.jpg)
បន្ទប់ព្យាបាលអ្នកជំងឺកូវីដ១៩ នៅមន្ទីរពេទ្យខេត្តកំពង់ចាម។ រូបថត ក្រសួងសុខាភិបាល
ស្ត្រីជនជាតិខ្មែរម្នាក់អាយុ ៣៩ ឆ្នាំ និងកូនប្រុសអាយុ ១២ ឆ្នាំ រស់នៅក្រុងសៀមរាប ត្រូវបានរកឃើញវិជ្ជមានជំងឺកូវីដ ១៩ ធ្វើឲ្យអ្នកកើតជំងឺនេះ ដែលត្រូវបានរកឃើញសរុបនៅទូទាំងប្រទេសកើនឡើងដល់ ១០៩ នាក់ ដែលក្នុងចំណោមនេះ អ្នកដែលត្រូវបានព្យាបាលជាសះស្បើយចំនួន ២៣ នាក់។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលដែលទើបចេញផ្សាយនៅព្រឹកថ្ងៃទី ៣១ ខែ មីនា ឆ្នាំ ២០២០។
ស្ត្រីជាម្តាយនិងកូនដែលត្រូវបានរកឃើញវិជ្ជមានជំងឺកូវីដ ១៩ នេះ គឺជាភរិយានិងកូនរបស់បុរសអាយុ ៤០ ឆ្នាំ ដែលមានវីរុសកូវីដ ១៩ កំពុងសម្រាកព្យាបាលនៅមន្ទីរពេទ្យខេត្តសៀមរាប ហើយបុរសរូបនេះគឺជាអ្នកដែលបានវិលត្រឡប់មកពីពិធីសាសនា នៅប្រទេស ម៉ាឡេស៊ី។
ក្រសួងសុខាភិបាលបានឲ្យដឹងទៀតថា បុគ្គលទាំងពីរនាក់ម្តាយនឹងកូន ត្រូវបានដាក់ឲ្យសម្រាកព្យាបាលនៅមន្ទីរពេទ្យខេត្តសៀមរាប។ រីឯកូនពីរនាក់ទៀត និងឪពុករបស់គ្រួសារនេះ មានលទ្ធផលតេស្តអវិជ្ជមាន។
មកដល់ពេលនេះ អ្នកដែលកំពុងសម្រាកព្យាបាលសរុបមានចំនួន ៨៦ នាក់ (ស្ត្រី ២៨ នាក់ និងបុរស ៥៨ នាក់) នៅតាមមន្ទីរពេទ្យរដ្ឋ នៅថ្នាក់ជាតិ និងថ្នាក់ខេត្ត៕
