្រោះ ដោយអំពើជួញដូរមនុស្សកាលពីថ្ងៃពុធ ទី ២១ ខែតុលា ដោយអំពាវនាវទៅដល់ស្រ្តីខ្មែរត្រូវធ្វើការពិចារណាក្នុងការជ្រើសរើសប្តីជាជនជាតិបរទេស ដើម្បីចៀសវាងការចាញ់បោកគេដោយសារភាពមានបានពីអាពាហ៍ពិពាហ៍នៅក្រៅប្រទេស។
លោកស្រីបានមានប្រសាសន៍ថា៖ «យើងគួរតែទប់ស្មារតីដើម្បីកុំឱ្យចាញ់បោកគេ សុំកុំចេះតែប្រថុយប្រថានហើយត្រូវចេះរៀនរស់ក្នុងស្រុក រៀនរស់នៅក្នុងស្ថានភាពមួយល្អប្រសើរដូចគេដូចឯង។ មានមនុស្សរាប់លាននាក់អាចរស់នៅបាន តើហេតុអីយើងរស់នៅទីនេះមិនបាន»។
លោកស្រីបានបញ្ជាក់ថា មិនមានការហាមឃាត់ការចេញទៅក្រៅប្រទេសទេ ប្រសិនបើក្នុងករណីមានសុវត្ថិភាព ប៉ុន្តែបើពួកគាត់យល់ថា ចេញទៅហើយចាញ់បោកគេ ហើយគ្មានសុវត្ថិភាពគួរតែទប់ស្កាត់ចិត្តខ្លួនឯង ដើម្បីកុំឱ្យចាញ់បោកគេបន្តទៀត។
លោកស្រី ជូ ប៊ុនអេង បានថ្លែងថា៖ «ពេលចាញ់បោកគេ គឺយើងខាតពេលវេលា ខាតទ្រព្យសម្បតិ្ត ខាតសេចក្តីថ្លៃថ្នូរ និងកិត្តិយស ហើយពេលខ្លះគេសង្គ្រោះបានក៏ល្អ ពេលគេសង្គ្រោះមិនបាន យើងនឹងជួបវិបត្តិមួយជីវិត»៕