.jpg)
ស្ត្រីជាប់ចោទដែលយកស្បែកជើងគប់ស្លាកគណបក្សប្រជាជនកម្ពុជា នៅតុលាការកាលពីម្សិលមិញ។ រូបថត គីម សារុំ
ភ្នំពេញៈ ស្ត្រីជាប់ចោទដែលយកស្បែកជើងគប់ស្លាកគណបក្សប្រជាជនកម្ពុជានៅភូមិអុង ឃុំរាម ស្រុកព្រៃនប់ ខេត្តព្រះសីហនុកាលពីឆ្នាំ ២០១៧ និងបង្ហោះសាររិះគន់រដ្ឋាភិបាលពីប្រទេស ថៃ ក្នុងសវនាការពីម្សិលមិញបានសុំតុលាការកំពូលបន្ថយទោស ១ បទចោទក្នុងចំណោមបទចោទ ២ ករណី ដែលបទចោទនីមួយៗមានរយៈពេល ២ ឆ្នាំ។
កំណត់ហេតុលោកចៅក្រម ស៊ឹង បញ្ញាវុឍ្ឍ អាននៅចំពោះមុខស្ត្រីជាប់ចោទថា សំណុំរឿងនេះមានស្ត្រីជាប់ចោទឈ្មោះ សំ សុខា អាយុ ៣៨ ឆ្នាំ ជាកម្មករកាត់ដេរមានទីលំនៅភូមិត្រស់សាលាក្រុងច្បារមន ខេត្តកំពង់ស្ពឺដោយកាលពីអំឡុងខែមេសា ឆ្នាំ ២០១៧ បានយកស្បែកជើងគប់លើស្លាកគណបក្សប្រជាជនកម្ពុជាប្រព្រឹត្តនៅភូមិ អុង ឃុំរាម ស្រុកព្រៃនប់ ខេត្តព្រះសីហនុ។
លោកអានកំណត់ហេតុបន្តថាក្រោយពីបង្កហេតុសមត្ថកិច្ចនគរបាលបានស្វែងរកចាប់ខ្លួនតាមដីការបស់សាលាដំបូងខេត្តកំពង់ស្ពឺហើយស្ត្រីជាប់ចោទបានរត់ទៅលាក់ខ្លួននៅប្រទេសថៃ។ អំឡុងពេលគេចខ្លួនក្នុងប្រទេសថៃ ស្ត្រីជាប់ចោទបានបង្ហោះសារដែលមានន័យរិះគន់ដល់រដ្ឋាភិបាលកម្ពុជា ប៉ុន្តែក្រោយមកត្រូវបានសមត្ថកិច្ចថៃចាប់ខ្លួនប្រគល់ឲ្យអាជ្ញាធរកម្ពុជាវិញក្នុងអំឡុងឆ្នាំ ២០១៧។
បើតាមស្ត្រីជាប់ចោទប្រាប់ចៅក្រមក្នុងអង្គសវនាការថា នាងត្រូវបានសាលាដំបូងខេត្តកំពង់ស្ពឺបើកសវនាការ និងប្រកាសសាលក្រមនៅថ្ងៃទី ១៩ ខែ មករា ឆ្នាំ ២០១៧។ តុលាការចោទនាងចំនួន ២ បទចោទ និងផ្តន្ទាទោសនាងដាក់ពន្ធនាគារ ២ ឆ្នាំ និងពិន័យ ៥ លានរៀល ដោយចោទពីបទជេរប្រមាថជាសាធារណៈ និងបទញុះញង់ឲ្យមានការរើសអើងតាមមាត្រា ៥០២, ៤៩៤, ៤៩៦ នៃក្រមព្រហ្មទណ្ឌ។ ក្នុងបទចោទទាំង ២ នេះនាងបានប្តឹងទាស់ទៅសាលាឧទ្ធរណ៍ ប៉ុន្តែត្រូវសាលាឧទ្ធរណ៍ប្រកាសសាលដីកាសម្រេចតម្កល់ទោសដដែល។
ស្ត្រីជាប់ចោទប្រាប់តុលាការថា៖ «ពេលខ្ញុំយកស្បែកជើងគប់ស្លាកគណបក្សប្រជាជនកម្ពុជា ព្រោះពេលនោះឪពុកខ្ញុំទើបស្លាប់ ហើយខ្ញុំក៏បាត់បង់ការងារធ្វើទៀត។ ខ្ញុំសុំតុលាការកំពូលជួយបន្ថយទោសដល់ខ្ញុំផង ព្រោះខ្ញុំដឹង កំហុសហើយ។ ខ្ញុំគ្មានលទ្ធភាពសងរដ្ឋនូវប្រាក់ពិន័យ ១០ លានរៀលទេ»។ ទោះយ៉ាងណា ស្ត្រីជាប់ចោទមិនបានបញ្ជាក់ច្បាស់អំពីការសុំឲ្យតុលាការកំពូលបន្ថយទោសសម្រាប់នាងកម្រិតណានោះទេ។
លោក នៅ មុនីជោត តំណាងមហាអយ្យការសន្និដ្ឋានថា ស្ត្រីជាប់ចោទបានជាប់ ២ បទល្មើសហើយក្នុង ១ បទចោទ គឺត្រូវបានតុលាការថ្នាក់ក្រោមផ្តន្ទាទោសឲ្យជាប់ពន្ធនាគារ ២ ឆ្នាំ និងពិន័យប្រាក់ ៥ លានរៀល។ ប៉ុន្តែគាត់បានសុំបន្ថយទោសតែ ១ បទចោទទេ គឺករណីបង្ហោះសារ ជេរប្រមាថដល់ថ្នាក់ដឹកនាំកម្ពុជា។
លោកសន្និដ្ឋានថា៖ «ហេតុដូច្នេះសូមក្រុមប្រឹក្សាជំនុំជម្រះពិចារណាតាមច្បាប់អំពីការស្នើសុំរបស់ជនជាប់ចោទ»។
លោក ឡោ ជុនធី មេធាវីស្ត្រីជាប់ចោទ សំ សុខា សន្និដ្ឋានថាកូនក្តីរបស់លោកបានទទួលស្គាល់កំហុសហើយ។ ព្រោះគាត់ថាកាលពីនៅប្រទេសថៃ គេបានបង្កើតអាខោនឲ្យគាត់ប្រើដោយមានការជេរដែលប៉ះពាល់ដល់រដ្ឋាភិបាលកម្ពុជា។ គាត់ដើរមិនទាន់បច្ចេកវិទ្យាទំនើបនេះ ចេះតែប្រើដោយមិនយល់ពីច្បាប់។
លោកបន្តថា ម្យ៉ាងកូនក្តីរបស់លោកនៅក្នុងពន្ធនាគារបានសរសេរលិខិតសុំទោសដល់ថ្នាក់ដឹកនាំកម្ពុជាជាសាធារណៈចំពោះទង្វើខុសឆ្គងរបស់គាត់ទាំង ២ បទល្មើសនោះហើយដែរ។ ចំពោះបទចោទទី ១ ដែលត្រូវជាប់ពន្ធនាគារ ២ ឆ្នាំនោះ គឺនៅខែកុម្ភៈ ឆ្នាំ ២០២០ នឹងត្រូវផុតកំណត់ទោសហើយ។ រីឯបទចោទទី ២ ពីបទជេរប្រមាថជាសាធារណៈគឺគាត់សុំតុលាការបន្ថយទោសដល់គាត់។
លោកមេធាវីថា៖ «ខ្ញុំសុំដល់តុលាការកំពូលមេត្តាបន្ថយទោសតាមការស្នើសុំរបស់គាត់ផង»។
ក្រោយជំនុំជម្រះលោកចៅក្រម គង់ ស្រ៊ីម ប្រធានក្រុមប្រឹក្សាជំនុំជម្រះបានថ្លែងថា សាលដីកានេះនឹងប្រកាសនៅថ្ងៃទី ២២ មករា៕
